സംസ്ഥാനത്ത് ആദ്യമായി ലൈസോസോമല് സ്റ്റോറേജ് രോഗങ്ങള്ക്ക് മരുന്ന് നല്കുന്ന പദ്ധതിയുമായി സംസ്ഥാന ആരോഗ്യ വകുപ്പ്. ആരോഗ്യ വകുപ്പ് മന്ത്രി വീണാ ജോര്ജ് തിരുവനന്തപുരം എസ്.എ.ടി. ആശുപത്രിയിലെത്തി മരുന്ന് സ്വീകരിച്ച കുട്ടികളേയും ബന്ധുക്കളേയും കണ്ടു. ആശുപത്രിയിലെ മറ്റ് രോഗികളുമായും കൂട്ടിരിപ്പുകാരുമായും മന്ത്രി ആശയ വിനിമയം നടത്തി.
ശരീര കോശങ്ങളിലെ ലൈസോസോമുകള് പ്രവര്ത്തിക്കുന്നതിന് വേണ്ടിയുള്ള എന്സൈമുകളുടെ അഭാവം കാരണം അവയവങ്ങള്ക്ക് നാശം സംഭവിക്കുന്ന അപൂര്വ രോഗാവസ്ഥയാണ് ലൈസോസോമല് സ്റ്റോറേജ് ഡിസോഡര് (lysosomal storage disorder). പോംപെ, ഗോഷെ എന്നീ രോഗങ്ങള്ക്ക് സൗജന്യ മരുന്ന് നല്കുന്ന പദ്ധതിയാണ് തിരുവനന്തപുരം എസ്.എ.ടി. ആശുപത്രിയില് ആരംഭിച്ചത്. 5 കുട്ടികള്ക്കാണ് മരുന്ന് നല്കിയത്. നവകേരള സദസിനിടെ പരാതി നല്കിയ അമ്മയുടെ കുഞ്ഞിനും മരുന്ന് നല്കിയിട്ടുണ്ട്. അപൂര്വ രോഗ ചികിത്സാ പദ്ധതിയുടെ ഭാഗമായിട്ടാണ് ചികിത്സ ഒരുക്കിയത്. പ്രതിമാസം 20 ലക്ഷം രൂപ വില വരുന്ന മരുന്നുകളാണ് സൗജന്യമായി വിതരണം ചെയ്തത്. കെ.എം.എസ്.സി.എല്. മുഖേന 53 ലക്ഷം രൂപയുടെ മരുന്നുകളാണ് ആദ്യ ഘട്ടമായി എത്തിച്ചത്.
അപൂര്വ രോഗങ്ങളുടെ ചികിത്സയില് കേരളം നടത്തുന്ന മാതൃകാപരമായ ഇടപെടലുകളെ കഴിഞ്ഞ ദിവസം ഹൈക്കോടതി പ്രത്യേകം അഭിനന്ദിച്ചിരുന്നു. അപൂര്വ രോഗ ചികിത്സയ്ക്ക് സംസ്ഥാനം പ്രത്യേക പ്രാധാന്യമാണ് നല്കുന്നതെന്ന് ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു.
