🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 15 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

മികവിനു പിന്നിലെ സഹനം കാണാതിരിക്കരുത്
————————————————————————

കൊട്ടാര മണി ഉണ്ടാക്കുന്നതിനു വേണ്ടി, ശില്പി ചട്ടക്കുടു നിർമ്മിച്ചു. അതു കണ്ട രാജാവ് അതിശയിച്ചു. പിഴവൊന്നുമില്ലാത്ത ഭാവനയും ഘടനയും. അദ്ദേഹം ചോദിച്ചു:
“നിങ്ങൾ ഒരു അത്ഭുത ജീവിയോ മറ്റോ ആണോ. ഇതെങ്ങനെ സാധിച്ചു?”

ശില്പി പറഞ്ഞു: “ഞാനൊരു സാധാരണ തൊഴിലാളിയാണ്. എന്നാൽ, ജോലി തുടങ്ങുന്നതിനു മുമ്പു ഞാൻ ധ്യാനത്തിലായിരിക്കും. മൂന്നു ദിവസത്തെ ധ്യാനം കഴിയുമ്പോൾ മനസ്സു ശാന്തമാകും. അപ്പോൾ ഞാൻ പ്രതിഫലവും അംഗീകാരവും മറക്കും. അഞ്ചു ദിവസം കഴിയുമ്പോൾ, പ്രശസ്തിയേക്കുറിച്ചും, പഴി ചാരലിനേക്കുറിച്ചും ചിന്തിക്കാതാകും. പിന്നീട് ഏഴു ദിവസമാകുമ്പോൾ, ശരീരം പോലും മറന്ന് , പണിയാനുള്ള ചട്ടക്കൂടിനേക്കുറിച്ചു മാത്രം ചിന്തിക്കും. അപ്പോൾ ഞാൻ കാട്ടിലേക്കു നടന്ന്, ഈ ചട്ടക്കൂട് അതിൻ്റെ എല്ലാ പൂർണ്ണതയിലും ഒളിഞ്ഞു കിടക്കുന്ന ഒരു മരം കണ്ടെത്തും. പിന്നെ, സ്വയം മറന്നുള്ള ജോലിയാണ്. ഇതൊന്നും കാണാത്ത അങ്ങു പറയും: ഞാൻ ഒരു അത്ഭുത ജീവിയാണെന്ന് !”

‘മാസ്റ്റർ’ ഇല്ലാതാകുന്നിടത്താണു ‘മാസ്റ്റർപീസു’കൾ രൂപം കൊള്ളുക. നിർമ്മിതിയുടെ ചുവട്ടിൽ പതിക്കുന്ന വിരലടയാളമല്ല, കൈയ്യൊപ്പ് . നിർമ്മിതി തന്നെയാണത് ! തനതു മുദ്രയും മികവുമുള്ളവർക്ക് , അവസാനം പേരെഴുതി, സാക്ഷ്യം സ്ഥാപിക്കേണ്ടി വരില്ല. തനതു മികവുളളവർ, പ്രയത്നം കൊണ്ടും, പ്രത്യേകതകൾ കൊണ്ടും, പേരിനപ്പുറം പ്രശസ്തരാകും.

സംവിധായകനേക്കാൾ സിനിമയും, എഴുത്തുകാരനേക്കാൾ നോവലും,
ശിൽപിയേക്കാൾ ശില്പവും, പ്രശസ്തമാകുന്നുണ്ടെങ്കിൽ അതിനർത്ഥം:
കഴിവു കൊണ്ടും, കഠിനാദ്ധ്വാനം കൊണ്ടും, അത്ഭുതം സൃഷ്ടിക്കുവാൻ കഴിവുള്ള സാധാരണക്കാർ, ഇപ്പോഴും ശേഷിക്കുന്നുണ്ട് എന്നാണ് ! എല്ലാ ഉത്കൃഷ്ട സ്കഷ്ടികൾക്കും പുറകിൽ, ആരും തിരിച്ചറിയാത്ത മൗനവും മനനവും, പ്രയത്നവും സഹനവും ഉണ്ടായിരിക്കും.

പ്രതിഭകളെ കാണുമ്പോൾ, അവരുടെ കിരീടങ്ങളെക്കുറിച്ചു മാത്രമല്ല, അദ്ധ്വാനങ്ങളെക്കുറിച്ചു കൂടി അന്വേഷിക്കണം. വിജയാഘോഷങ്ങളെക്കുറിച്ചു മാത്രമല്ല, പരാജയ നിമിഷങ്ങളിലെ, കണ്ണീരിനെകുറിച്ചു കൂടി അറിയണം. ആരും ഒരു രാത്രി കൊണ്ടു ശ്രേഷ്ഠരായവരല്ല. എല്ലാവർക്കും തങ്ങൾ അനുഭവിച്ച, സമാനതകളില്ലാത്ത സങ്കടങ്ങളെക്കുറിച്ചും, സഹനങ്ങളെക്കുറിച്ചും ഏറെ പറയാനുണ്ടാകും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര