🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 01 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

സമാന അനുഭവങ്ങൾഉള്ളവർക്കാണ്
താങ്ങ് ആകാനാകുക
———————————————————-

ഭർത്താവിൻ്റെ മൃതദേഹത്തിനടുത്തിരുന്ന് വിലപിക്കുകയായിരുന്നു ഒരു യുവതി. ബന്ധുക്കളും സുഹുത്തുക്കളുമൊക്കെ എത്ര ആശ്വസിപ്പിപ്പാൻ ശ്രമിച്ചിട്ടും, അവരുടെ കരച്ചിലവസാനിപ്പിക്കുവാൻ സാധിച്ചില്ല. അപ്പാഴാണ് അപരിചിതയായ ഒരു സ്ത്രീ അവിടേക്കു വന്നത്. അവർ കരയുന്ന യുവതിയെ ചേർത്തുപിടിച്ചു കൊണ്ടു പറഞ്ഞു: ”എനിക്കു നിൻ്റെ സങ്കടം മനസ്സിലാക്കാനാകും. കാരണം, ഞാനുമൊരു വിധവയാണ് “. സാവധാനം അവർ ശാന്തയായി!

ഒരാളെ പൂർണ്ണമായും മനസ്സിലാക്കാൻ, അയാൾ തയ്യാറാകണം. കുറഞ്ഞപക്ഷം, അയാളുടെ അതേ അനുവങ്ങളിലുടെ കടന്നുപോകുകയങ്കിലും ചെയ്തിരിക്കണം.
കൈപൊള്ളിയ ആളിനെ സുഖപ്പെടുത്താൻ, മുമ്പുപൊള്ളലേറ്റിട്ടുണ്ടാവണമെന്നില്ല. ചികിത്സ അറിഞ്ഞാൽ മതി. എന്നാൽ, പൊള്ളലേറ്റവൻ്റെ നോവും നീറ്റലും അറിയണമെങ്കിൽ, ഒരു തവണയെങ്കിലും, പൊള്ളൽ ഏറ്റിട്ടുണ്ടായിരിക്കണം.

നഷ്ടപ്പെട്ടതൊന്നും തിരിച്ചുനൽകാൻ, ആരേക്കൊണ്ടും കഴിയില്ല. പക്ഷെ, ആത്മവിശ്വാസം നഷ്ടമാകുന്നില്ലെന്നു് ഉറപ്പു വരുത്താനെങ്കിലും ആകണം? അതിനു പൂർണമായും കഴിയുന്നത്, സമാന അനുഭവങ്ങളിലൂടെ യാത്ര ചെയ്തവർക്കാണ്.

ഏതു ദുരവസ്ഥയിലും, എല്ലാം തിരിച്ചു പിടിക്കാനുള്ള ഊർജ്ജം, അവശേഷിക്കണം. ഓരോ ഉയിർപ്പും ഓരോ സ്വകാര്യ പ്രക്രീയയാണ്. എന്നാൽ, സമാന അനുഭവങ്ങൾ ഉണ്ടായിട്ടുള്ളവർക്കു മാത്രമേ, അതിനുള്ള സഹായം പകർന്നു നൽകാനാകൂ.

കരച്ചിലുകളുണ്ടാകും; പക്ഷെ, കരകയറണം. കരച്ചിലാണ്, കരകയറ്റത്തിൻ്റെ ആദ്യപടി. ഉരുകിതീർന്ന് അവശേഷിക്കുന്നതിന് കാരിരുമ്പിൻ്റെ കരുത്തുണ്ടാകും. കൂടെക്കരയാനും, കൂടെ നിൽക്കാനും ഒരാളുണ്ടെങ്കിൽപ്പിന്നെ, ഉയിർത്തെഴുന്നേല്പ്പ്
ശീഘ്രമായിരിക്കും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര