🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 04 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

ഒന്നിച്ചുള്ള യാത്രകളാകും കൂടുതൽ ഫലകരം
———————————————————————-

രണ്ടു സുഹൃത്തുക്കൾ ചേർന്ന് ഒരു യാത്രയ്ക്കു പുറപ്പെട്ടു: ഒരാൾ കാഴ്ചത്തകരാർ ഉള്ളയാളും, മറ്റെയാൾ, കാലിനു സ്വാധീനക്കുറവുള്ളയാളും. ദിവസങ്ങൾക്കു ശേഷം അവർ ഒരു കാട്ടിൽ എത്തി. ഒരു കുടിലുകെട്ടി, അവിടെ താമസിക്കാൻ ആരംഭിച്ചു. അങ്ങനെയിരിക്കെ, അവിടെങ്ങും കാട്ടുതീ വ്യാപിച്ചു. കാലിനു സ്വാധീനക്കുറവുള്ളയാൾ, സുഹൃത്തിൻ്റെ കൈ പിടിച്ചു നടന്നെങ്കിലും, വേഗം പോരായിരുന്നു. അതിനാൽ, കാഴ്ചത്തകരാർ ഉള്ളയാൾ, കാലിനു സ്വാധീനക്കുറവുള്ളയാളോടു പറഞ്ഞു:
”നീ എൻ്റെ തോളിൽ കയറിക്കൊളൂ. ഞാൻ വളരെ വേഗം നടക്കാം. നീ വഴി പറഞ്ഞു തന്നാൽ മതി”. അങ്ങനെ അവർ ഇരുവരും കാട്ടുതീയിൽ നിന്നും രക്ഷപെട്ടു.

ലോകം നൽകുന്ന കാഴ്ചകൾ ഒരു ജീവിതം കൊണ്ടു കണ്ടുതീരുകില്ലെങ്കിലും, ഇതിനകം കണ്ട കാഴ്ചകളും, കടന്നുവന്ന വഴികളും, ജീവിതം ശേഷ്ഠമാക്കാൻ നമ്മെ സഹായിക്കണം. യോജ്യമായ കൂട്ടുകെട്ടില്ലാത്തതിൻ്റെ പേരിൽ, തുടങ്ങാത്ത യാത്രകളും, ആരംഭം കുറിക്കാത്ത പ്രവർത്തനങ്ങളും, പണിതീരാത്ത പദ്ധതികളും ഏറെയാണ്.

ഒരേ ചിന്തകളും, ഒരേ ശേഷികളുമുള്ള ആളുകളുടെ കൂടെ മാത്രം യാത്ര ചെയ്യുക, ഉദ്വേഗജനകമാകണമെന്നില്ല. സഹയാത്രികരുടെ വൈരുദ്ധ്യങ്ങൾ, യാത്രകളെ സവിശേഷതയുള്ളതാക്കും. ഓട്ടക്കാരനും, ചട്ടക്കാരനും, നീന്തൽക്കാരനുമൊന്നുചേർന്നുള്ള യാത്ര, എല്ലാവരുടേയും കണ്ണു തുറപ്പിക്കും: അവരവരുടെ കുറവുകളിലേക്കും, അപരരുടെ ശക്തിയിലേക്കും, കൂടിച്ചേരലിൻ്റെ സാഹസീകതയിലേക്കും.

ഒന്നിച്ചു ചേരുമ്പോഴും, ഒന്നാകുമ്പോഴും മാത്രം, പൂർത്തിയാക്കാൻ കഴിയുന്ന ചില കൃത്യങ്ങളുണ്ട് : അരുവികളൊഴുകി പുഴയിലെത്തി, പുഴയൊഴുകി കടലിൽ എത്തുന്നതു പോലെ. തനിച്ചൊഴുകാൻ തീരുമാനിച്ചാൽ, പുഴ എവിടെച്ചെന്നെത്തും? പൂർത്തീകരിക്കാനാകാത്ത കർമ്മങ്ങളുടെ ഇടവഴികളിൽ, താൻപോരിമയുടെ കാൽപാടുകൾ കാണാൻ കഴിയും. പ്രതിസന്ധികളെ പ്രതിരോധിക്കാനും, മറികടക്കാനും, കൂട്ടായുള്ള പ്രയത്നങ്ങളാകും, കൂടുതൽ ഫലകരം. സ്വന്തം വഴികൾക്ക് എല്ലാ ലക്ഷ്യങ്ങളും സാധൂകരിക്കാനാകില്ല. ഒരുമിച്ചുള്ള യാത്രകളാകും, കുടുതൽ ഫലകരം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര