🌺 ശുഭദിനം 🌺 – 2024 | ജൂലൈ 02 | ചൊവ്വ ✍ അർച്ചന കൃഷ്ണൻ

“ആർക്കും പരാജയപ്പെടുത്താൻ
കഴിയാത്ത എൻ്റെ ശക്തികൊണ്ട്
ലോകത്തെ തടവിലിടാമെന്നും
സുഖമായ സ്വാതന്ത്ര്യത്തിൽ
കഴിയാമെന്നും ഞാൻ കരുതിയിരുന്നു.
അങ്ങനെ രാത്രിയും പകലും കഷ്ടപ്പെട്ട്, വലിയ തീയിൽ ഞാനീ ചങ്ങലയുണ്ടാക്കി. ഒടുവിൽ പണിതീർന്ന്
ചങ്ങലയ്ക്കുറപ്പുണ്ടായപ്പോൾ ഞാൻ തന്നെ ആ ചങ്ങലയിലാണെന്ന്
ഞാനറിഞ്ഞു “

രവീന്ദ്രനാഥ ടാഗോർ

ലോകത്തിലുള്ള എല്ലാ സൃഷ്ടിയ്ക്കും അതിന്റെതായ പ്രാധാന്യമുണ്ട്. ഓരോ ജീവജാലങ്ങൾക്കും ആകാരം കൊണ്ടുള്ള അളവാണ് നൽകുന്ന ഏറ്റവും വലിയ അപമാനം.സൗന്ദര്യ സങ്കല്പങ്ങളും, ഇഷ്ടാനിഷ്ട ചേഷ്ഠകളുമനുസരിച്ചു അപരനെ വിലയിരുത്തുന്നവർക്ക് അവരുടെ ആത്മാവ് കാണാനോ, അടിസ്ഥാന സ്വഭാവം മനസ്സിലാക്കാനോ കഴിയില്ല. ആദ്യക്കാഴ്ചയിലെ ആകർഷണീയതയിൽ തുടങ്ങുന്നതാണ് ആയുസ്സില്ലാത്ത പല ബന്ധങ്ങളും. ആദ്യക്കാഴ്ച്ചയിൽ ആകർഷണിയതായി തോന്നുമെങ്കിലും അത് പിന്നീട് അനാകർഷണിതമാകും. പുറം മോടി കണ്ടു സ്നേഹിക്കുന്നതൊന്നും നിലനിൽക്കില്ല. ഉപേക്ഷിക്കപ്പെട്ടതാണ് അർത്ഥവത്താകേണ്ടിയിരുന്ന പല സമ്പർക്കങ്ങളും, ബന്ധങ്ങളും. കണ്ടുമുട്ടുന്നവരിലെല്ലാം നന്മയും, മികവുമുണ്ട്. അവയെല്ലാം അപരിചിതരുടെ മുൻപിൽ അദൃശ്യമായിരിക്കും.

തങ്ങളിലെ മേന്മകളുടെ പട്ടികയും പ്രദർശിപ്പിച്ചു നടക്കുന്നവർ ആരുമുണ്ടാകില്ല. ആകൃതി നോക്കുന്നതിനു പകരം പ്രകൃതി നോക്കാനെങ്കിലും പഠിച്ചിരുന്നെങ്കിൽ എത്രയധികം ആത്മബന്ധങ്ങൾ പൂത്തുലഞ്ഞെന്നും നിലനിന്നേനെ

ഏവർക്കും ഹൃദയം നിറഞ്ഞ ശുഭദിനാശംസകൾ

അർച്ചന കൃഷ്ണൻ