🌹 “ഇന്നത്തെ ചിന്താവിഷയം” 🌹 – 2025 | ജനുവരി 13 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

തെറ്റു തിരുത്തുവാൻ മടിക്കരുത് !
———————————————————–

പഠിക്കാൻ മിടുക്കനായിരുന്നുവെങ്കിലും, ആ യുവാവ് അന്തർമുഖനും ഭീരുവുമായിരുന്നു. അവൻ ഒരു പ്രമുഖ സർവ്വകലാശാലയിൽ അഡ്മിഷൻ നേടാനെത്തി. നടപടി ക്രമങ്ങൾക്കു നേതൃത്വം നൽകിയിരുന്ന ഉദ്യാഗസ്ഥൻ അവനോടു ചോദിച്ചു: “ഏതു കോഴ്സ് പഠിക്കാനാണ് ആഗ്രഹിക്കുന്നത് ?” അവൻ പറഞ്ഞു: “തിയോളജി”. ഉദ്യോഗസ്ഥൻ കേട്ടത് ‘ബയോളജി’ എന്നായിരുന്നു. അയാൾ അങ്ങനെ തന്നെ എഴുതി. യുവാവ്, അതു കണ്ടെങ്കിലും, ധ്യൈര്യക്കുറവുമൂലം, തിരുത്തിക്കുവാൻ അവൻ ശ്രമിച്ചില്ല.

അവൻ ബയോളജി പഠിച്ചു നല്ല മാർക്കോടെ പാസ്സായി. സർട്ടിഫിക്കേറ്റു വാങ്ങി മടങ്ങുമ്പോൾ, അവൻ കൂട്ടുകാരോടു പറഞ്ഞു: “എൻ്റെ മൂന്നു വർഷം വെറുതേയായി. ഉദ്യോഗസ്ഥൻ വിഷയം തെറ്റായി എഴുതുന്നതു ഞാൻ കണ്ടതാണ്. എന്നാൽ, തിരുത്തിക്കാൻ ഞാൻ ധൈര്യപ്പെട്ടില്ല. അങ്ങനെ ദൈവശാസ്ത്രം പഠിക്കാൻ വന്ന ഞാൻ, ജീവശാസ്ത്രം പഠിച്ചു പാസ്സായി!”

ഒരാൾ അകപ്പെട്ടു പോകുന്ന സാഹചര്യങ്ങളിൽ നിന്നു പുറത്തു കടക്കാൻ ധൈര്യപ്പെടുന്നില്ലെങ്കിൽ, അയാൾ അർഹിക്കുന്ന ജീവിതം നഷ്ടമായി എന്നു വരാം. ജീവിതത്തിൻ്റെ കടിഞ്ഞാൺ സ്വന്തം കയ്യിലല്ലെങ്കിൽ, കുതിരയുടെ അവസ്ഥ തന്നെയാണ് ഒരാൾക്കുണ്ടാകുക. സ്വന്തം ഇഷ്ടമനുസരിച്ച് ഒരു സഞ്ചാരവും നടത്താനാകില്ല. എല്ലാം സവാരിക്കാരൻ്റെ ഇഷ്ടം പോലെ മാത്രമേ നടക്കൂ.

സ്വന്തം ജീവിതം സംബന്ധിച്ച്, ഒരു രൂപരേഖയുമില്ലാത്തവർ, മറ്റുള്ളവർ വരയ്ക്കുന്ന വരകളിലൂടെ മാത്രം സഞ്ചരിക്കേണ്ടി വരും. ഒരാളുടെ പ്രായത്തിനുസരിച്ചുള്ള പക്വതയും പരിജ്ഞാനവും അയാൾക്കില്ലാതെ വന്നാൽപ്പിന്നെ, വഴിപോക്കരെല്ലാം, അയാളുടെ വിധികർത്താക്കളായി മാറും.

നിശ്ചയ ദാർഢ്യമില്ലാത്തവരെല്ലാം, ആരെങ്കിലുമൊക്കെ പറയുന്ന, ഏതെങ്കിലുമൊക്കെ വഴികളിലൂടെ സഞ്ചരിക്കേണ്ടി വരും. ആർക്കോ വേണ്ടിയുള്ള യാത്രകൾ, അവനവനു വേണ്ടി ചെയ്യുന്ന പ്രയാണങ്ങൾ പോലെ, മധുരതരമോ പ്രചോദനാത്മകമോ ആകുകയില്ല. തെറ്റിയെന്നു തിരിച്ചറിഞ്ഞാൽ, അവിടെ വച്ചു തന്നെ തിരുത്തണം. തെറ്റു തിരുത്തുന്നതല്ല, തെറ്റിൽത്തന്നെ തുടരുന്നതാണ് വലിയ തെറ്റ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര