🌹 “ഇന്നത്തെ ചിന്താവിഷയം” 🌹 – 2025 | ജനുവരി 16 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

എല്ലാ വളർച്ചയ്ക്കും ഒരു തുടക്കവും തുടർച്ചയും ഉണ്ടായിരിക്കും
————————————————————————-

നൂറ്റാണ്ടുകൾ പഴക്കമുള്ള ഒരു വൻമരത്തിൻ്റെ വലുപ്പം കണ്ട് ശിഷ്യൻ ഗുരുവിനോടു ചോദിച്ചു: “ഇത്രയും വലിയ മരം എങ്ങനെയാണ് ഉണ്ടായത് ?” ഗുരു പറഞ്ഞു: “നീ പോയി അതിൻ്റെ ഒതു പഴം പറിച്ചു കൊണ്ടു വരിക?” ശിഷ്യൻ പഴം പറിച്ചു കൊണ്ടു വന്നപ്പോൾ, ഗുരു പറഞ്ഞു: “അതു മുറിക്കൂ”. പഴം മുറിച്ചു നോക്കിയപ്പോൾ, ശിഷ്യൻ അതിനുള്ളിൽ നൂറുകണക്കിനു വിത്തുകൾ കണ്ടു. അതിലൊന്നു തെരഞ്ഞെടുക്കാൻ ഗുരു ശിഷ്യനോട് ആവശ്യപ്പെട്ടു. അതു ചെയ്ത ശിഷ്യനോടതു പൊട്ടിക്കാൻ ഗുരു ആവശ്യപ്പെട്ടു. അതു പൊട്ടിച്ച ശിഷ്യൻ, അതിൽ ഉള്ളടക്കം ചെയ്യപ്പെട്ടിരുന്ന വിത്തും മുളയും കണ്ട് ആശ്ചര്യപ്പെട്ടു. ഗുരു പറഞ്ഞു: “ഒന്നുമില്ല എന്നു തോന്നാവുന്ന ഈ വിത്തിൽ നിന്നും മുളയിൽ നിന്നുമാണ് ഈ വൻമരം ഉണ്ടായത് “.

ഒരു ദിവസം കൊണ്ടല്ല ഒന്നും രൂപപ്പെടുന്നത്. എവിടെ നിന്നു തുടങ്ങി എന്നു ചോദിച്ചാൽ, കൃത്യമായ ഒരുത്തരം നൽകുക ചിലപ്പോൾ, വിഷമകരം ആയിരിക്കും. ആരംഭം കുറിച്ച സമയമോ, സ്ഥലമോ കൃത്യമായി പറയുവാൻ കഴിഞ്ഞെന്നു വരണമെന്നില്ല. എങ്ങനെയോ, എന്തിൻ്റെയൊ ഒക്കെ സഹായത്താലും ധൈര്യത്താലും തുടങ്ങിയതാകാം, പല വൻ സംരംങ്ങളും, മുന്നേറ്റങ്ങളും.

“തുടക്കം നന്നായാൽ, ഒടുക്കം നന്നാകും” എന്ന ചൊല്ലിനു ചിലപ്പോൾ, മറു ചൊല്ലുകൾ രൂപപ്പെടുത്തേണ്ടതായി വരും. നല്ല തുടക്കത്തിനായി കാത്തിരുന്നതിനാലാകാം, പലർക്കും ഒന്നും തുടങ്ങാനാകാതെ പോയത്. നല്ല സമയവും കാലവും അന്വേഷിച്ച്, ആയുസ്സു മുഴുവൻ കാത്തിരുന്നിട്ടും, മുളയ്ക്കാതെ പോയ വിത്തുകൾ കണ്ടേക്കാം. ശ്രേഷ്ഠമായ തുടക്കങ്ങളുടെ കഥ പറയാൻ പറ്റിയ എത്ര ഇതിഹാസങ്ങൾ ഉണ്ടാകും ചരിത്രത്തിൽ ഭൂരിപക്ഷവും, ഒന്നുമില്ലായ്മയിൽ തുടങ്ങി, പടവെട്ടി പിടിച്ചു കയറിയതാകും.

ഒന്നുമില്ലായ്മയിൽ നിന്നും നിറവിലേക്കുള്ള യാത്രയാണ്, ഓരോ വളർച്ചയും. എത്ര വലുതാകുന്നു എന്നത്, വിത്തിൻ്റെ വൈശിഷ്ട്യത്തെയും, മണ്ണിൻ്റെ ഫലഭൂയിഷ്ടതയേയും വിതച്ചയാളിൻ്റെ കഠിനാദ്ധ്വാനത്തെയും ആശ്രയിച്ചിരിക്കും.
വളർച്ചയുടെ വഴികൾ കണ്ടെത്താത്ത, ആ വഴികളിലൂടെ സാഹസികമായി സഞ്ചരിക്കാൻ തയ്യാറാകാത്ത, ഒരാളും, വളരില്ല. പ്രായമായതുകൊണ്ടു മാത്രം, ഒരാൾ വളരണമെന്നില്ല.

എല്ലാ തുടക്കത്തിനും ഒരവസാനം ഉണ്ടായിരിക്കും. ഓരോ അവസാനത്തിൽ നിന്നും മറ്റൊരു തുടക്കവും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര