🌹 “ഇന്നത്തെ ചിന്താവിഷയം” 🌹 – 2024 | നവംബർ 02 | ശനി ✍ പ്രൊഫസ്സർ എ.വി. ഇട്ടി മാവേലിക്കര

നമുക്ക് വർത്തമാന കാലത്തിൽ വ്യാപരിക്കുന്നവരാകാം
—————————————————————————————

രാവിലെ ഉറക്കമുണർന്നെഴുന്നേറ്റ ഗുരു ഒരു ശിഷ്യനോടു പറഞ്ഞു: “ഞാനൊരു സ്വപ്നം കണ്ടു. ഞാനതു പറയാം. അതൊന്നു വിശദീകരിച്ചു തരാമോ?” ശിഷ്യൻ പറഞ്ഞു: “ഞാനങ്ങേയ്ക്കു മുഖം കഴുകാൻ വെള്ളം കൊണ്ടു വരാം. എന്നിട്ടു നമുക്കു സംസാരിക്കാം!” മുഖം കഴുകിയ ഗുരു, മറ്റൊരു ശിഷ്യനോടും, അതേ ചോദ്യം ആവർത്തിച്ചു!” ” ഞാൻ ഒരു കപ്പു ചായ കൊണ്ടു വരാം. എന്നിട്ടു നമുക്കു സംസാരിക്കാം”, ആ ശിഷ്യനും പറഞ്ഞു. ചായ കുടിച്ച ഗുരു പറഞ്ഞു: “നിങ്ങളുടെ വിശദീകരണത്തിൽ ഞാൻ തൃപ്തനാണ്. ഇനി അതിനേക്കുറിച്ചു സംസാരിക്കണ്ട!”.

ഇതെല്ലാം കണ്ടു നിന്ന ഒരാൾ, ഗുരുവിനോടു ചോദിച്ചു: “താങ്കൾ കണ്ട സ്വപ്നത്തേക്കുറിച്ച് അവരോടു പറയുകയോ, അവർ അതേക്കുറിച്ചു്, ഒന്നും വിശദീകരിക്കുകയോ ചെയ്തില്ല. പിന്നെങ്ങനെ, താങ്കൾ തൃപ്തനായി?”
ഗുരു പറഞ്ഞു: ”ഉണർന്നു കഴിഞ്ഞാൽപ്പിന്നെ സ്വപ്നം ഇല്ല. മുഖം കഴുകി, ചായ കുടിച്ചു കഴിഞ്ഞപ്പോൾ, എൻ്റെ സ്വപ്നം സംബന്ധിച്ച ഉൾവെളിച്ചം എനിക്കു ലഭിച്ചു. ഇനിയും അതേക്കുറിച്ചു സംസാരിച്ചിട്ടു കാര്യമില്ല!”

എല്ലാക്കാര്യങ്ങളും തത്സമയ പ്രസക്തങ്ങളാണ്. ഇന്നലെ സംഭവിച്ച കാര്യങ്ങൾക്ക് ഇന്നെലെയുണ്ടായിരുന്ന പ്രസക്തി ഇന്നുണ്ടാകില്ല. നാളെ, ഒരു പടി കൂടി അതിൻ്റെ പ്രാധാന്യം കുറയും. മാസങ്ങൾക്കും വർഷങ്ങൾക്കും ശേഷം, അതു തീർത്തും നിസ്സാരമാകും.

കഴിഞ്ഞു പോയതിനെ, കൂടെക്കൊണ്ടു നടക്കുന്നവരാണ് പലപ്പോഴും കാലിടറി വീഴുന്നതു്ത്. രചിച്ചത് ഇതിഹാസങ്ങാകാം, അനുഭവിച്ചത് ദുരന്തങ്ങളാകാം. എന്നാൽ, അവ മുന്നോട്ടുള്ള കാഴ്ചയെ മറയ്ക്കരുത്; കാലുകളെ പിന്നോട്ടു വലിയ്ക്കരുത്.
ഒരിക്കൽ തങ്ങൾ രചിച്ച വീരകഥകൾ ആവർത്തിച്ച് , ആയുസ്സു മുഴുമിപ്പിക്കുന്നവരുണ്ട് . ഒരിക്കൽ വന്നു ചേർന്ന കഷ്ടകാലത്തിൻ്റെ കദന കഥകൾ
അയവിറക്കി, ആയുസ്സു പാഴാക്കുന്നവരുമുണ്ട്. എന്നാൽ, അവർ വ്യാപരിക്കുന്നത്, വർത്തമാന കലത്തിലല്ല. വർത്തമാനകാല അനുഭവങ്ങൾക്കു മാത്രമേ ഇന്നത്തെ ജീവിതത്തിൽ പ്രസക്തിയുള്ളു! നമുക്കു വർത്തമാനകാലത്തിൽ വ്യാപരിക്കുന്നവരാകാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര