📱വാർത്തകൾ ഒറ്റനോട്ടത്തിൽ📱 – 2024 | ജൂലൈ 18 | വ്യാഴം ✍ കപിൽ ശങ്കർ

🔹സംസ്ഥാനത്ത് ഇന്ന് ഒരു ജില്ലയിലും റെഡ് അലര്‍ട്ട് ഇല്ല. എന്നാല്‍ 10 ജില്ലകളില്‍ അതിശക്ത മഴ മുന്നറിയിപ്പായ ഓറഞ്ച് അലര്‍ട്ടും 4 ജില്ലകളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്. കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസറഗോഡ് ജില്ലകളിലാണ് ഇന്ന് ഓറഞ്ച് അലര്‍ട്ട് പ്രഖ്യാപിച്ചിരിക്കുന്നത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളിലാണ് യെല്ലോ അലര്‍ട്ട് ഉള്ളത്. അതേസമയം കനത്ത മഴ തുടരുന്ന വയനാട് ജില്ലയിലെ പ്രൊഫഷണല്‍ കോളേജുകള്‍ ഉള്‍പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും ഇന്ന് അവധിയായിരിക്കുമെന്ന് ജില്ലാ കളക്ടര്‍ ഡി.ആര്‍ മേഘശ്രീ അറിയിച്ചു. മുന്‍കൂട്ടി നിശ്ചയിച്ച പരീക്ഷകള്‍ക്കും പിഎസ്സി പരീക്ഷകള്‍ക്കും അവധി ബാധകമല്ലെന്നും ജില്ലാ കളക്ടര്‍ അറിയിച്ചു. കോഴിക്കോട് ജില്ലയിലെ ദുരിതാശ്വാസ ക്യാംപുകള്‍ പ്രവര്‍ത്തിക്കുന്ന സ്‌കൂളുകള്‍ക്ക് കോഴിക്കോട് ജില്ലാ കളക്ടറും അവധി പ്രഖ്യാപിച്ചിട്ടുണ്ട്.

🔹തിരുവനന്തപുരത്തെ ആമയിഴഞ്ചാന്‍ തോട് ദുരന്തത്തില്‍ വിമര്‍ശനവുമായി കേരള ഹൈക്കോടതി. മാലിന്യം തോട്ടില്‍ തള്ളുന്നത് ആളുകളെ കൊല്ലുന്നതിന് തുല്യമാണെന്നും മാലിന്യ നിര്‍മ്മാര്‍ജ്ജനത്തില്‍ ജനത്തിന്റെ കണ്ണ് തുറപ്പിക്കുന്ന ഇടപെടലുണ്ടാവണമെന്നും ഹൈക്കോടതി ആവശ്യപ്പെട്ടു. ജോയിയെ തോട്ടില്‍ നിന്ന് പുറത്തെത്തിക്കാന്‍ മാലിന്യം നിറഞ്ഞ തോട്ടില്‍ ഇറങ്ങി തിരച്ചില്‍ നടത്തിയ അഗ്നിരക്ഷാ സേനാംഗങ്ങളെ ഹൈക്കോടതി അഭിനന്ദിച്ചു. കൊച്ചിയിലെ വെള്ളക്കെട്ട് സംബന്ധിച്ച കേസ് പരിഗണിക്കവെയാണ് കോടതി ഇക്കാര്യം വ്യക്തമാക്കിയത്.

🔹തദ്ദേശ തെരഞ്ഞെടുപ്പിലെ വിജയത്തിനായി വന്‍ പദ്ധതികളുമായി കോണ്‍ഗ്രസ്. എഐസിസി ജനറല്‍ സെക്രട്ടറി കെസി വേണുഗോപാല്‍ പങ്കെടുത്ത യോഗത്തിലാണ് തീരുമാനം. സംസ്ഥാനത്തെ 14 ജില്ലകളുടെയും ചുമതല 14 നേതാക്കള്‍ക്ക് വീതിച്ചു നല്‍കി. വര്‍ക്കിങ് പ്രസിഡന്റുമാരായ ടി സിദ്ധിഖിന് വടക്കന്‍ മേഖലയുടെയും ടിഎന്‍ പ്രതാപന് മധ്യ മേഖലയുടെയും കൊടിക്കുന്നില്‍ സുരേഷിന് ദക്ഷിണ മേഖലയുടെയും ചുമതല നല്‍കി. കോര്‍പ്പറേഷനുകളുടെ ചുമതല കെ.സുധാകരനും, രമേശ് ചെന്നിത്തലക്കും, റോജി.എം.ജോണിനും, വി.ഡി.സതീശനും, വി.എസ്.ശിവകുമാറിനും, പി.സി.വിഷ്ണുനാഥിനും നല്‍കി. തദ്ദേശഭരണ തെരഞ്ഞെടുപ്പില്‍ വന്‍ വിജയം നേടാന്‍ കഠിനപ്രയത്നം വേണമെന്ന ഹൈക്കമാന്റ് നിര്‍ദ്ദേശം അടിസ്ഥാനമാക്കിയാണ് നീക്കം.

🔹സംഗീതജ്ഞന്‍ രമേഷ് നാരായണനുമായി ബന്ധപ്പെട്ടുണ്ടായ വിവാദത്തില്‍ പ്രതികരണവുമായി നടന്‍ ആസിഫ് അലി. വിഷയത്തില്‍ തനിക്ക് വിഷമമോ പരിഭവമോ ഇല്ലെന്നും പറഞ്ഞ ആസിഫ് അലി തന്നെ പിന്തുണയ്ക്കുന്നത് മറ്റൊരാള്‍ക്ക് എതിരെയുള്ള വിദ്വേഷ പ്രചരണമായി മാറരുതെന്നും അഭ്യര്‍ത്ഥിച്ചു. അദ്ദേഹം മനഃപൂര്‍വം അങ്ങനെ ചെയ്തത് അല്ലെന്നും അങ്ങനെ ചെയ്യുന്ന ആളുമല്ലെന്നും എതിരെ നില്‍ക്കുന്നവന്റെ മനസൊന്ന് അറിയാന്‍ ശ്രമിച്ചാല്‍ തീരുന്ന പ്രശ്നമല്ലേ ഉള്ളൂവെന്നും അദ്ദേഹത്തെ പോലെ സീനിയര്‍ ആയിട്ടുള്ള ഒരാള്‍ താന്‍ കാരണം വിഷമിക്കാന്‍ പാടില്ലെന്നും ആസിഫ് വ്യക്തമാക്കി. കൊച്ചി സെന്റ് ആല്‍ബര്‍ട്സ് കോളേജില്‍ സിനിമാ പ്രമോഷന് എത്തിയതായിരുന്നു ആസിഫ് അലി.അതേ സമയം ആസിഫ് അലിക്ക് നന്ദിപറഞ്ഞ് രമേഷ് നാരായണന്‍.. തന്റെ സാഹചര്യം മനസ്സിലാക്കി പ്രതികരിച്ചതിന് ആസിഫിനോട് വളരെയധികം നന്ദിയുണ്ടെന്നും ഇത്തരമൊരു സാഹചര്യം ഉണ്ടായതില്‍ വിഷമമുണ്ടെന്നും രമേഷ് നാരായണന്‍ വ്യക്തമാക്കി.

🔹പൊലീസ് കൗണ്‍സിലിംഗ് ഹെല്‍പ് ഡസ്‌കായ ‘ചിരി’യുടെ പരസ്യത്തില്‍ ആസിഫ് അലിയുടെ ഫോട്ടോ. പൊലീസിന്റെ മീഡിയ സെന്ററാണ് ഫോട്ടോ പോസ്റ്റ് ചെയ്തത്. നേരിടാം, ചിരിയോടെ എന്ന പേരിലാണ് ആസിഫ് അലിയുടെ ചിത്രം ചേര്‍ത്തത്.9497900200 എന്ന ഹെല്‍പ്പ് ലൈന്‍ നമ്പറും നല്‍കിയിട്ടുണ്ട്. ചിരിയിലേയ്ക്ക് വിളിക്കാം, ചിരിക്കാം എന്നും ഒപ്പം ചേര്‍ത്തിട്ടുണ്ട്. രമേഷ് നാരായണനില്‍ നിന്ന് അവഗണന നേരിട്ടപ്പോഴും ചിരിയോടെ സാഹചര്യത്തെ ആസിഫലി നേരിട്ട പശ്ചാത്തലത്തിലാണീ പരസ്യം.

🔹മുന്‍ മുഖ്യമന്ത്രി ഉമ്മന്‍ ചാണ്ടിയുടെ ഓര്‍മ്മകള്‍ക്ക് ഇന്ന് ഒരു വയസ്സ് തികയും. ഏറെ വേദനിപ്പിച്ച വേര്‍പാടിന്റെ ഓര്‍മ്മയിലാണ് രാഷ്ട്രീയ കേരളം. സംസ്ഥാന വ്യാപകമായി ഉമ്മന്‍ ചാണ്ടിയുടെ ഓര്‍മ്മ പുതുക്കാനായി നിരവധി അനുസ്മരണ പരിപാടികളാണ് കോണ്‍ഗ്രസ് സംഘടിപ്പിച്ചിരിക്കുന്നത്.

🔹ചിറ്റൂര്‍ താലൂക്ക് ആശുപത്രിയില്‍ യുവതിക്ക് പാമ്പുകടിയേറ്റിട്ടില്ലെന്ന് ആരോഗ്യവകുപ്പ് ഡയറക്ടര്‍ ഡോക്ടര്‍ കെ ജെ റീന . വിശദമായ പരിശോധനയില്‍ പാമ്പുകടി ഏറ്റില്ലെന്നു ബോധ്യമായതായും പാമ്പ് കടിയേറ്റെന്ന സംശയത്തില്‍ യുവതിയെ പാലക്കാട് ജില്ലാ ആശുപത്രിയിലേക്ക് റഫര്‍ ചെയ്ത നടപടി ഉചിതമായില്ലെന്നും ആരോഗ്യവകുപ്പ് ഡയറക്ടര്‍ പറഞ്ഞു. അതേസമയം പനി ബാധിച്ച എട്ടുമാസം പ്രായമുള്ള മകളെ ചിറ്റൂര്‍ താലൂക്ക് ആശുപത്രിയില്‍ പ്രവേശിപ്പിച്ച യുവതി പരിസരം വൃത്തിയാക്കാനായി ചൂലെടുത്തപ്പോഴാണ് അതിനിടയിലുണ്ടായിരുന്ന പാമ്പ് യുവതിയെ കടിച്ചതെന്ന് ബന്ധുക്കള്‍ പറഞ്ഞു. വൃത്തിഹീനമായ സാഹചര്യമാണ് ചിറ്റൂര്‍ താലൂക്ക് ആശുപത്രിയിലുള്ളതെന്നും ഇതാണ് പാമ്പുകടിയേല്‍ക്കാന്‍ കാരണമെന്നും ബന്ധുക്കള്‍ ആരോപിച്ചു.

🔹കണ്ണൂര്‍ ചെങ്ങളായില്‍ നിന്നും പുരാവസ്തു വകുപ്പ് കണ്ടെത്തിയത് 200 വര്‍ഷം പഴക്കമുള്ള വസ്തുക്കള്‍. ഇതില്‍ ഇന്‍ഡോ ഫ്രഞ്ച് നാണയവും വീരരായന്‍ പണവും ഉള്‍പ്പെടുന്നു. അറക്കല്‍ രാജവംശം ഉപയോഗിച്ച നാണയങ്ങളുമുണ്ട് ഇവയില്‍. നിധി കണ്ടെടുത്ത സ്ഥലത്ത് കൂടുതല്‍ പരിശോധനയുടെ ആവശ്യമില്ലെന്നും പുരാവസ്തുവകുപ്പ് വ്യക്തമാക്കി. വെനീസിലെ മൂന്ന് പ്രഭുക്കന്മാരുടെ സ്വര്‍ണനാണയങ്ങള്‍ പതിനേഴ് പതിനെട്ട് നൂറ്റാണ്ടില്‍ ഉപയോഗിച്ചതാണെന്നും പുരാവസ്തു വകുപ്പ് പറഞ്ഞു.

🔹ബോട്ട് കേടായി നടുക്കടലില്‍ പെട്ട മത്സ്യത്തൊളിലാളികളെ രക്ഷിച്ച് കോസ്റ്റ് ഗാര്‍ഡ്. കൊച്ചി തീരത്ത് നിന്നും 80 നോട്ടിക്കല്‍ മൈല്‍ അകലെ കടലില്‍ കുടുങ്ങിപ്പോയ ആഷ്നി എന്ന മത്സ്യബന്ധന ബോട്ടിലെ തൊഴിലാളികളെയാണ് കോസ്റ്റ് ഗാര്‍ഡ് രക്ഷപ്പെടുത്തിയത്. കനത്ത മഴയെ തുടര്‍ന്ന് എഞ്ചിന്‍ തകരാറിലായ ബോട്ട് കോസ്റ്റ് ഗാര്‍ഡിന്റെ ഹെലികോപ്റ്ററും കപ്പലും എത്തിയാണ്, കരയ്ക്ക് എത്തിച്ചത്.

🔹സൈബര്‍ തട്ടിപ്പ് തടയാന്‍ ബാങ്ക് അക്കൗണ്ടുകളില്‍ നിയന്ത്രണവും നിരീക്ഷണവും വേണമെന്നാവശ്യപ്പെട്ട് ആര്‍ബിഐക്ക് സംസ്ഥാന പൊലീസ് മേധാവി കത്ത് നല്‍കി. പണം കൈമാറുന്നതിന്റെ പ്രധാന മാര്‍ഗം കറണ്ട് അക്കൗണ്ടുകളായിരിക്കെ, ഇത്തരം അക്കൗണ്ട് ഇടപാടിന് പരിധി നിശ്ചയിക്കണമെന്നാണ് ആവശ്യം. കേരളത്തില്‍ സൈബര്‍ തട്ടിപ്പുകളില്‍ പെട്ട് പണം നഷ്ടമാകുന്നവരുടെ എണ്ണം ഉയരുന്ന സാഹചര്യത്തിലാണ് കൂടുതല്‍ സുരക്ഷ ബാങ്ക് അക്കൌണ്ടുകളില്‍ ആവശ്യപ്പെട്ട് പൊലീസ് മേധാവി ആര്‍ബിഐക്ക് കത്ത് നല്‍കിയത്.

🔹ശുചീകരണത്തിന് റോബോട്ടിക് സംവിധാനം ഏര്‍പ്പെടുത്താനൊരുങ്ങി തിരുവനന്തപുരം വിമാനത്താവളം. ഇതിനായി തിരുവനന്തപുരം ടെക്‌നോപാര്‍ക്ക് ആസ്ഥാനമായ ജെന് റോബോട്ടിക്‌സ് കമ്പനി വികസിപ്പിച്ച ആധുനിക റോബോട്ടാണ് വിമാനത്താവളത്തില്‍ ഉപയോഗിക്കുക. രാജ്യത്തുതന്നെ ആദ്യമായാണ് ഒരു വിമാനത്താവളത്തില്‍ ശുചീകരണത്തിന് റോബോട്ടിക് സംവിധാനം ഏര്‍പ്പെടുത്തുന്നത്.

🔹തിരുവനന്തപുരത്ത് ഒരു കോളറ കേസ് കൂടി സ്ഥിരീകരിച്ചു. 24 മണിക്കൂറിനിടെ സംസ്ഥാനത്ത് 129 പേര്‍ക്കാണ് ഡെങ്കിപ്പനി റിപ്പോര്‍ട്ട് ചെയ്തത് . 36 പേര്‍ക്ക് എച്ച്1 എന്‍1 ഉം റിപ്പോര്‍ട്ട് ചെയ്തിട്ടുണ്ട്. 12,508 പേരാണ് 24 മണിക്കൂറിനിടെ പനി ബാധിച്ച് ചികിത്സ തേടിയിരിക്കുന്നത്. ഒരു ഡെങ്കി മരണവും ഒരു വെസ്റ്റ്നൈല്‍ മരണവും സംശയിക്കുന്നതായും വിവരങ്ങള്‍ പുറത്തുവരുന്നുണ്ട്.

🔹തിരുവനന്തപുരം പാലോട് നന്ദിയോട് ആലംപാറയില്‍ ഇന്നലെ പടക്ക വില്‍പനശാലക്ക് തീ പിടിച്ചുണ്ടായ അപകടത്തില്‍ ഗുരുതരമായി പരിക്കേറ്റ പടക്കകടയുടെ ഉടമസ്ഥന്‍ ഷിബു മരിച്ചു. 70 ശതമാനം പൊള്ളലേറ്റിരുന്ന ഷിബു തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുകയായിരുന്നു.

🔹എറണാകുളം ആലുവയിൽ മൂന്ന് പെൺകുട്ടികളെ കാണാതായി. പറവൂർ കവലയിലെ അനാഥാലയത്തിൽ നിന്നാണ് ഇന്ന് പുലർച്ചെയോടെ കുട്ടികളെ കാണാതായത്. സംഭവത്തിൽ ആലുവ പോലീസ് കേസെടുത്ത് അന്വേഷണം ആരംഭിച്ചു.

🔹സുഹൃത്തിൻ്റെയും ഭാര്യയുടെയും സ്വകാര്യ ദൃശ്യങ്ങൾ പോൺ സൈറ്റിൽ അപ്‌ലോഡ് ചെയ്‌ത്‌ പണം തട്ടിയ കേസിൽ യുവാവ് അറസ്റ്റിൽ. മുംബൈയിലാണ് സംഭവം. യുവതിയുടെയും യുവാവിന്റെയും ദൃശ്യങ്ങൾ സുഹൃത്ത് ഇന്റർനെറ്റിൽ അപ്‌ലോഡ് ചെയ്യുമെന്ന് ഭീഷണിപ്പെടുത്തുകയും തുടർന്ന് 50000 രൂപ ഇവരിൽ നിന്ന് പകരം ആവശ്യപ്പെടുകയുമായിരുന്നു. സംഭവത്തിൽ ഫ്രാൻസിസ് എന്നയാളാണ് അറസ്റ്റായത്.സ്ഥിരം മദ്യപാനിയായിരുന്ന യുവാവ് ഭാര്യയുമായി നിരന്തരം വഴക്കിടുകയും, ഇതിനെ തുടർന്ന് ഭാര്യയോടുള്ള ദേഷ്യത്തിൽ ഇരുവരുടെയും സ്വകാര്യ ദൃശ്യങ്ങൾ സ്വന്തം ഫോണിൽ പകർത്തി സുഹൃത്തിന് നൽകുകയുമായിരുന്നു. എന്നാൽ സുഹൃത്ത് ഈ അവസരം മുതലെടുത്ത് ഇരുവരുടെയും വീഡിയോ പോൺ സൈറ്റിൽ അപ്‌ലോഡ് ചെയ്യുകയും അതിന്റെ ലിങ്ക് യുവതിക്ക് അയച്ചു നൽകുകയും ചെയ്‌തു.
ദൃശ്യം നീക്കം ചെയ്യാൻ തന്റെ സൈബർ വിദഗ്ധനായ സുഹൃത്ത് സഹായിക്കുമെന്നും, പക്ഷെ 50000 രൂപ വേണമെന്നും പറഞ്ഞ യുവാവ് യുവതിയിൽ നിന്നും പണം തട്ടിയിരുന്നു. എന്നാൽ പണം നൽകിയിട്ടും ഇയാൾ വീഡിയോ പിൻവലിക്കാതെ വരികയും, ഈ വീഡിയോ സമൂഹ മാധ്യമങ്ങളിൽ പ്രചരിക്കുകയും ചെയ്തു. ഇതോടെയാണ് യുവതി പൊലീസിൽ പരാതി നൽകുന്നതും ഫ്രാൻസിസ് എന്നയാളെ സംഭവത്തിൽ പൊലീസ് അറസ്റ്റ് ചെയ്യുന്നതും.

🔹യുപിയിൽ കഴിഞ്ഞദിവസം ആത്മഹത്യ ചെയ്ത ബാങ്ക് ഉദ്യോഗസ്ഥയുടെ ആത്മഹത്യ കുറിപ്പ് കണ്ടെത്തി. ആക്‌സിസ് ബാങ്ക് ജീവനക്കാരി വീട്ടിനുള്ളിൽ തൂങ്ങിമരിച്ച നിലയിൽ കണ്ടെത്തിയ സംഭവത്തിലാണ് ഇപ്പോൾ കുറിപ്പ് പൊലീസ് കണ്ടെടുത്തിരിക്കുന്നത്. സഹപ്രവർത്തകരായ അഞ്ചുപേരും അവർ മൂലം തനിക്ക് നേരിടേണ്ടി വന്ന മാനസിക പീഡനങ്ങളുമാണ് യുവതി ആത്മഹത്യ കുറിപ്പിൽ എഴുതിയിരിക്കുന്നതെന്ന് പൊലീസ് വ്യക്തമാക്കി.
കഴിഞ്ഞദിവസമാണ് നോയിഡയിലെ ആക്‌സിസ് ബാങ്ക് റിലേഷൻഷിപ് മാനേജരായ ദിവാനി ത്യാഗിയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. ഓഫീസിൽ നിന്ന് നേരിടേണ്ടി വന്ന മാനസിക പീഡനമാണ് കാരണമെന്ന് യുവതിയുടെ കുടുംബം ആരോപിച്ചിരുന്നു. തുടർന്നാണ് പോലീസ് യുവതിയുടെ ആത്മഹത്യ കുറിപ്പ് കണ്ടെത്തിയത്. സഹപ്രവത്തകരായ അഞ്ച് ആളുകളുടെ പേരുകൾ യുവതി കുറിപ്പിൽ ഉൾപ്പെടുത്തിയിട്ടുണ്ട്.
‘ഓഫീസിലെ ഒരു പെൺകുട്ടി അവളുടെ ഡ്രസ്സിംഗ് സെൻസ്, അവളുടെ ഭക്ഷണ ശീലങ്ങൾ, അവളുടെ സംസാര രീതി എന്നിവയെല്ലാം’, കാണിച്ച് എപ്പോഴും കളിയാക്കുക പതിവായിരുന്നു. ശിവാനി ത്യാഗിയുടെ സഹോദരൻ പറഞ്ഞു. നിരവധി തവണ ഈ കാരണങ്ങൾ കാണിച്ച് ശിവാനി ജോലിയിൽ നിന്ന് രാജിവെക്കാൻ ശ്രമിച്ചെങ്കിലും അധികൃതർ അനുവദിച്ചില്ലെന്നും കുടുംബം ആരോപിച്ചു.

🔹ശക്തമായ കാറ്റിലും മഴയിലും രാജാക്കാട്ടില്‍ വായ്പയെടുത്ത് വാഴകൃഷി നടത്തിയ കര്‍ഷകന്റെ വാഴത്തോട്ടം പൂര്‍ണമായും നശിച്ചു. പന്താങ്കല്‍ തുളസിയുടെ 500 ഓളം വാഴകളാണ് ശക്തമായ കാറ്റില്‍ ഒടിഞ്ഞുവീണത്. ബാങ്ക് വായ്പ എടുത്തു നടത്തിയ കൃഷിയാണ് പൂര്‍ണമായും നശിച്ചത്.

🔹തെരഞ്ഞെടുപ്പ് മുന്നില്‍കണ്ട് പ്രത്യേക ധനസഹായ പദ്ധതിയുമായി മഹാരാഷ്ട്ര സര്‍ക്കാര്‍. ‘ലാഡ്‌ല ഭായ് യോജന’ എന്ന പദ്ധതിയാണ് സര്‍ക്കാര്‍ പ്രഖ്യാപിച്ചത്. യുവജനങ്ങള്‍ക്കായി വിദ്യാഭ്യാസ ധനസഹായ പദ്ധതിയാണ് നടപ്പാക്കുന്നത്. ആണ്‍കുട്ടികള്‍ക്കാണ് പദ്ധതിയുടെ പ്രയോജനം ലഭിക്കുക. നേരത്തെ ബജറ്റില്‍ 65 വയസുവരെയുള്ള എല്ലാ വനിതകള്‍ക്കും പ്രതിമാസം 1,500 രൂപ ലഭ്യമാക്കുന്ന പദ്ധതി പ്രഖ്യാപിച്ചിരുന്നു.

🔹മഴക്കെടുതിയില്‍ അസമില്‍ ഇതുവരെ 109 പേര്‍ മരിച്ചു. പതിനെട്ട് ജില്ലകളിലായി ആറുലക്ഷത്തോളം ആളുകളെ പ്രളയം ബാധിച്ചു. ഉത്തര്‍പ്രദേശില്‍ കഴിഞ്ഞ 24 മണിക്കൂറിനുളളില്‍ 6 പേര്‍ കൂടി മരിച്ചു. 22 ജില്ലകളില്‍ 1500 ഗ്രാമങ്ങള്‍ വെള്ളപ്പൊക്കത്തിലാണ്. നിലവില്‍ മഴക്ക് ശമനമുണ്ടെങ്കിലും വീണ്ടും മണ്‍സൂണ്‍ ശക്തിപ്പെടുമെന്ന് കാലാവസ്ഥാ വകുപ്പ് അറിയിച്ചു.

🔹ഒമാനില്‍ എണ്ണക്കപ്പല്‍ മറിഞ്ഞ് ഇന്ത്യന്‍ പൗരന്മാരുള്‍പ്പെടെയുള്ള ജീവനക്കാരെ കാണാതായ സംഭവത്തില്‍ എട്ട് ഇന്ത്യക്കാരെയും ഒരു ശ്രീലങ്കന്‍ പൗരനെയും ഉള്‍പ്പെടെ ഒമ്പതുപേരെ ഇന്ത്യന്‍ നാവിക സേന രക്ഷപ്പെടുത്തിയതായി പ്രതിരോധ മന്ത്രാലയം വ്യക്തമാക്കി. ജീവനക്കാരെ കണ്ടെത്തിയ വിവരം ഒമാനിലെ ഇന്ത്യന്‍ എംബസിയും സ്ഥിരീകരിച്ചു. നാവിക സേനയുടെ ഐ.എന്‍.എസ്. തേജ് നടത്തിയ തിരച്ചിലിലാണ് ഇവരെ രക്ഷിച്ചതെന്ന് പ്രതിരോധ മന്ത്രാലയം അറിയിച്ചു. ഇക്കഴിഞ്ഞ 15നാണ് ഒമാന്‍ തീരത്ത് 13 ഇന്ത്യന്‍ പൗരന്മാരുള്‍പ്പെടെ 16 പേരടങ്ങുന്ന ജീവനക്കാരെ കാണാതായത്.

🔹തിരുവനന്തപുരം അന്താരാഷ്ട്രവിമാനത്താവളത്തില്‍ ഈ സാമ്പത്തികവര്‍ഷം ഒന്നാംപാദത്തില്‍ യാത്രക്കാരുടെയും വിമാനസര്‍വീസുകളുടേയും എണ്ണത്തില്‍ റെക്കോര്‍ഡ് വര്‍ധന. മൂന്ന് മാസത്തിനിടെ 12,6000 പേരാണ് യാത്ര ചെയ്തത്. ഇത് മുന്‍ സാമ്പത്തിക വര്‍ഷത്തിലെ ഒന്നാം പാദവുമായി താരതമ്യം ചെയ്യുമ്പോള്‍ 21 ശതമാനമാണ് വര്‍ധന. മൂന്നൂമാസത്തെ യാത്രക്കാരില്‍ 6,61,000 പേര്‍ ആഭ്യന്തരയാത്രക്കാരാണ്. 5,98,000 പേര്‍ അന്താരാഷ്ട്ര യാത്രക്കാരും. അന്താരാഷ്ട്ര രാജ്യങ്ങളിലെ യാത്രക്കാരില്‍ ഏറ്റവുമധികം പേര്‍ യാത്ര ചെയ്തത് ഷാര്‍ജയിലേക്കായിരുന്നു. ആഭ്യന്തര യാത്രക്കാരുടെ കാര്യത്തില്‍ ബംഗളൂരുവിലേക്കും. വിമാന സര്‍വീസുകളുടെ എണ്ണത്തില്‍ പതിനാല് ശതമാനമാണ് വര്‍ധന. പ്രതിമാസം നാല് ലക്ഷം പേരാണ് യാത്ര ചെയ്യുന്നത്. ഈ കാലയളവില്‍ 7954 വിമാനസര്‍വീസുകളാണ് നടത്തിയത്. കഴിഞ്ഞ വര്‍ഷം ഈ കാലയളവില്‍ ഇത് 6887 ആയിരുന്നു. 2023-24 സാമ്പത്തിക വര്‍ഷം ആദ്യ പാദത്തില്‍ ആകെ യാത്രക്കാരുടെ എണ്ണം 10.38 ലക്ഷം ആയിരുന്നു. ഇത്തവണ രണ്ടുലക്ഷത്തിലേറെയാണ് വര്‍ധന. ദുബായ്, അബുദാബി, ഷാര്‍ജ, ദോഹ, ദമാം, സിംഗപ്പൂര്‍, മാലി, ക്വാലാലംപൂര്‍, കൊളംബോ എന്നിവയുള്‍പ്പെടെ 13 അന്താരാഷ്ട്ര സര്‍വീസുകളും ന്യൂഡല്‍ഹി, മുംബൈ, ബംഗളൂരു, ഹൈദരാബാദ്, ചെന്നൈ, കൊച്ചി, കണ്ണൂര്‍ എന്നിവയുള്‍പ്പെടെ ഏഴ് ആഭ്യന്തര സര്‍വീസുകളുമാണ് ഉള്ളത്.

🔹വിക്രം മുഖ്യവേഷത്തില്‍ എത്തുന്ന പാ രഞ്ജിത്ത് ചിത്രം ‘തങ്കലാനി’ലെ ഗാനത്തിന്റെ ലിറിക് വിഡിയോ പുറത്ത്. മിനിക്കി മിനിക്കി എന്ന ഗാനത്തിന്റെ ലിറിക് വിഡിയോ ആണ് പുറത്തുവന്നത്. ജി വി പ്രകാശ് കുമാര്‍ സംഗീതം നല്‍കിയ ചിത്രം സിന്ദൂരി വിശാല്‍ ആണ് പാടിയത്. ആഘോഷ ഗാനമാണ് പുറത്തുവന്നത്. പാര്‍വതിയുടെ ഗംഭീര നൃത്തമാണ് ചിത്രത്തില്‍ നിറഞ്ഞു നില്‍ക്കുന്നത്. മികച്ച അഭിപ്രായമാണ് ഗാനത്തിന് ലഭിക്കുന്നത്. ചിത്രത്തില്‍ വിക്രത്തിന്റെ ഭാര്യയുടെ വേഷത്തിലാണ് പാര്‍വതി എത്തുന്നത്. ‘നച്ചത്തിരം നഗര്‍ഗിരത്’ എന്ന സിനിമയ്ക്കു ശേഷം പാ രഞ്ജിത്ത് സംവിധാനം ചെയ്യുന്ന ‘തങ്കലാന്‍’ കര്‍ണാടകയിലെ കോലാര്‍ ഗോള്‍ഡ് ഫീല്‍ഡിന്റെ പശ്ചാത്തലത്തിലാണ് സിനിമയുടെ കഥ വികസിക്കുന്നത്. സ്വര്‍ണ ഖനനത്തിനായി തങ്ങളുടെ ഭൂമി ചൂഷണം ചെയ്യാന്‍ ലക്ഷ്യമിടുന്ന ബ്രിട്ടീഷ് കൊളോണിയല്‍ സേനയ്‌ക്കെതിരായ ഒരു ആദിവാസി നേതാവിന്റെ ചെറുത്തുനില്‍പ്പിനെ കേന്ദ്രീകരിച്ചാണ് തങ്കലാന്‍ ഒരുക്കിയിരിക്കുന്നത്. വിക്രത്തിന്റെ കരിയറിലെ 61-ാം ചിത്രം കൂടിയാണ് ‘തങ്കലാന്‍’. ആഗസ്റ്റ് 15-ന് തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലായി ‘തങ്കലാന്‍’ തിയേറ്ററുകളിലെത്തും. പാര്‍വതി തിരുവോത്തും മാളവിക മോഹനനുമാണ് നായികമാര്‍. പശുപതി, ഡാനിയല്‍ കാല്‍ടാഗിറോണ്‍, അര്‍ജുന്‍ അന്‍ബുദന്‍, സമ്പത്ത് റാം എന്നിവരും ഈ ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു.

തയ്യാറാക്കിയത്:
കപിൽ ശങ്കർ