👬👫കുട്ടീസ് കോർണർ 👬👫 (നാല്പത്തിയഞ്ചാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക് (A)കടം കഥകൾ (B)പൊതു അറിവ്
(C)പദ്യം (D)സ്റ്റാമ്പിന്റെ കഥ കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടല്ലൊ … ല്ലേ…?😍

എന്ന് സ്വന്തം
ശങ്കരിയാന്റി.

👫A) കടംകഥകൾ (8)

1)അപ്പംപോലെ തടിയുണ്ട്, അല്പം മാത്രം തലയുണ്ട്-

ആമ.

2)അപ്പാട്ടെ പട്ടിക്ക് നാക്കില്‍ പല്ല്-

ചിരവ.

3)അപ്പാട്ടുണ്ടൊരു കൊട്ടത്തേങ്ങ, തൂക്കിപ്പിടിക്കാന്‍ ഞെട്ടില്ല-

മുട്ട .

4)അടയ്ക്കും തുറക്കും മണിമുത്തില്‍ പത്തായം-

കണ്ണ്.

5)അടി മദ്ദളം, ഇല ചുക്കിരി, കായ കൊക്കിരി-

പുളിമരം.

6)അടിക്കു കൊടുത്താല്‍ മുടിക്കു കാണാം –

തെങ്ങ്.

7)അടിക്ക്‌വെട്ട്, നടുക്ക് കെട്ട് തലയ്ക്ക് ചവിട്ട്-

നെല്ല്.

8)അടയുടെയുളളിലൊരു പെരുമ്പട-

തേനീച്ചക്കൂട്.

9)അടുക്കള കോവിലില്‍ മൂന്ന് ദൈവങ്ങള്‍-

അടുപ്പ്.

10)അടിയില്‍ കിണ്ണം, നടുവില്‍ വടി, മേലെ കുട-

ചേന.

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

രസം – ചാറ്, അഭിരുചി, നാവ്

രാഗം – നിറം, ചുവപ്പ്, സ്നേഹം

വക്ത്രം – വായ്, മുഖം, ഒരുവൃത്തം

വക്രം – ചുരുണ്ട്, വളഞ്ഞ, കപടമായ

വചനം – സംഭാഷണം, വാക്യം, ഉപദേശം

വർഗ്ഗം – സമുദായം, പക്ഷം, അദ്ധ്യായം

വർണ്ണം – നിറം, ജാതി, അക്ഷരം, അലങ്കാരം

വർഷം – ആണ്ട്, മഴ, മേഘം

വഴി – പാത, ഉപായം, മതം

വാരി – ജലം, വാരുക, കമുകിന്റെയും മറ്റും തടി

📗📗

👫C) പണ്ടേ പ്രചാരത്തിലുള്ള പദ്യങ്ങൾ(14)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ എണ്ണത്തെ ക്കുറിച്ചൊരു കവിതയാണ്‌ കുട്ടീസ്. 😍

പത്തെണ്ണം

ഒന്നെന്നു ചൊല്ലുമ്പോള്
ഒരുമിച്ചു നില്ക്കണം

രണ്ടെന്നു ചൊല്ലുമ്പോള്
ഇരുകയ്യും പൊക്കണം

മൂന്നെന്ന് ചൊല്ലുമ്പോള്
മൂക്ക് പിടിക്കണം

നാലെന്നു ചൊല്ലുമ്പോള്
നാക്കൊന്ന് കാട്ടേണം

അഞ്ചെന്ന് ചൊല്ലുമ്പോള്
ബഞ്ചിലിരിക്കണം

ആറെന്നു ചൊല്ലുമ്പോള്
കൈകാൽ കുലുക്കണം

ഏഴെന്നു ചൊല്ലുമ്പോള്
എഴുന്നേറ്റു നില്ക്കണം

എട്ടെന്നു ചൊല്ലുമ്പോള്
പെട്ടെന്നിരിക്കണം

ഒൻപതെന്നു ചൊല്ലുമ്പോള്
ഒപ്പം ചിരിക്കണം

പത്തെന്ന് ചൊല്ലുമ്പോള്
പത്തു വട്ടം കൊട്ടണം.

👫D) സ്റ്റാമ്പിന്റെ കഥ (23)

സ്വാതിതിരുനാൾ രാമവർമ്മ

1988-ൽസ്വാതി തിരുനാളിന്റെ 175-മത് ജന്മവാർഷികത്തോടനുബന്ധിച്ച് ഇന്ത്യൻ പോസ്റ്റൽ ഡിപ്പാർട്ട്മെന്റ് 60 പൈസ മുഖവിലയുള്ള സ്റ്റാമ്പ് പുറത്തിറക്കി.

പത്തൊമ്പതാം നൂറ്റാണ്ടിൽ (1829-1846) തിരുവിതാംകൂർ ഭരിച്ചിരുന്ന രാജാവായിരുന്നു സ്വാതി തിരുനാൾ രാമവർമ്മ. ഗർഭശ്രീമാൻ, സംഗീതസാമ്രാട്ട്, ബഹുഭാഷാപണ്ഡിതൻ, പ്രജാക്ഷേമതൽപ്പരൻ തുടങ്ങിയ അപരനാമത്തിൽ അറിയപ്പെടുന്നു

സ്വാതി തിരുനാൾ രാമവർമ്മ സ്വാതി (ചോതി) നക്ഷത്രത്തിൽ ജനിച്ചതു കൊണ്ട് സ്വാതി തിരുനാൾ എന്ന പേര് ലഭിച്ചു. ഈ പേരിലാണ്‌ കൂടുതലായും അറിയപ്പെടുന്നത്.തിരുവിതാംകൂറിനെ ആധുനികീകരിക്കുന്നതിൽ പ്രധാന പങ്കു വഹിച്ച സ്വാതി തിരുനാൾ ഇംഗ്ലീഷ് പള്ളിക്കൂടങ്ങളും പെൺ പള്ളിക്കൂടങ്ങളും സ്ഥാപിച്ചു. അടിമക്കച്ചവടം പോലുള്ള പ്രാകൃത ഏർപ്പാടുകളും പല അന്ധവിശ്വാസങ്ങളും നിർത്തലാക്കിയ അദ്ദേഹം തികഞ്ഞ നവീകരണവാദി ആയിരുന്നിരിക്കണം. പക്ഷേ കൊളോണിയൽ നവീകരണത്തിന്റെ ഭാഗമായി ഇംഗ്ലീഷ് ഭാഷ പ്രചരിപ്പിക്കുന്നതിനൊപ്പംതന്നെ പ്രാദേശിക ഭാഷകളിൽ സംഗീതരചനകൾ നടത്തി പ്രതിരോധിക്കുവാനും സ്വാതി തിരുനാൾ പരിശ്രമിച്ചു. അതിനാൽത്തന്നെ പല ഭാഷകളിൽ അദ്ദേഹം രചിച്ച കൃതികൾ വിപ്ലവാത്മകമെന്ന് കരുതുവാനാകും. പ്രാകൃതമായ ശിക്ഷാരീതികളടക്കമുള്ള അനാചാരങ്ങൾ നിർത്തലാക്കിയ പ്രഗല്ഭനായിരുന്ന അദ്ദേഹം. തിരുവനന്തപുരത്തെ ഏറ്റവും പഴക്കം ചെന്ന സ്ഥാപനങ്ങൾക്ക് പിന്നിൽ സ്വാതിയുടെ തിരുനാളിന്റെ നേതൃത്വവുമാണ് ഉണ്ടായിരുന്നത്. തിരുവിതാംകൂർ സൈന്യത്തിന് നായർ പട്ടാളമെന്ന പേരു നൽകിയതും, മൃഗശാലയ്ക്ക് തുടക്കമിട്ടതും അദ്ദേഹമായിരുന്നു. വാനനിരീക്ഷണ കേന്ദ്രം, തിരുവനനതപുരം യൂണിവെർസിറ്റി കോളേജ്, ആദ്യ സർക്കാർ അംഗീക്രിത അച്ചടിശാല, കോടതി, നീതിനിർവഹണസമ്പ്രദായത്തിന്റെ അടിസ്ഥാനമായ തിരുവിതാംകൂർ കോഡ് ഓഫ് റെഗുലെഷൻസ്, ആദ്യ കാനേഷുമാരി കണക്കെടുപ്പ് തുടങ്ങിയവ അദ്ദേഹത്തിന്റെ ഭരണപരിഷ്കാരങ്ങളാണ്.

കേരള സംഗീതത്തിന്റെ ചക്രവർത്തി എന്ന അറിയപ്പെടുന്ന അദ്ദേഹം കേരളീയരാഗങ്ങളിലും താളങ്ങളിലും രചനകൾ നടത്തിയിട്ടുണ്ട്. മൂന്നൂറോളം രചനകൾ നടത്തിയതിൽ അൻപതോളം പദങ്ങൾ വിശിഷ്ട നിർമ്മിതികളായി നിലനിൽക്കുന്നുണ്ട്. ഭക്തിയും തത്വജ്ഞാനവും കൃതികളിലെ പൊതുവായ വിഷയം ആയി വരുമ്പോൾത്തന്നെ പദങ്ങളിൽ പ്രണയവും വിരഹവും ശൃംഗാരാസ്പദമായ ഭാവങ്ങളും നിറഞ്ഞു നിൽക്കുന്നു. വിരഹവേദനയിൽ നീറുന്ന പ്രണയിനിയുടെ നിർദ്ദയനായ കാമുകനോട് ഉപമിക്കുന്നത് ശ്രീ പദ്മനാഭനെത്തന്നെയും. പരിഭവവും സംഗമസുഖവും വർണിക്കുന്ന പദങ്ങൾക്കൊപ്പംതന്നെ വിശിഷ്ടപദഘടനയുമായി നിരവധി കീർത്തനങ്ങൾ. സ്വരാക്ഷര പ്രയോഗങ്ങളും അലങ്കാരങ്ങളുമായി സമ്പന്നമായ കൃതി വൈവിധ്യങ്ങളും എടുത്തുപറയേണ്ടിയിരിക്കുന്നു. ഒരു രാജാവ് എന്നതിനെക്കാൾ കേരളീയസംഗീതത്തെ അതിർത്തികൾ കടത്തുകയും മറ്റു സംഗീതവഴികളെ കേരളത്തിലേക്കാനയിക്കുകയും ചെയ്ത ഗാനചക്രവർത്തിയായിരുന്നു അദ്ദേഹം.

📗📗

👫E) എളുപ്പത്തിൽ ഒരു ചിത്രം വരയ്ക്കാം (29)

👬👭👫👭👬👭👫👭👬👭

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖
👬👭👫👭👬👭👫👭👬👭