🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 03 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ആൾക്കൂട്ടത്തിൻ്റെ ആരവത്തിൽ മയങ്ങിപ്പോകരുത്
————————————————————————————-

കാണികൾ നിറഞ്ഞ സദസ്സിൽ ഒരു കുട്ടിയുടെ സംഗീത അരങ്ങേറ്റം നക്കുകയായിരുന്നു. പ്രായത്തെ മറികടക്കുന്ന പ്രതിഭയായിരുന്നു അവൻ. ഓരോ കീർത്തനത്തിനും ശേഷം, നിറഞ്ഞ കരഘോഷമായിരുന്നു സദസ്സിൽ നിന്നുയർന്നിരുന്നത്. പക്ഷെ, അവൻ്റെ കണ്ണുകൾ നിറയുന്നത് അവനെ സസൂക്ഷ്മം വീക്ഷിച്ചിരുന്ന അവൻ്റെ കൂട്ടുകാർ ശ്രദ്ധിച്ചു.

അവസാന കീർത്തനവും കഴിഞ്ഞപ്പോൾ സദസ്സ് ഒന്നാകെ എഴുന്നേറ്റു നിന്നു കയ്യടിച്ചു. അപ്പോഴേക്കും അവൻ, വാവിട്ടു കരയാൻ തുടങ്ങി. കൂട്ടുകാർ അടുത്തുചെന്ന് അവനോടു ചോദിച്ചു: “എല്ലാവരും അഭിനന്ദിക്കുമ്പോൾ,
നിനക്കിതെന്തു പറ്റി?”. അവൻ പറഞ്ഞു:
“ഏറ്റവും പിന്നിൽ, എൻ്റെ ഗുരു ഇരിപ്പുണ്ട് . ഓരോ കീർത്തനത്തിനു ശേഷവും, ഞാൻ അദ്ദേഹത്തിൻ്റെ മിഴികളിലേക്കു നോക്കിയിരുന്നു. എന്നെ അഭിനന്ദിക്കുന്ന ഒരു ഭാവവും അദ്ദേഹത്തിൻ്റെ മുഖത്തു ഞാൻ കണ്ടില്ല. പിന്നെ ഞാനെങ്ങനെ സന്തോഷിക്കും?”

ആൾക്കൂട്ടത്തിൻ്റെ ആരവത്തിനും അഭിനന്ദന പ്രവാഹത്തിനുമിടയിൽ മതിമറന്നു സ്വയം വിലയിരുത്താൻ മറന്നു പോകരുത്. അവിടെ വളർച്ച അവസാനിക്കുകയും, തളർച്ച ആരംഭിക്കുകയും ചെയ്യും. കണികളുടെ കയ്യടികൾ തത്സമയ വൈകാരിക പ്രകടനങ്ങൾ മാത്രമാണു്ണ്. ഒരാൾ ഏറ്റവും മികച്ച പ്രകടനം കാഴ്ചവച്ചു എന്നതിനേക്കാൾ, അതു തങ്ങളെ അപ്പോൾ ത്രസിപ്പിച്ചു എന്നതിൻ്റെ പേരിലാകും പല അർപ്പുവിളികളും ഉയരുന്നത്.

സ്വന്തം കഴിവിനേക്കുറിച്ചും, കുറവിനേക്കുറിച്ചുമുള്ള അവബോധവും അവലോകനവും ആകണം, ഓരോ പ്രവൃത്തിയും പ്രകടനവും. മത്സര വിജയികൾക്കു കിട്ടുന്ന പുരസ്ക്കാരത്തിൻ്റെ അർത്ഥം, അവർ മറ്റുള്ളവരേക്കാൾ മെച്ചമാണ് എന്നു മാത്രമാണ്. അതു കൊണ്ടു മാത്രം, ഒരു പ്രകടനവും ഏറ്റവും മികച്ചതാകണമെന്നില്ല. എല്ലാ പ്രകടനങ്ങളുടെയും നടുവിലിരുന്ന്, ആത്മ വിമർശനം നടത്താനാകണം. അതിനു സഹായിക്കുന്ന ഒരു ഗുരുവുണ്ടായിരിക്കുക ഏറെ പ്രധാനമാണു്ണ്. തിരുത്താനും, തിരിച്ചറിയുവാനും അത് സഹായകരമായിരിക്കും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര