🌹 “ഇന്നത്തെ ചിന്താവിഷയം” 🌹 – 2025 | ജനുവരി 15 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

പേരിനും പെരുമയ്ക്കും ആധാരമായ പെരുമാറ്റ മഹത്വം
———————————————————————————-

ചില ആളുകളെക്കുറിച്ച്, ‘അവർ വലിയവരാണ് ‘ എന്നു നാം പറയാറില്ലെ?
അവരുടെ വലുപ്പത്തിനു കാരണം, അവർക്ക് എത്ര ചെറുതാകാനും കഴിയും എന്നതാണ്. ഒരാൾ ഇരിക്കുന്ന സ്ഥാനത്തേക്കാളുപരി, ആ സ്ഥാനത്തിരുന്നുള്ള അയാളുടെ പെരുമാറ്റമാണ് ആളുകളെ ആകർഷിക്കുക. ഒരാളുടെ ശരിയായ സ്വഭാവമറിയാൻ, അയാൾക്ക് ഒരു പദവി നൽകിയാൽ മതി.

ലഭിക്കുന്ന അധികാരം പ്രദർശിപ്പിച്ചു നടക്കുന്നവരുണ്ട്. ഒരു സ്ഥാനം ലഭിച്ചുവെന്നതിൻ്റെ പേരിൽ, ഒരാളിൽ അധികകാരത്തിൻ്റെയോ, അഹംഭാവത്തിൻ്റെയോ അടയാളങ്ങൾ രൂപപ്പെടുന്നുണ്ടെങ്കിൽ, അതിനർത്ഥം, അയാൾ ആ സ്ഥാനത്തിനർഹനല്ല എന്നാണ്. എല്ലാ പദവികളും താൽക്കാലികമാണെന്നും, പദവിയിലിരിക്കുമ്പോഴുള്ള സന്മനസ്സാണ്, പദവിയിൽ നിന്നുമിറങ്ങുമ്പോഴുള്ള സ്വീകാര്യതയ്ക്ക് അടിസ്ഥാനമെന്നും തിരിച്ചറിഞ്ഞാൽ, അധികാരത്തിലിരിക്കുന്നവർക്കു വിനയവും മനുഷ്യത്വവുമുണ്ടാകും.

സ്ഥാനക്കയറ്റത്തിനനുസരിച്ചു വിനയാന്വിതരാകുന്നവരുണ്ട്. കഷ്ടപ്പാടിലൂടെയും, അദ്ധ്വാനത്തിലൂടെയും പദവിയിലെത്തിയവർ, അവർ വന്ന വഴി മറക്കാൻ സാദ്ധ്യത കുറവാണ്. തങ്ങളേക്കാൾ താഴെയുള്ളവരുടെ നിസ്സഹായതയും, ദൈന്യവും, അവർക്കു വേഗം മനസ്സിലാകും. തൻ്റെ മുമ്പിൽ താഴ്മയോടെ നിൽക്കുന്നവർ, തന്നെയല്ല, തൻ്റെ സ്ഥാനത്തെയാണ് ആദരിക്കുന്നത് എന്നു മനസ്സിലാക്കാനുള്ള വിവേകം, അവർക്കുണ്ടായിരിക്കും.

തനിക്കു മുകളിലുള്ളവരോടും, തുല്യരായിരിക്കുന്നവരോടും പുലർത്തുന്ന സമീപനമല്ല, തനിക്കു താഴെയുള്ളവരോട്, ഒരാൾ പുലർത്തുന്ന സമീപനമാണ്, അയാളുടെ സ്വഭാവ മഹിമ വെളിവാക്കുന്നത്. ആനുകുല്യത്തിനും അനുകമ്പയ്ക്കും അർഹതയുളളവരെക്കണ്ടാൽ തിരിച്ചറിയാൻ കഴിയാത്തവർ നേതാവാകുന്നത് സേവനത്തിനല്ല, സ്ഥാനം മോഹിച്ചു മാത്രമാണ്. തങ്ങളെ ബഹുമാനിക്കാത്തവരെയും ബഹുമാനിക്കാൻ കഴിയുന്നവരാണ്, അധികാരത്തിനും സ്ഥാനത്തിനുമപ്പുറം
ആദരിക്കപ്പെടുന്നത്. പെരുമാറ്റമാണ്, പേരിനും പെരുമയ്ക്കും ആധാരം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര