🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 08 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

വിശാലവും ശ്രേഷ്ടവും ആകട്ടെ നമ്മുടെ ഹൃദയങ്ങൾ
——————————————————————————

എല്ലാ ദിവസവും തൻ്റെ ശിഷ്യൻ ഉൾവനത്തിലേക്കു പോകുന്നതു ഗുരു ശ്രദ്ധിക്കുമായിരുന്നു. ഒരിക്കൽ ഗുരു അവനോടു ചോദിച്ചു: “നി എന്തിനാണ്
എന്നും ഉൾവനത്തിലേക്കു പോകുന്നതു്?”
“പ്രാർത്ഥിക്കാൻ “, അവൻ മറുപടി പറഞ്ഞു.
ദൈവം എല്ലായിടത്തും ഉണ്ടല്ലോ? പിന്നെന്തിനാണ് വനത്തിനുള്ളിൽ ദൈവത്തെ അന്വേഷിക്കുന്നത് ?”, ഗുരു വീണ്ടും ചോദിച്ചു.
അതിനും അവൻ ഉത്തരം നൽകി: “ദൈവം എല്ലായിടത്തുമുണ്ടന്നതു ശരി തന്നെ. പക്ഷെ, ഞാൻ എല്ലായിടത്തും ഒരുപോലെയല്ല”.

ഓരോന്നിനും അതിൻ്റേതായ സ്ഥലങ്ങളും, സ്ഥാനങ്ങളും ഉണ്ട് .എല്ലാം എല്ലായിട
ത്തും ഒരുപോലെയല്ല. എന്തും എവിടെയും, ചെയ്യാനുമാകില്ല. ഏറ്റവും അനുയോജ്യമായ സ്ഥലത്തും സ്ഥാനത്തുമാകും, ഒരോന്നും അതിൻ്റെ പൂർണ്ണതയിൽ എത്തുക.

ദൈവത്തിന് ഇടം വേണ്ടതു കൊണ്ടല്ല ദേവാലയങ്ങളും, ദേവസ്ഥാനങ്ങളും, നിർമ്മിക്കപ്പെടുന്നത്. ദൈവത്തെ അന്വേഷിക്കുന്നവർക്ക് അനുയോജ്യമായ ഒരിടം വേണ്ടതിനാലാണ് തുണിലും, തുരുമ്പിലും, എന്തിന് , സ്വന്തം സഹോദരനിൽ പോലുമോ, ഈശ്വരനെ കണ്ടെത്താനോ, ധ്യാനിക്കാനോ ഉള്ള ശേഷി, പലർക്കും ഉണ്ടാകണമെന്നില്ല. അവർക്കെല്ലാമുള്ള ഒരുക്ക സ്ഥലങ്ങളാണ്, ദേവാലയങ്ങളും, അമ്പലങ്ങളും പള്ളികളും. അനുകൂലമായ സാഹചര്യങ്ങളിലും, അനുയോജ്യമായ സ്ഥലങ്ങളിലും മാത്രമാകും, ചിലർക്ക് ഈശ്വരാന്വേഷണം സാധ്യമാകുക.

ആരും എല്ലായിടത്തും ഒരുപോലെയല്ല: ചിന്തയിലും പെരുമാറ്റത്തിലും. പുഞ്ചിരിക്കുന്നവൻ്റെ മുമ്പിൽ പുഞ്ചിരിച്ചും, ദേഷ്യപ്പെടുന്നവനോടു ദേഷ്യപ്പെട്ടും കഴിയുന്ന, ഒരു വികാരജീവിയാണു മനുഷ്യൻ. പുറം അകത്തെ ഭരിക്കുവാൻ തുടങ്ങിയാൽ പിന്നെ, അവന് സ്വയം നിയന്ത്രണാധികാരം നഷ്ടപ്പെട്ടു എന്നു വരാം.

നമ്മുടെ ഒരു പ്രതികരണവും നമ്മുടെ വ്യക്തിത്വത്തെ ഇല്ലാതാക്കുന്നതാകരുത്. സൃഷ്ടാവിനും സൃഷ്ടിക്കും ഒരുപോലെ വിരുന്നു വരാനും, വസിക്കാനും സാധിക്കും വിധം വിശാലവും ശ്രേഷ്ടവുമായിരിക്കണം നമ്മുടെ ഹൃദയങ്ങൾ. നമ്മുടെ വിചാരങ്ങളും പ്രവൃത്തികളും അതിന് അനുയോജ്യവും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര