👬👫കുട്ടീസ് കോർണർ 👬👫 (അറുപതാം വാരം)

ഹായ് കുട്ടീസ്!!
ഈ ആഴ്ച നമുക്ക് A) തീപ്പെട്ടി ചിത്രം കണ്ടൊരു വിശദീകരണം, B) പദ ലളിതം (വാക്കുകളെ കുറിച്ചൊരു വിശദീകരണം), C) സ്ഥലനാമ കഥകൾ പിന്നെ കുറച്ചു D) കടംകഥകളും, കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങളിൽ അവ വരച്ചു നോക്കണെ ..😍

എന്ന് സ്വന്തം
ശങ്കരിയാന്റി.

👫A) തീപ്പെട്ടി ചിത്രം (5)

തത്ത

തത്തയുടെ ചിത്രമുള്ള ചില തിപ്പട്ടികൾ ചേർക്കുന്നു.

സിറ്റാസി ഫോർമസ് എന്ന പക്ഷി ഗോത്രത്തിലെ സിറ്റാസിഡെ കുടുംബത്തിൽ പെടുന്ന പക്ഷികളെ പൊതുവെ തത്തകൾ എന്ന് പറയുന്നു. 80 ജനുസ്സുകളിലായി ഏകദേശം 372 സ്പീഷിസുകൾ തിരിച്ചറിയപെട്ടിട്ടുണ്ട്. ഇവയുടെ മേൽ ചുണ്ട് തലയോടുമായി ബന്ധിച്ചിരിക്കുന്നതിനാൽ മേൽ ചുണ്ടിന് പരിമിതമായ ചലന സ്വാതന്ത്ര്യമെ ഉള്ളു.തത്തയുടെ കാലിൽ നാല് വിരലുകൾ ആണ് ഉള്ളത്. ഇതിൽ രണ്ടെണ്ണം മുന്നോട്ടും രണ്ടെണ്ണം പുറകോട്ടും ആണ്. ഇവ മിക്കപ്പോഴും കൂട്ടം ചേർന്നാണ് സഞ്ചരിക്കുന്നത്. മൊത്തം ഇനങ്ങളിൽ 5 ഇനങ്ങൾ മാത്രമാണ് പൊതുവെ കേരളത്തിൽ കാണപ്പെടുന്നത്.

തത്തകൾ മുട്ട ഇടുന്നത് വേനൽക്കാലത്താണ് ഡിസംബർ മുതൽ ഏപ്രിൽ വരെയുള്ള മാസങ്ങളിലാണ് ഇവ കൂട് കെട്ടുന്നത്.സാധാരണ തത്തകൾ 4 മുട്ടകൾ വരെ ഇടുന്നു. തത്തകൾ അനുകരണ സാമർത്ഥ്യം കൂടുതൽ ഉള്ള പക്ഷികൾ ആയതിനാൽ നിരന്തരം പരിശീലിപ്പിച്ചാൽ അക്ഷരസ്ഫുടതയോടെ സംസാരിക്കുവാൻ ഇവയ്ക്ക് കഴിയും.

ഇന്ത്യ, തെക്ക് കിഴക്കെ ഏഷ്യ, പടിഞ്ഞാറെ ആഫ്രിക്ക, എന്നിങ്ങനെ മിക്ക ഉഷ്ണമേഖലാ പ്രദേശങ്ങളിലും തത്തകളെ കാണാം. ഏററവും കൂടുതൽ തത്ത ഇനങ്ങൾ വരുന്നത് ഓസ്ട്രലേഷ്യ, തെക്കേ അമേരിക്ക, മദ്ധ്യ അമേരിക്ക എന്നിവടങ്ങളിൽ നിന്നാണ്.

📗📗

👫B) പദ ലളിതം

നാരദന്‍

നാരദൻ നമുക്ക് നിത്യ പരിചയമാണല്ലോ?. ആരാണ് നാരദൻ?. നമ്മൾ ആ പദം ഏഷണിക്കാരനെ ന്നർത്ഥത്തിൽ ഉപയോഗിക്കുന്നു. ചിലരെ ആ പേരിൽ വിളിക്കുകയും ചെയ്യുന്നു.നാരം പ്രദാനം ചെയ്യുന്നവനെന്നാണർത്ഥം. നാരം അറിവ് ആണ്. അപ്പോൾ അറിവ് നല്കുന്നവനാണ് നാരദൻ.ശരിയായ വിധത്തിൽ പകർന്നു കൊടുക്കാഞ്ഞിട്ടാണോ? അറിവ് സ്വീകരിച്ചവർ ശരിയായി മനസിലാക്കാഞ്ഞിട്ടാണോ ഏഷണിക്കാരനെന്ന പേര് ലഭിച്ചത്.

📗📗

👫C) സ്ഥലനാമ കഥകൾ

കുട്ടീസ് ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ 😍

കിളിവയൽ

പത്തനംതിട്ട ജില്ലയിൽ ഏനാത്ത് അടുർ റോഡിന് അടുത്ത് സ്ഥതി ചെയ്യുന്ന സ്ഥലം.പ്രക്യതിയുമായി ചേർന്ന് നിൽക്കുന്ന സ്ഥലനാമം.പ്രക്യതി സംരക്ഷണത്തിന്റെ ആവശ്യകത വ്യക്തമാക്കുകയാണിവിടെ.കിളിയുള്ള വയലാവാം കിളിവയൽ.കിളികളുടെ എണ്ണത്തിൽ കുടുതൽ ഉള്ള സ്ഥലം.എന്നാൽ തിരുവനന്തപുരം ജില്ലയിൽ കിളിമാനുർ ഉണ്ട്. കിളിയും മാനും ഉള്ള സ്ഥലം ആവാം .കിള്ളിമാന്റെ (ഒരു ബുദ്ധഭിക്ഷു)ഊർ എന്നും പറഞ്ഞു കേൾക്കുന്നു

📗📗

👫D) കടങ്കഥകൾ (16)

1)ഉച്ചിക്കുടുമ്മനും പെരുവയറനും നരയനും ചന്തക്കു പോയി- കൈതച്ചക്ക, മത്തങ്ങ, കുമ്പളങ്ങ .

2)ഉണങ്ങിയ മരത്തില്‍നിന്ന് വെള്ള പൂ കൊഴിയുന്നു-
നാളികേരം.

3)ഉണ്ണാത്തമ്മയ്ക്ക് പെരുവയറ്- വൈക്കോല്‍ത്തുറു.

4)ഉണ്ണുനീലി പെണ്ണിന് ഒരിക്കലേ പേറുള്ളു-
വാഴ .

5)ഊതിയാലും മഴയത്തും അണയാത്ത എണ്ണ കൂടാതെ കത്തുന്ന പൊന്‍വിളക്ക്-
ഇലക്ട്രിക് ബള്‍ബ്.

6)ഊരിയവാള്‍ ഉറയിലിട്ടാല്‍ പൊന്നിട്ട പത്തായം തരാം-
റബ്ബർ പാൽ .

7)എനിക്കു അമ്മ തന്ന ചേല നനച്ചിട്ടും നനച്ചിട്ടും നനയുന്നില്ല-
ചേമ്പില.

8)എന്റച്ഛനൊരു കാളയെ കൊണ്ടുവന്നു, കെട്ടാന്‍ ചെന്നപ്പോള്‍ കഴുത്തില്ല-
ആമ.

9)എന്റച്ഛന്‍ തന്ന പട്ടുസാരി നനച്ചിട്ടും നനച്ചിട്ടും നനയുന്നില്ല-
താമരയില.

10)എന്റെ കുട്ടിക്ക് എന്നും ചൊറി-
കൈതച്ചക്ക.

📗📗

👫E) എളുപ്പത്തിൽ ഒരു ചിത്രം വരയ്ക്കാം (44)

അവതരണം:

സൈമ ശങ്കർ, മൈസൂർ

➖➖➖➖➖➖➖➖➖➖➖
👬👭👫👭👬👭👫👭👬👭