🌹 “ഇന്നത്തെ ചിന്താവിഷയം” 🌹 – 2024 | നവംബർ 21 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

സ്വന്തം ജീവിതത്തിൻ്റെ മൂല്യം തിരിച്ചറിയാൻ ആകട്ടെ
……………………………………

ഒരു പ്രചോദനാത്മക പ്രഭാഷകൻ, തൻ്റെ മോതിരം ഊരിയിട്ടു ശ്രോതാക്കളോടു ചോദിച്ചു: “ഇതാർക്കു വേണം?”
എല്ലാവരും കൈകൾ ഉയർത്തി. അദ്ദേഹം ആ മോതിരം നിലത്തിട്ടു ചവിട്ടിയിട്ട് വീണ്ടും ചോദിച്ചു: “ഇനിയും ഇതാർക്കു വേണം?” അപ്പോഴും എല്ലാവരും കൈകൾ ഉയർത്തി. ഒരു ചുറ്റികയെടുത്ത് , അദ്ദേഹം ആ മോതിരം അടിച്ചു ചുളുക്കിയിട്ടു ചോദിച്ചു: ” ഇനിയും ഇതാർക്കെങ്കിലും വേണോ?” വീണ്ടും എല്ലാവരും കൈകൾ ഉയർത്തി!

പ്രഭാഷകൻ അവരോടു ചോദിച്ചു: “തറയിലിട്ടു ചവിട്ടിയിട്ടും, അടിച്ചു ചതച്ചിട്ടും, സ്വർണ മോതിരത്തിൻ്റെ വില കുറയുന്നില്ല എന്നറിയാവുന്ന നിങ്ങൾ, എന്തുകൊണ്ടാണ് സ്വന്തം ജീവിതത്തിൻ്റെ വില തിരിച്ചറിയാത്തത് ?”

എന്തുകൊണ്ടു നിർമ്മിക്കപ്പെട്ടിരിക്കുന്നു, എന്തിനു വേണ്ടി നിർമ്മിക്കപ്പെട്ടിരിക്കുന്നു, എന്നതിലാണ് ഏതു വസ്തുവിൻ്റെയും അടിസ്ഥാന മൂല്യം അടങ്ങിയിരിക്കുന്നത്. സ്വർണ നിറമുള്ളതും, സ്വണം പൂശിയതും, സ്വർണം കൊണ്ടു നിർമ്മിച്ചതും തമ്മിൽ, ഉള്ളടക്കത്തിലും, ഉപയോഗത്തിലും ഏറെ അന്തരമുണ്ട്. ഉള്ളറിയാവുന്നവർക്ക്, ഉടൽ ഒരു പ്രശ്നമല്ല.

ഉൾബോധമില്ലാത്തവർ, ബാഹ്യ മോടിയെ പരിപോഷിപ്പിക്കും; അന്യൻ്റെ ആകാരത്തിൽ ആകൃഷ്ടരാകും. അനുദിനം ചമയങ്ങളണിഞ്ഞു , ആരുടെയൊക്കെയോ മുമ്പിൽ, അവർക്കിഷ്ടപ്പെട്ട വേഷങ്ങൾ ചെയ്യാനുള്ളതല്ല നമ്മുടെ ജീവിതം. സ്വന്ത നിയോഗങ്ങൾക്കനുസരിച്ച്‌, തനതു പദ്ധതികളോടെ, തളരാതെയും, തകരാതെയും ആടിത്തീർക്കേണ്ടതാണ് നമ്മുടെ ജീവിതത്തിൻ്റെ എല്ലാ നിമിഷങ്ങളും.

സ്വന്തം മൂല്യ മറിയാത്തവർ, മറ്റുള്ളവരുടെ മൂല്യങ്ങൾക്കു പിന്നാലെ സഞ്ചരിക്കും. അവരുടെ സമ്മർദ്ദങ്ങൾക്കും, വിലയിരുത്തലുകൾക്കും വഴങ്ങിക്കൊടുക്കും. അങ്ങനെ, സ്വന്തം വിലയിടിച്ചു നിരാശരാകും. സ്വയം കെട്ടിപ്പെടുക്കാനും, രുപപ്പെടുത്താനുമുള്ള ഒരാളുടെ ശേഷിയാണ് അയാളുടെ ജീവിതത്തിൻ്റെ വില നിശ്ചയിക്കുന്നത്. സ്വന്തം ജീവിതത്തിനു വിലയിടാനുള്ള അവകാശം, നാം മറ്റാർക്കും വിട്ടു കൊടുക്കരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര