🌸”ഇന്നത്തെ ചിന്താവിഷയം”🌸 2024 | മാർച്ച് 09| ശനി ✍പ്രൊഫസ്സർ എ.വി. ഇട്ടി മാവേലിക്കര

വളരുന്നവരും വളർത്തുന്നവരും ആകാം
_____________________________

പിയാനോ വായിക്കാനുള്ള തൻ്റെ മകൻ്റെ കഴിവിനെ, അമ്മ പരമാവധി പ്രോത്സാഹിപ്പിച്ചിരുന്നു. ഒരിക്കൽ, പ്രസിദ്ധനായ ഒരു പിയാനോ കലാകാരൻ്റെ പ്രോഗ്രാമിന് അമ്മ മകനെ കൊണ്ടുപോയി.

ഹാളിനകത്തു കയറിയ അമ്മ, പരിചയക്കാരുമായി സംസാരിക്കുന്നതിനിടയി
ൽ, അമ്മയുടെ ശ്രദ്ധയിൽ പെടാതെ, മകൻ സ്റ്റേജിലേക്കു നുഴഞ്ഞു കയറി. പരിപാടി തുടങ്ങാറായി. സ്റ്റേജിലെ വെളിച്ചമണഞ്ഞു. സ്റ്റേജിലെ സ്പോട്ട് ലൈറ്റിനു താഴെയിരുന്ന് , അവൻ പിയാനോ വായിക്കാൻ ആരംഭിച്ചു! ആളുകൾ ദേഷ്യത്തോടെ വിളിച്ചു പറഞ്ഞു: “ആ കുട്ടിയെ, അവിടെ നിന്ന് എടുത്തു മാറ്റൂ.

ബഹളം കേട്ടെത്തിയ സംഗീതജ്ഞൻ, അവരന്നിരിക്കുന്ന കുട്ടിയെക്കണ്ടന്തിച്ചു പോയി. എന്നാൽ, അയാൾ അവനോടു, പിയാനോ വായന തുടരാനാണ് ആവശ്യപ്പെട്ടത്. അദ്ദേഹവും ഒപ്പം കൂടി . പിന്നെ, മണിക്കുറുകൾ നീണ്ട ഒരു സംഗീത മഴയാണവിടെ പെയ്തിറങ്ങിയത്.

തളർത്തുന്നവരല്ല, വളർത്തുന്നവരാണു വഴിയൊരുക്കുന്നവർ. വളരാൻ സ്വയമറിഞ്ഞു, പരിസരമറിഞ്ഞു, പരിശ്രമിച്ചാൽ മതി. എന്നാൽ, വളർത്താൻ, തനിക്കു മീതെ അപരനെയും അവൻ്റെ കഴിവുകളെയും കാണാനുള്ള വിശാലഹൃദയം ഉണ്ടാകണം. തനിക്കു താഴെയുള്ളവരിൽ നിന്നും, തന്നെക്കാൾ ശേഷിയുള്ളവരെ തിരിച്ചറിയാനും, തന്നേക്കാൾ മികവുറ്റവരായി അവരെ മാറ്റിയെടുക്കാനും സാധിക്കുന്നവരാണ്‌ കഴിവിന്റെ തുടർച്ച സാദ്ധ്യമാക്കുന്നത്.

സ്വയം വളരുന്നവർ ചരിത്രം സൃഷ്ടിച്ചേക്കാം; എന്നാൽ, മറ്റുള്ളവരെ വളർത്തുന്നവരാണ്‌ ഭാവി സൃഷ്ടിക്കുന്നവർ!

പ്രകമ്പനം സൃഷ്ടിക്കുന്നവരല്ല, പ്രചോദനം നൽകുന്നവരാണ്‌ യഥാർത്ഥ പ്രതിഭകൾ. തുടക്കക്കാരെയും, ശരാശരിക്കാരെയും അവഗണിക്കുന്നവർ, മറക്കാൻ പാടില്ലാത്ത ഒരു സത്യമുണ്ട് : എല്ലാ പ്രതിഭകളും, ഒരിക്കൽ തമസ്ക്കരിക്കപ്പെട്ടവരായിരുന്നു! തിരിച്ചറിവും, തൻ്റേടവും ഇല്ലാത്തപ്പോൾ അഭിമുഖീകരിക്കേണ്ടി വരുന്ന തിരസ്ക്കരണങ്ങൾ, ഒരാളിൽ തരിളിടുന്ന സ്വപ്നങ്ങളെയെല്ലാം,തകർത്തു തരിപ്പണമാക്കും. എന്നാൽ, അപ്രതീക്ഷിതമായി ലഭിക്കുന്ന അംഗീകാരം, അത്ഭുതങ്ങൾ സൃഷ്ടിക്കും. വളരുന്നവരും വളർത്തുന്നവരും ആകാം നമുക്ക്.

ജഗദീശ്വരൻ സഹായിക്കട്ടെ..എല്ലാവർക്കും നന്മകൾ നേരുന്നു. നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍