“അവൽ വിളയിച്ചത് ” ✍ തയ്യാറാക്കിയത്: റീന നൈനാൻ, മാജിക്കൽ ഫ്ലേവേഴ്സ്

ഇന്ന് ഞാൻ പരിചയപ്പെടുത്തുന്നത് പണ്ടുകാലം മുതൽ വീട്ടിൽ ഉണ്ടാക്കി വെക്കാറുള്ള ഒരു വിഭവമായ “അവൽ വിളയിച്ചത്” ആണ്. കുറേ ദിവസം കേടു കൂടാതെ ഇരിക്കുന്ന ഈ പലഹാരം എല്ലാവർക്കും സുപരിചിതമാണ്. ഇത് എങ്ങനെ ആണ് തയ്യാറാക്കുന്നത് എന്ന് നമ്മുക്ക് നോക്കാം.

ആവശ്യമായ ചേരുവകൾ

മട്ട അരിയുടെ അവൽ – അര kg
ശർക്കര – 1 kg
തേങ്ങ – 4 എണ്ണം ചിരകിയത്
എള്ള് – 2 ടേബിൾ സ്പൂൺ
പൊട്ടുകടല – അര കപ്പ്‌
ഏലയ്ക്ക – 10 എണ്ണം
ചുക്ക് – ചെറിയ രണ്ട് കഷ്ണം
ജീരകം 1- ടീസ്പൂൺ
നെയ്യ് -2 ടേബിൾ സ്പൂൺ
വെള്ളം -2 കപ്പ്‌

തയ്യാറാക്കുന്ന വിധം

ആദ്യമായി ശർക്കര പൊടിച്ച് രണ്ട് കപ്പ് വെള്ളം ചേർത്ത് പാനി ആക്കി മാറ്റി വെക്കുക.

ഏലക്ക, ചുക്ക്, ജീരകം ഇത്രയും നന്നായി പൊടിച്ച് മൂടി വെക്കുക.

ഒരു ഉരുളി അടുപ്പിൽ വെച്ച് ചൂടാകുമ്പോൾ ശർക്കര പാനി അരിച്ച് ഒഴിച്ചു കൊടുക്കുക. അതിനുശേഷം നന്നായി തിളച്ചു വരുമ്പോൾ ചിരകിയ തേങ്ങ ചേർത്ത് നന്നായി ഇളക്കി തേങ്ങയിലെ വെള്ളം വറ്റി വരുമ്പോൾ വൃത്തി ആക്കിയ അവൽ കുറേശ്ശെ ആയി ചേർത്ത് ഇളക്കി കൊടുക്കുക. തീ ഓഫ്‌ ചെയ്ത് മാറ്റുക.

വീണ്ടും ഒരു ചീനച്ചട്ടി അടുപ്പിൽവെച്ചു രണ്ടു ടേബിൾ സ്പൂൺ നെയ്യ് ഒഴിച്ച് ചൂടാകുമ്പോൾ പൊട്ടുകടല അധികം മൂത്ത് പോകാതെ റോസ്റ്റ് ചെയ്ത് അതിലേക്ക് എള്ളും കൂടി ഇട്ട് പൊട്ടിക്കഴിഞ്ഞ് അവലിലേക്ക് ഒഴിച്ച് നന്നായി ഇളക്കുക.