🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 29 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

വറ്റിപ്പോകാത്ത സന്തോഷത്തിൻ്റെ ഉടമകളാകാം
—————————————————————————

സന്തോഷിക്കാൻ എല്ലാവർക്കും ഒരു കാരണം കാണും? പക്ഷെ, ആ കാരണം എക്കാലവും അങ്ങനെ തന്നെ നിൽക്കണമെന്നില്ല. എല്ലാ കാരണവും എല്ലാവർക്കും, ഒരു പോലെ സന്തോഷം നൽകണമെന്നുമില്ല! ഒരാൾ സന്തോഷിക്കുന്നു കാരണത്താൽ, മറ്റൊരാൾക്കു സന്തോഷിക്കുവാൻ കഴിഞ്ഞെന്നും വരില്ല.

എന്തിലാണോ, ഒരാൾ അമിതമായ സന്തോഷം കണ്ടെത്തുന്നത്, അതിൻ്റെ അഭാവം അയാളിൽ അസഹനീയമായ ഹൃദയവേദന സൃഷ്ടിച്ചെന്നിരിക്കും. സന്തോഷം താൽക്കാലികമാണെന്നും, അതിൻ്റെ മറുവശം ദു:ഖമാണെന്നുമുള്ള ബോധം, ആത്മനിയന്ത്രണത്തിനു വഴിയൊരുക്കും. കൂട്ടിച്ചേർക്കപ്പെടുമ്പോൾ സന്തോഷിക്കുന്നവർ, നീക്കപ്പെടുമ്പോൾ വിലപിക്കും. പക്ഷെ, ആ വിലാപം, അമിത വൈകാരികതയുടെ അനുഭവത്തിലേക്കു നയിക്കരുത്.

എന്തിൻ്റെ പേരിലാണ് ഒരാൾ സന്തോഷിക്കുകയോ, സങ്കടപ്പെടുകയോ ചെയ്യുന്നതെന്നത്, അയാളുടെ വൈകാരിക നിലവാരം മനസ്സിലാക്കാൻ നമ്മെ സഹായിക്കും. ഒരു ഉറവിടത്തിൽ നിന്നു മാത്രം സന്തോഷം അനുഭവിക്കുന്നവർക്ക്, ആ ഉറവിടം നഷ്ടമാകുമ്പോൾ, പരിഹരിക്കാനാകാത്ത ശൂന്യത അനുഭവപ്പെടും. ഒരു ഉറവ മാത്രമുള്ള കിണറിന്, നീരൊഴുക്കു വേഗത്തിൽ, നഷ്ടമാകും.

എല്ലാറ്റിലും സന്തോഷം കണ്ടെത്താൻ കഴിയുന്നവർ, സദാ സമയവും സന്തോഷമുള്ളവരിയിരിക്കും. ദുഖത്തിൻ്റെ നിഴലാട്ടം ഇല്ലാത്തതു കൊണ്ടല്ല, അതിനും മുകളിൽ, സന്തോഷത്തിൻ്റെ രശ്മികൾ തിരിച്ചറിയാൻ കഴിയുന്നതിനാൽ? അതിനാലാണ്, “എപ്പോഴും സന്തോഷിപ്പിൻ, ഇടവിടാതെ പ്രാർത്ഥിപ്പിൻ, എല്ലാറ്റിനും സ്തോത്രം ചെയ്വീൻ എന്നു വി.ലിഖിതം അനുശാസിക്കുന്നത്!

നഷ്ടപ്പെട്ടതിൻ്റെയും, ലഭിക്കാതെ പോയതിൻ്റെയും ഓർമകളാണ്, ഇപ്പാൾ ഉള്ളതിൻ്റെ സൗന്ദര്യം അപ്രസക്തമാക്കുന്നത്. കൊഴിയുന്നതെല്ലാം തളിരിടാൻ വേണ്ടിയാണു കൊഴിയുന്നത്. വറ്റിപ്പോകാത്ത സന്തോഷത്തിൻ്റെ ഉടമകളായിതീരുവാൻ നമുക്കാകട്ടെ..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര