👬👫കുട്ടീസ് കോർണർ 👬👫 (അമ്പത്തിയഞ്ചാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക്(A)മുല്ല തമാശ (B)പൊതു അറിവ്
(C)പദ്യം (D)പഴഞ്ചൊല്ലും കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടോ…😍

എന്ന് സ്വന്തം
ശങ്കരിയാന്റി.

👫A) ഹോജ മുല്ല തമാശ (13)

ഒരിയ്ക്കൽ മുല്ലാ ചങ്ങാതിയുമായി സംസാരിച്ചിരിക്കുകയായിരുന്നു; കുറേക്കഴിഞ്ഞപ്പോൾ ഇരുട്ടായി.
‘ഇരുട്ടായില്ലേ, ഒരു മെഴുകുതിരി കൊളുത്ത്‌, ചങ്ങാതീ,’ കൂട്ടുകാരൻ പറഞ്ഞു. ‘തന്റെ ഇടതുഭാഗത്ത്‌ ഒരു മെഴുകുതിരികിടപ്പുണ്ട്‌.’
‘ഈയിരുട്ടത്ത്‌ എന്റെ ഇടത്തും വലത്തും ഞാനെങ്ങനെയാടോ തിരിച്ചറിയുന്നത്‌!’ മുല്ലാ ക്ഷോഭിച്ചു.🤣

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കുറച്ച് പദങ്ങളുടെ വിപരീത പദങ്ങൾ കൂടി അറിഞ്ഞിരിയ്ക്കാം… ട്ടൊ.

വിപരീത പദങ്ങൾ

1)അർഹൻ x അനർഹൻ

2)അസാധു x സാധു

3)അനാഥ x സനാഥ

4)അസ്വസ്ഥം x സ്വസ്ഥം

5)അനുകൂലം x പ്രതികൂലം

6)അഘം x അനഘം

7)അനുഗ്രഹം x നിഗ്രഹം

8)അപരാധി x നിരപരാധി

9)അന്തം x അനന്തം

10)അബദ്ധം x സുബദ്ധം

📗📗

👫C) പണ്ടേ പ്രചാരത്തിലുള്ള പദ്യങ്ങൾ(24)

ഹായ് കുട്ടീസ്…!ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ, ആടിനെ കുറിച്ച് രസകരമായ ഒരു കവിതയാണ്‌ കുട്ടീസ്. 😍

ആട്

കാലും തലയും ഇറച്ചിയുമെല്ലാം
ഔഷധമെന്നൊരു ചൊല്ലുണ്ടത്രേ
പച്ചില പ്ലാവില പച്ചപ്പുല്ല്
പിണ്ണാക്കും കഞ്ഞിയും കുടിയ്ക്കുമതത്രേ
ആട്ടിൻ പാല് കുടിച്ചെന്നാലോ പല്ലിനും എല്ലിനും ബലമുണ്ടത്രേ
മൊത്തത്തിൽ ആളിവളൊരു കേമി
ഔഷധ ഗുണമുള്ള മൃഗമാണത്രെ.

👫D) പഴഞ്ചൊല്ലുകളും വ്യാഖ്യാനവും (17)

1) ചാഞ്ഞ മരത്തിൽ ഓടിക്കയറാം:

ദുർബലരായിട്ടുള്ളവരെ എളുപ്പം കീഴ് പ്പെടുത്താം എന്നതിനെ സൂചിപ്പിക്കുന്നു.

2) ചത്തകുഞ്ഞിൻറെ ജാതകം നോക്കണോ ?:

കഴിഞ്ഞുപോയ കാര്യത്തെക്കുറിച്ച് ആലോചിച്ചു സമയം കളയണ്ട എന്ന് സൂചിപ്പിക്കുന്നു

3) തല പോയ തെങ്ങിനെന്ത് കാറ്റും പെശറും.:

തല നഷ്ടപ്പെട്ടു കഴിഞ്ഞ (എല്ലാം നഷ്ടപ്പെട്ട) അവസ്ഥയിൽ പിന്നെന്തു പ്രശ്നം.

4) തന്നോളം വളർന്നാൽ തനിക്കൊപ്പം:

മക്കൾ മുതിർന്നുകഴിഞ്ഞാൽ പിന്നെ മാതാപിതാക്കൾ അവരെ തുല്യരായി കണക്കാക്കണം.

5) താങ്ങാനാളുണ്ടങ്കിലേ തളർച്ചയുളളൂ:

ഒരാൾ എത്ര കഠിനമായ അവസ്ഥയിലാണെങ്കിലും ആ സ്ഥിതി നേരിടാൻ താൻ ഒറ്റയ്ക്കേ ഉള്ളു എന്ന ബോദ്ധ്യമുണ്ടെങ്കിൽ തളരാതെ മുന്നേറും.
താങ്ങാൻ ആളുകളുണ്ടെങ്കിൽ ചെറിയ ഒരു പ്രശനത്തിൽപ്പെട്ടാലും തളർച്ച തോന്നും.

6) താഴ്ന്ന നിലത്തേ നീരോടൂ.:

വെള്ളം താഴ്ന്ന പ്രദേശങ്ങളിലേക്കേ ഒഴുകൂ എന്ന് പറയുന്ന ഈ ചൊല്ലിന്റെ സാരം വിനയം കൊണ്ട് താഴ്ന്ന് നിൽക്കുന്നവർക്കേ നന്മ വരൂ എന്നാണ്.

7) തീയിൽ കുരുത്തത് വെയിലത്ത് വാടുമോ ?:

കഠിനമായ പരീക്ഷകൾ നേരിട്ട് വളരുന്നവർ ചെറിയ പരീക്ഷകളിൽ തോൽക്കില്ല.

8) തീവെട്ടിക്കാരന് കണ്ണ് കണ്ടുകൂടാ.:

തീവെട്ടിയുടെ പ്രകാശം കൊണ്ട് അതേന്തിയ ആൾക്ക് കണ്ണ് മഞ്ഞളിച്ചു പോകുമെന്നതിനാൽ കാഴ്ച കുറവായിരിക്കും. ഒരു വസ്തു അടുത്തുണ്ടായിരുന്നിട്ടും അതു ആസ്വദിക്കാനാവാത്ത അവസ്ഥ.

9) തുള്ളൽക്കാരനെ എല്ലാവരുമറിയും, തുള്ളൽക്കാരനാരേയും അറിയില്ല:

കുഞ്ചൻ നമ്പ്യാരുടെ തുള്ളൽ എന്ന കലാ പ്രസ്ഥാനവുമായി ബന്ധപ്പെട്ട് ഉരുത്തിരിഞ്ഞ ചൊല്ലാണിത്. മഹന്മാരെ എല്ലാരുമറിയും; പക്ഷെ മഹാന്മാർ എല്ലാവരേയും അറിഞ്ഞിരിക്കില്ല എന്നാണർഥമാക്കുന്നത്. വെളിച്ചപ്പാടിനെ എല്ലാവരുമറിയും എന്നാൽ വെളിച്ചപ്പാടിനാരേയുമറിയില്ല എന്നത് കൂടുതൽ പ്രചാരത്തിലുള്ള രൂപം.

10) തൂറാത്തച്ചി തൂറിയപ്പോൾ തീട്ടം കൊണ്ടാറാട്ട്:

എന്തെങ്കിലും ഒരു ശീലമോ പതിവോ ഇല്ലാതിരുന്നയാൾ അതു തുടങ്ങിക്കഴിയുമ്പോൾ അമിതമായി അത് ചെയ്യാൻ തുടങ്ങുക.

📗📗

👫E) എളുപ്പത്തിൽ ഒരു ചിത്രം വരയ്ക്കാം (39)

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖

👬👭👫👭👬👭👫👭👬👭