🌹 “ഇന്നത്തെ ചിന്താവിഷയം” 🌹 – 2024 | ജൂലൈ 12 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

ഊർജ്ജം പ്രദാനം ചെയ്യുന്ന പോരാട്ടം
…………………………………………..

പൂന്തോട്ടത്തിലൂടെ നടക്കുമ്പോഴാണ് കുട്ടി ആ കാഴ്ച കണ്ടത്. ഒരു പൂമ്പാറ്റ, പ്യൂപ്പയിൽ നിന്നും പുറത്തു വരാൻ ശ്രമിക്കുന്നു. വളരെ കഷ്ടപ്പെട്ടായിരുന്നു അതിൻ്റെ ഓരോ ചലനവും. കുറച്ചു നേരം നോക്കി നിന്നിട്ടും, കാര്യമായ പുരോഗതിയൊന്നും കാണാനായില്ല. സഹതാപം തോന്നില്ല കുട്ടി, ഒരു കത്രിക എടുത്തുകൊണ്ടു വന്ന് പ്യൂപ്പയുടെ പുറം തോടു പൊട്ടിച്ചു കൊടുത്തു. പൂമ്പാറ്റ പുറത്തു വന്നു. പക്ഷെ, നിലത്ത് ഇഴഞ്ഞു നടക്കാനേ അതിനായുള്ളു; പറക്കാനായില്ല.

പോരാട്ടം, പോരായ്മയല്ല; അത് ഉണർവ്വാണ്, ഊർജ്ജമാണ്. അതിജീവനത്തിൻ്റെ കരുത്തറിഞ്ഞവർക്കു മാത്രമേ, ആത്മബലം കൂട്ടായി കാണൂ. ഒഴുക്കിനൊപ്പം നീന്തുന്നവരേക്കാൾ കൂടുതൽ വീര്യം, ഒഴുക്കിനെതിരെ നീന്തുന്നവർക്കായിരിക്കും. സഞ്ചരിക്കുന്ന വഴി എളുപ്പമുള്ളതാണെങ്കിൽ, ഒരു സഞ്ചാരി രൂപപ്പെടും; വഴി കഠിനമാണെങ്കിൽ, ഒരു സാഹസീകനും. സ്വന്തമായി ചിറകു മുളച്ച്, പുറന്തോടു പൊട്ടിക്കുന്നവർ മാത്രമേ പറന്നുയരാറുള്ളു. അല്ലാത്തവർ, മണ്ണിൽ ഇഴയുന്നവരായിരിക്കും. മനുഷ്യർ വെളളമൊഴിച്ചു പരിപാലിച്ചു വളർത്തുന്നവയെല്ലാം, ചെടികളാകും. സ്വന്തമായി സൂര്യപ്രകാശവും, ജലവും വലിച്ചെടുത്തു വളരുന്നവ, വൃക്ഷങ്ങളാകും.

എളുപ്പ വഴിയിൽ ക്രീയ ചെയ്യുക, കണക്കു പുസ്തകത്തിൽ പ്രായോഗികമാകാം; ജീവിതത്തിൽ ആകണമെന്നില്ല. സഞ്ചരിക്കുന്ന വഴികൾക്ക് കാഠിന്യം കൂടുന്തോറും, കൈവരിക്കുന്ന നേട്ടങ്ങൾക്കും, മാഹാത്മ്യം ഏറും. തളരാത്ത ആത്മവിശ്വാസവും നിലയ്ക്കാത്ത പ്രയത്നവുമാണ് നേട്ടങ്ങളുടെ ചിറകു മുളപ്പിക്കുന്നത്. സ്വയം രക്ഷപെട്ടവനു മാത്രമെ, രക്ഷപെടാൻ മറ്റൊരാളെ പ്രാപ്തനാക്കാനാകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര