🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 26 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

പെരുവഴിയിൽ നിന്നും രൂപപ്പെടുന്ന പുതു വഴി
————————————————————————-

ഒരു പുരയിടത്തിൽ കൃഷിക്കു തടസ്സമായിക്കിടന്ന ഒരു കൂറ്റൻപാറ കൃഷിക്കാരൻ വഴിയരികിലേക്ക് ഉരുട്ടിയിട്ടു. അപ്പാഴാണ് ഒരു ശില്പി ആ വഴി വന്നത്. ഉപേക്ഷിക്കപ്പെട്ട കൂറ്റൻ കല്ല് അദ്ദേഹം തൻ്റെ ശില്പശാലയിൽ എത്തിച്ച് , മനോഹരമായ ഒരു ശില്പം, അതിൽ നിന്നും കൊത്തിയുണ്ടാക്കി പ്രദർശനത്തിനു വെച്ചു.

പഴയ കൃഷിക്കാരൻ ആ വഴി വന്നു. ശില്പഭംഗിയിൽ ആകൃഷ്ടനായ അയാൾ എന്തു വില കൊടുത്തും അതു വാങ്ങണമെന്ന ആഗ്രഹത്തിൽ അതിൻ്റെ വില ചോദിച്ചു. ശില്പി പറഞ്ഞു: “നിങ്ങൾ എനിക്കു വിലയൊന്നും തരേണ്ട. അതു നിങ്ങൾക്കവകാശപ്പെട്ടതാണ്. അന്നു വഴിയരികിൽ നിങ്ങൾ ഉപേക്ഷിച്ച കൂറ്റൻ കല്ലിൽ നിന്നാണ് ഞാനിതുണ്ടാക്കിയത് “.

പണി അറിയുന്നവൻ്റെ കയ്യിൽ മാത്രമേ വസ്തുക്കൾക്കും പണിയായുധങ്ങൾക്കും, പ്രസക്തിയുള്ളു. ഓരോ വസ്തുവും ഉപയുക്തമാകുന്നത്, അതുപയോഗിക്കാനറിയുന്നവരുടെ കൈകളിൽ എത്തിച്ചേരുമ്പോൾ മാത്രമാണ്. സംഗീത മറിയാത്തവന് , വീണ എന്നുമൊരധികപ്പറ്റായിരിക്കും.

കരവിരുതില്ലാത്തവരുടെ കൈകളിൽ ഏതു ശിലയും ശ്വാസംമുട്ടി മരിക്കും. എല്ലാവർക്കും എല്ലാറ്റിനോടും സമരസപ്പെടാൻ കഴിഞ്ഞെന്നു വരില്ല. എനിക്കു വേണ്ടാത്തത് ആർക്കും വേണ്ടാത്തതാണെന്ന വിധിന്യായമാണ്, പല ജീവിതങ്ങൾക്കും തിരശീല വീഴ്ത്തുന്നത്.

ഉപയോഗമറിയാത്തവരുടെ മണിമാളികകളിൽ വസിക്കുന്നതിനേക്കാൾ ഭേദം, പെരുവഴിയിൽ കിടക്കുന്നതാണ്. അതിലൂടെ പുതിയ സഹവാസങ്ങൾ രൂപപ്പെട്ടു എന്നു വരാം: ആളും അർത്ഥവും അറിയാവുന്നരോടൊപ്പമുള്ള സഹവാസം. പെരുവഴിയിൽ നിന്നായിരിക്കും ചിലപ്പോൾ, നവ ജീവിതത്തിലേക്കുള്ള പുതുവഴി തെളിയുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര