🌹 “ഇന്നത്തെ ചിന്താവിഷയം” 🌹 – 2024 | ജൂലൈ 02 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

അനുഭവങ്ങൾ പാഠങ്ങളാകട്ടെ
—————————————————-

ഒരു സഞ്ചാരി കപ്പലപകടത്തിൽപ്പെട്ട് ഒരു ദ്വീപിലെത്തി. അവിടത്തെ ജനങ്ങൾ അയാളെ സന്തോഷത്തോടെ സ്വീകരിച്ച്, തങ്ങളുടെ രാജാവാക്കി. എങ്ങനെയാണു താൻ രാജാവായതെന്ന് ആഴ്ചകൾക്കുശേഷമാണയാൾ മനസ്സിലാക്കിയത്. വിചിത്രമായ ഒരു
ആചാരമണവിടെ നിലനിന്നിരുന്നത്. കപ്പലപകടത്തിൽ നിന്നും രക്ഷപെട്ട് ആരെങ്കിലുമവിടെ എത്തിയാൽ, അവർ അയാളെ രാജാവാക്കും. ദൈവാനുഗ്രഹവുളളതുകൊണ്ടാണയാൾ രക്ഷപ്പെട്ടതെന്നാണവർ കരുതിയിരുന്നത്. പക്ഷെ, രാജപദവി ഒരു വർഷത്തേക്കു മാത്രമായിരുന്നു. അതു കഴിഞ്ഞാൽ, അവർ രാജാവിനെ ശപിക്കപ്പെട്ട ദ്വീപിലേക്കു നടുകടത്തും. രാജാവവിടെക്കിടന്നു മരിക്കും.

അപകടം മനസ്സിലാക്കിയ പുതിയ രാജാവ്, ഒരു വർഷത്തിനകം ശപിക്കപ്പെട്ട ദ്വീപ്, കൃഷിക്ക് അനുയോജ്യമാക്കി. അവിടെ വ്യവസായങ്ങൾ ആരംഭിച്ചു; എല്ലാ സൗകര്യങ്ങളും ഉള്ളതാക്കി. ഒരു വർഷത്തിനു ശേഷം നാടുകടത്തിയിട്ടും, അദ്ദേഹത്തിൻ്റെ രാജയോഗം അവസാനിച്ചില്ല.

ഭാഗ്യക്കുറികളിൽ ഭാഗ്യം കണ്ടെത്താൻ ശ്രമിക്കുന്നതാനേക്കാർ ഫലപ്രദം, സ്വന്തം പ്രയത്നങ്ങളിൽ വിശ്വാസം അർപ്പിക്കുന്നതാണ്. മറ്റുള്ളവർ വച്ചുനീട്ടുന്ന സൗഭാഗ്യങ്ങൾ, ക്ഷണീകവും, നൈമിഷികവുമായിരിക്കും. അതിൽ മതിമറന്ന് ആവേശ ഭരിതരാകരുത്. ഒരു ദിവസം കൊണ്ടു കോടി പതാകളായ പലർക്കും ആ നേട്ടം, അധികകാലം നിലനിർത്താൻ ആകണമെന്നില്ല.

കൂടെ നിൽക്കുന്നവരെല്ലാം കൂട്ടുകാരാണെന്നും, നമുക്കായി കയ്യടിക്കുന്നവരെല്ലാം നമ്മുടെ ഉന്നതി കാംക്ഷിക്കുന്നവർ ആകണമെന്നുമില്ല. എല്ലാ നേട്ടങ്ങളും അർഹതയ്ക്കുള്ള അംഗീകാരം ആകണമെന്നില്ല. സ്വന്തം അനുഭവങ്ങളിൽ നിന്നു മാത്രമല്ല, മറ്റുള്ളവരുടെ അനുഭവങ്ങളിൽ നിന്നും കൂടി പാoങ്ങൾ പഠിക്കുവാൻ നമുക്കാകണം. എല്ലാം സ്വന്തം അനുഭവങ്ങൾ വച്ചു മാത്രം പഠിക്കാനാകണമെന്നില്ല. മറ്റുള്ളവരുടെ അനുഭവങ്ങളിൽ നിന്ന് മുൻകൂട്ടി മനസ്സിലാക്കാനുമാകണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര