🌹 “ഇന്നത്തെ ചിന്താവിഷയം” 🌹 – 2024 | മെയ് 17 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

അഹംഭാവത്തെയകറ്റി നിർത്താം
——————————————————–

ഒരു രാജ്യത്തെ മന്ത്രി ഒരു സന്യാസിയുടെ ശിഷ്യത്വം സ്വീകരിച്ചു. പണം, പദവി, പ്രശസ്തി എന്നിവയ്ക്കെല്ലാമപ്പുറം, എളിമയും ത്യാഗവും ശീലിക്കുകയായിരുന്നു ലക്ഷ്യം. അധികാരിയുടെ ഭാവമൊന്നും കൂടാതെ, വിനീതനായാണ് അദ്ദേഹം ഗുരുവിൻ്റെ കൂടെ താമസിച്ചിരുന്നത്.

ഒരിക്കൽ മന്ത്രി, ഗുരുവിനോടു ചോദിച്ചു “എന്താണു ഗുരോ, അഹംഭാവം” അദ്ദേഹം തിരിച്ചു ചോദിച്ചു: “നിങ്ങൾ ഒരു മന്ത്രിയല്ലെ ഇത്രയും പ്രായമായില്ലെ, പരിശീലനം തുടങ്ങിയിട്ടു നാളുകളായില്ലെ, എന്നിട്ടും ഇത്ര നിസ്സാര ചോദ്യം ചോദിക്കാൻ മാത്രം വിഡ്ഢിയാണോ നിങ്ങൾ” മന്ത്രിയുടെ മുഖം ദേഷ്യത്താൽ ചുവന്നു തുടുത്തു. കണ്ണിൽ തീപാറി. സന്യാസി ചിരിച്ചുകൊണ്ടു പറഞ്ഞു “ഇതാണ് അഹംഭാവം”

ഒരാൾക്കു ലഭിക്കുന്ന സാഹചര്യങ്ങൾക്കും അയാൾ ജീവിക്കുന്ന ചുറ്റുപാടുകൾക്കുമനുസരണമായി, ഓരോരുത്തരിലും തനതുഭാവങ്ങൾ രൂപപ്പെടും. എന്തിൻ്റെയെങ്കിലും പേരിലുള്ള അഹങ്കാരം, എല്ലാവരുടെയും ജീവിതത്തിൽ, നിഴലിക്കുന്നുണ്ടാകും. യോജ്യമായ സാഹചരങ്ങളിൽ, അവ പുറത്തുവരിക തന്നെ ചെയ്യും. ദേഷ്യം, പിടിവാശി, അഹംഭാവം ഇവയുടെയെല്ലാം വേഷങ്ങളിലൂടെയത് എപ്പോഴെങ്കിലും പ്രത്യക്ഷപ്പെടും തീർച്ച.

ആത്മാഭിമാനത്തിൽ നിന്നും അഹംഭാവത്തിലേക്കുള്ള ദൂരം, തുലോം തുച്ഛമാണ്. ലോകം മുഴുവനും തിരിച്ചറിഞ്ഞാലും ഒരാൾക്കതു സ്വയം തിരിച്ചറിയാൻ കഴിയില്ലയെന്നതാണ്. അഹങ്കാരത്തിൻ്റെ പ്രത്യേകത
തിരിച്ചറിയാത്തതൊന്നും, ഒരാൾക്കു തിരുത്താനുമാകില്ലല്ലോ”
ഒരാൾ അഹങ്കാരിയാണെന്നു അയാളെപ്പറഞ്ഞു വിശ്വസിപ്പിക്കാനും ആർക്കും കഴിയില്ല.

ആത്മാഭിമാനമുള്ളവർ മറ്റുള്ളവരെയും മാനിക്കും. അഹങ്കാരികളോ, അപരനെ അപമാനിക്കും. എന്തിനേ തൊടുമ്പോഴാണോ ഒരാൾക്കു മുറിവേൽക്കുന്നത് അതിലാണു അയാളുടെ അഹങ്കാരം സ്ഥിതി ചെയ്യുക. അതിനെ ചികിത്സിക്കാനും, സുഖപ്പെടുത്താനും അയാൾ തയ്യാറാകുമ്പോൾ, അയാളുടെ അഹംഭാവം, ആത്മശോധനയ്ക്കും തിരുത്തലിനും വിധേയമാകും. അയാൾ വിനീതനാകും/വിനീതയാകും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍