🌹 “ഇന്നത്തെ ചിന്താവിഷയം” 🌹 – 2024 | നവംബർ 27 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ദേഷ്യം നിയന്ത്രിക്കാൻ ആകട്ടെ
————————————————-

പലരേയും അപകടത്തിൽ ചാടിക്കുന്ന ഒരു വികാരമാണു ദേഷ്യം. ബന്ധങ്ങളിൽ വിടവു സൃഷ്ടിക്കാനും, പ്രതിഛായയ്ക്കു മങ്ങലേല്പിക്കാനും, അതു കാരണമാകും. ഒരാൾ മുഹമ്മദ് നബിയോടു ചോദിച്ചു: “എനിക്ക് ഉപദേശം നൽകുമോ?”
അദ്ദേഹം പ്രതിവചിച്ചു:
“ദേഷ്യപ്പെടാതിരിക്കുക”. ആഗതൻ പല തവണ ചോദ്യം ആവർത്തിച്ചിട്ടും അതേ മറുപടി തന്നെയാണു നബി ആവർത്തിച്ചത്.

വിശ്വാസികളുടെ സവിശേഷതയായി, ഖുറാൻ പറയുന്നത്:
” ദേഷ്യം കടിച്ചു പിടിക്കുന്നവരും, മറ്റുള്ളവരോടു വിട്ടുവീഴ്ച ചെയ്യുന്നവരുമാണ് വിശ്വാസികൾ”, എന്നാണ്. പ്രവാചകൻ പറയുന്നു: മൽപ്പിടുത്തത്തിൽ ജയിക്കുന്നവനല്ല, ശക്തൻ. ദേഷ്യം വരുമ്പോൾ, സ്വയം നിയന്ത്രിക്കാനാകുന്നവനാണു ശക്തൻ!”
ദേഷ്യം ഒരാളുടെ പെരുമാറ്റത്തിലെ മാന്യത നശിപ്പിക്കും; ബന്ധങ്ങളിൽ വിള്ളലുണ്ടാക്കും; മനുഷ്യരെ സംഘട്ടനത്തിൽ ക്കൊണ്ടെത്തിക്കും.

ഒരിക്കൽ, പ്രവാചകനും, അനുചരനായ അനസും കൂടി ഒരു യാത്രയിലായിരുന്നു. ഒരാൾ പിന്നിലൂടെ വന്ന് പ്രവാചകൻ്റെ മേൽമുണ്ടു പിടിച്ചുവലിച്ചദ്ദേഹത്തെ നിർത്തി. എന്നിട്ടയാൾ ബഹളം വച്ചു കൊണ്ടു പറഞ്ഞു: “മുഹമ്മദെ, നിൻ്റെ കയ്യിലുള്ള സമ്പത്തിൽ നിന്നും, അല്പം എനിക്കു തരാൻ പറയുക “. ദേഷ്യം കൊണ്ടു നിയന്ത്രണം നഷ്ടപ്പെടാമായിരുന്ന ആ സാഹചര്യത്തിലും, പ്രവാചകൻ അയാളെ നോക്കി പുഞ്ചിരിക്കുകയും, അയാൾക്കാവശ്യമുള്ളതു നൽകൂവെന്നു്ന്ന് , അനസിനോട് , ആവശ്യപ്പെടുകയും മാത്രമാണു ചെയ്തത്.

ദേഷ്യം വരുമ്പോഴും സമചിത്തത കൈ വെടിയാതിരിക്കാനാകണം എന്ന തൻ്റെ ഉപദേശത്തിന് അടിവരയിടുവാനാണ് പ്രവാചകൻ തൻ്റെ പ്രവൃത്തിയിലൂടെ യത്നിച്ചത്. നമുക്കും അതിനാകട്ടെ..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര