📱വാർത്തകൾ ഒറ്റനോട്ടത്തിൽ📱 – 2024 | ഓഗസ്റ്റ് 18 | ഞായർ ✍ കപിൽ ശങ്കർ

🔹വനിതാ ഡോക്ടര്‍ ബലാത്സംഗത്തിരയായി കൊല്ലപ്പെട്ട സംഭവത്തില്‍ കൊല്‍ക്കത്തയില്‍ പ്രതിഷേധം ഇരമ്പുന്നു. രാത്രി വൈകിയും യുവാക്കള്‍ തെരുവില്‍ സമരം ചെയ്തതോടെ നഗരത്തില്‍ വന്‍ ഗതാഗത കുരുക്ക് അനുഭവപ്പെട്ടു. മെഡിക്കല്‍ വിദ്യാര്‍ത്ഥികള്‍ക്കൊപ്പം സംസ്ഥാനത്തിന് അകത്തു നിന്നും പുറത്തു നിന്നും യുവാക്കള്‍ സംഘടിച്ചെത്തി സമരം നടത്തി. കറുത്ത കൊടിയേന്തി മെഴുകുതിരി കത്തിച്ചാണ് പ്രതിഷേധം നടന്നത്. സ്ത്രീകളും കുട്ടികളുമടക്കം കുടുംബങ്ങള്‍ വരെ സമര രംഗത്തെത്തി. കൂടുതല്‍ പ്രതികളുടെ അറസ്റ്റ്, ആശുപത്രികളുടെ സംരക്ഷണം, പ്രതികള്‍ക്ക് തൂക്കുകയര്‍ തുടങ്ങിയ ആവശ്യങ്ങളുമായാണ് സമരം നടന്നത്. പൊലീസ് ആവശ്യാര്‍ത്ഥം രാത്രി 11.30 യോടെ സമരക്കാര്‍ പിരിഞ്ഞു. അതിനിടെ ആശുപത്രികളില്‍ വിമാനത്താവളത്തിന് സമാനമായ സുരക്ഷ പ്രോട്ടോക്കോള്‍ വേണമെന്ന് പ്രധാനമന്ത്രിക്ക് ഐഎംഎ കത്ത് നല്‍കി. ഡോക്ടര്‍മാര്‍ ഉന്നയിച്ച പ്രശ്നങ്ങള്‍ പഠിക്കാന്‍ കേന്ദ്രം സമിതിയെ നിയോഗിച്ചു.

🔹സാലറി ചലഞ്ചിലൂടെ വീണ്ടും നിര്‍ബന്ധപൂര്‍വം ശമ്പളം പിടിച്ചെടുക്കാനുള്ള നീക്കത്തെ ശക്തമായി നേരിടുമെന്ന് യു.ഡി.എഫ് അനുകൂല ജീവനക്കാരുടെ സംഘടനകളുടെ പൊതുവേദിയായ സ്റ്റേറ്റ് എംപ്ലോയീസ് ആന്‍ഡ് ടീച്ചേഴ്സ് ഓര്‍ഗനൈസേഷന്‍സ്. സമസ്ത വിഭാഗം ജീവനക്കാര്‍ക്കും അധ്യാപകര്‍ക്കും കഴിവിനൊത്ത് ശമ്പളം സംഭാവനയായി നല്‍കാനുള്ള അവസരമൊരുക്കണമെന്നും അഞ്ചുദിവസത്തില്‍ കുറയാത്ത തുക എന്ന ഉത്തരവിലെ ഭാഗം നീക്കം ചെയ്യണമെന്നും ഇപ്പോള്‍ പുറത്തിറക്കിയിട്ടുള്ള ഉത്തരവില്‍ ഭേദഗതി വരുത്തണമെന്നും സംഘടനയുടെ സംസ്ഥാന സമിതി അഭിപ്രായപ്പെട്ടു.

🔹ഓട്ടോറിക്ഷകള്‍ക്ക് സംസ്ഥാന പെര്‍മിറ്റ് അനുവദിച്ചതില്‍ എതിര്‍പ്പുമായി സിഐടിയു സംസ്ഥാന ഘടകം. തീരുമാനം പിന്‍വലിക്കണമെന്നാവശ്യപ്പെട്ട് സിഐടിയു സംസ്ഥാന നേതൃത്വം ഗതാഗത കമ്മീഷണര്‍ക്ക് കത്ത് നല്‍കി. സി ഐ ടി യു ഓട്ടോറിക്ഷ ഡ്രൈവേഴ്സ് യൂണിയന്റെ മാടായി ഏരിയ കമ്മിറ്റിയുടെ അപേക്ഷ പ്രകാരമാണ് സംസ്ഥാന ഗതാഗത അതോററ്റി തീരുമാനമെടുത്തത്. ഇതിപ്പോള്‍ സി ഐ ടി യു സംസ്ഥാന കമ്മിറ്റി തന്നെ പ്രതിഷേധവുമായി രംഗത്തെത്തിയതോടെ പെര്‍മിറ്റിന്റെ ഭാവി എന്താകും എന്നത് കണ്ടറിയേണ്ടി വരും.

🔹കാഫിര്‍ സ്‌ക്രീന്‍ ഷോട്ട് വിവാദം വീണ്ടും ആളികത്തുന്നു. ‘കാഫിര്‍’ സ്‌ക്രീന്‍ ഷോട്ട് ആദ്യമായി ഇടത് അനുകൂല വാട്സാപ് ഗ്രൂപ്പിലേക്ക് പോസ്റ്റ് ചെയ്തത് ഡി വൈ എഫ് ഐ വടകര ബ്ലോക്ക് പ്രസിഡന്റ് റിബേഷ് രാമകൃഷ്ണനാണെന്ന പൊലീസ് റിപ്പോര്‍ട്ട് യു ഡി എഫ് വലിയ തോതില്‍ സി പി എമ്മിനെതിരെ പ്രചരണായുധമാക്കിയിരുന്നു. ഈ പശ്ചാത്തലത്തില്‍ ഡി വൈ എഫ് ഐ വടകര ബ്ലോക്ക് കമ്മറ്റിയുടെ വിശദീകരണ യോഗം ഇന്ന് വടകരയില്‍ നടക്കും. അതേസമയം വ്യാജ സ്‌ക്രീന്‍ ഷോട്ട് പ്രചരിപ്പിച്ചവരെ പൊലീസ് സംരക്ഷിക്കുകയാണെന്ന് ആരോപിച്ച് യു ഡി എഫ് നാളെ എസ് പി ഓഫീസ് മാര്‍ച്ചും പ്രഖ്യാപിച്ചിട്ടുണ്ട്.

🔹കോഴിക്കോട് വടകര ബാങ്ക് ഓഫ് മഹാരാഷ്ട്ര ബ്രാഞ്ചിലെ പണയ സ്വര്‍ണ്ണ തട്ടിപ്പ് കേസിലെ പ്രതി മധു ജയകുമാര്‍ വീഡിയോ സന്ദേശം പുറത്ത് വിട്ടു. ചാത്തന്‍ കണ്ടത്തില്‍ ഫിനാന്‍സിയേഴ്സ് എന്ന ഗ്രൂപ്പിന് വേണ്ടിയാണ് സ്വര്‍ണം പണയപ്പെടുത്തിയതെന്നും ബാങ്കിന്റെ സോണല്‍ മനേജറുടെ നിര്‍ദ്ദേശ പ്രകാരമാണ് സ്വര്‍ണം പണയം വെച്ചതെന്നും വീഡിയോ സന്ദേശത്തില്‍ പറയുന്നു.

🔹ഇടതുസര്‍ക്കാര്‍ അധികാരത്തില്‍ വന്നശേഷം ഭിന്നശേഷി വിഭാഗത്തിലെ 1204 പേര്‍ക്ക് സ്‌കൂളുകളില്‍ നിയമനം നല്‍കിയതായി മന്ത്രി വി ശിവന്‍കുട്ടി. കോഴിക്കോട്, മലപ്പുറം, വയനാട്, കണ്ണൂര്‍, കാസര്‍കോട് ജില്ലകളിലെ വിദ്യാഭ്യാസ ഓഫീസുകളില്‍ 2023 ഡിസംബര്‍ 31 വരെ കെട്ടികിടക്കുന്ന ഫയലുകള്‍ തീര്‍പ്പാക്കുന്ന ഉത്തരമേഖല ഫയല്‍ അദാലത്ത് നടക്കാവ് ഗേള്‍സ് ഹയര്‍സെക്കന്‍ഡറി സ്‌കൂളില്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

🔹സംസ്ഥാനത്ത് ഇന്ന് കോട്ടയം, ഇടുക്കി, കോഴിക്കോട് ജില്ലകളില്‍ അതിശക്ത മഴ സാധ്യതയെന്ന് കേന്ദ്ര കാലാവസ്ഥ വകുപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, മലപ്പുറം, വയനാട്, കണ്ണൂര്‍, കാസറഗോഡ് ജില്ലകളില്‍ ഇന്ന് യെല്ലോ അലര്‍ട്ടും പ്രഖ്യാപിച്ചിട്ടുണ്ട്. നാളെ പത്തനംതിട്ട, എറണാകുളം ജില്ലകളിലും ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.

🔹ചെമ്പഴന്തി എസ് എന്‍ കോളേജിലെ അധ്യാപകനെതിരായ ആക്രമണത്തില്‍ 4 വിദ്യാര്‍ത്ഥികള്‍ക്കെതിരെ ജാമ്യമില്ലാ വകുപ്പ് പ്രകാരം കേസെടുത്തു. കഴക്കുട്ടം പൊലീസാണ് അധ്യാപകന്റെ പരാതിയില്‍ കേസെടുത്തത്. ഒരു ബൈക്കില്‍ 4 പേര്‍ കയറി കറങ്ങിയത് ചോദ്യം ചെയ്ത ഡോ.ബിജുവിനെയാണ് എസ്എഫ്ഐ പ്രവര്‍ത്തകര്‍ ആക്രമിച്ചത്.

🔹കൊല്ലം കുണ്ടറ പടപ്പക്കരയില്‍ വീട്ടമ്മയെ വീടിനുള്ളില്‍ മരിച്ച നിലയില്‍ കണ്ടെത്തി. കൊലപാതകമെന്നാണ് പൊലീസിന്റെ പ്രാഥമിക നിഗമനം. പടപ്പക്കര സ്വദേശി പുഷ്പലത (45)യെ ആണ് മരിച്ച നിലയില്‍ കണ്ടെത്തിയിരിക്കുന്നത്. പുഷ്പലതയുടെ മകന്‍ അഖിലിന് വേണ്ടി കുണ്ടറ പൊലീസ് അന്വേഷണം ആരംഭിച്ചിട്ടുണ്ട്.

🔹മൈസുരു ഭൂമി ഇടപാടിലെ അഴിമതിയുമായി ബന്ധപ്പെട്ട കേസില്‍ മുഖ്യമന്ത്രി സിദ്ധരാമയ്യയെ പ്രോസിക്യൂട്ട് ചെയ്യാന്‍ ഗവര്‍ണര്‍ അനുമതി നല്‍കിയ വിഷയത്തില്‍ പ്രതികരിച്ച് ഡി കെ ശിവകുമാര്‍ . സിദ്ധരാമയ്യക്കെതിരായ നടപടി ഗവര്‍ണറെ ഉപയോഗിച്ചുള്ള ബി ജെ പിയുടെ രാഷ്ട്രീയ നീക്കത്തിന്റെ ഭാഗമാണെന്ന് ശിവകുമാര്‍ പറഞ്ഞു. ഭരണഘടന വിരുദ്ധമായ ഈ നടപടിയിലൂടെ സര്‍ക്കാരിനെ അസ്ഥിരപ്പെടുത്താന്‍ കഴിയില്ലെന്നും സിദ്ധരാമയ്യ രാജിവയ്ക്കുമോ എന്ന ചോദ്യത്തിന് പ്രസക്തിയില്ലെന്നും പാര്‍ട്ടി അദ്ദേഹത്തിന് ഒപ്പം ശക്തമായി നിലകൊളളുമെന്നും ശിവകുമാര്‍ വ്യക്തമാക്കി.

🔹തൃശൂരില്‍ ബൈക്കും ബസും കൂട്ടിയിടിച്ചുണ്ടായ അപകടത്തില്‍ യുവാവ് മരിച്ചു. അന്തിക്കാട് പള്ളത്ത് രവി രാമചന്ദ്രന്‍ (38) ആണ് മരിച്ചത്. ശനിയാഴ്ച രാവിലെയാണ് അപകടമുണ്ടായത്. കാഞ്ഞാണി – അന്തിക്കാട് റോഡില്‍വച്ചായിരുന്നു അപകടം.രവി രാമചന്ദ്രന്‍ സഞ്ചരിച്ചിരുന്ന ബൈക്ക് ബസുമായി കൂട്ടിയിടിക്കുകയായിരുന്നു. ഇദ്ദേഹത്തെ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

🔹ട്രെയിന്‍ കേന്ദ്രീകരിച്ച് ഇലക്‌ട്രോണിക് ഉത്പന്നങ്ങള്‍ കവര്‍ച്ച നടത്തുന്ന ഇതര സംസ്ഥാന തൊഴിലാളി അറസ്റ്റില്‍. അസം സ്വദേശി മൈനുള്‍ ഹക്കിനെ കോട്ടയം റെയില്‍വേ പൊലീസാണ് പിടികൂടിയത്. ലഹരി ഉപയോഗിക്കുന്നതിനായി കൈയില്‍ സൂക്ഷിച്ച സിറിഞ്ച് അടക്കുള്ള വസ്തുക്കളും പ്രതിയില്‍ നിന്നും കണ്ടെടുത്തു.കഴിഞ്ഞ ഒന്നാം തീയതി പൂനെ കന്യാകുമാരി എക്‌സ്പ്രസില്‍ യാത്ര ചെയ്യുമ്പോഴാണ് തിരുവനന്തപുരം സ്വദേശിയുടെ ലാപ്‌ടോപ് കാണാതായത്. തുടര്‍ന്ന് നടന്ന അന്വേഷണത്തിലാണ് മൈനൂള്‍ ഹക്ക് പിടിയിലായത്. കോട്ടയത്തിനും, ചിങ്ങവത്തിനും ഇടയില്‍ കവര്‍ച്ച നടത്തിയ ശേഷം ഇയാള്‍ ചങ്ങനാശേരി റെയില്‍വേ സ്റ്റേഷനില്‍ ഇറങ്ങി രക്ഷപ്പെട്ടു. മോഷ്ടിച്ച ലാപ്‌ടോപ് പ്രതി പെരുമ്പാവൂരിലെ ഇലക്ട്രോണിക്‌സ് കടയില്‍ 5000 രൂപയ്ക്ക് വിറ്റു. ലാപ്‌ടോപ് ഓണായതായി ശാസ്ത്രീയ പരിശോധനയില്‍ കണ്ടെത്തിയ കോട്ടയം റെയില്‍വേ പൊലീസ് പ്രതിയെ തിരിച്ചറിഞ്ഞു. മറ്റൊരു മൊബൈല്‍ ഫോണ്‍ വില്‍ക്കാനെത്തിയപ്പോള്‍ ഇയാളെ കസ്റ്റഡിയിലെടുക്കുകയായിരുന്നു. 21കാരനായ പ്രതി ലഹരിയ്ക്ക് അടിമയാണ്. ലഹരി സാധനങ്ങള്‍ വാങ്ങുന്നതിനാണ് പ്രതി കവര്‍ച്ച നടത്തിയതെന്ന് പൊലീസ് വ്യക്തമാക്കി. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

🔹ചലച്ചിത്രോത്സവ
ങ്ങളില്‍ മികച്ച അഭിപ്രായം ഇതിനോടകം നേടിയ സൂരി നായകനാകുന്ന കൊട്ടുകാളി സിനിമയുടെ ട്രെയിലര്‍ റിലീസ് ചെയ്തു. അന്ന ബെന്നാണ് നായികയായി എത്തുന്നത്. സൂരി നായകനായി വേഷമിട്ട ചിത്രങ്ങളില്‍ ഒടുവില്‍ എത്തിയതും വന്‍ ഹിറ്റായതും ഗരുഡനാണ്. മലയാളത്തിന്റെ ഉണ്ണി മുകുന്ദനും കഥാപാത്രമായ ചിത്രത്തിന് ആഗോളതലത്തില്‍ നേടാനായത് ആകെ 60 കോടിയോളമാണ് എന്നാണ് റിപ്പോര്‍ട്ടുകള്‍ വ്യക്തമാക്കുന്നത്. പി എസ് വിനോദ് രാജാണ് സംവിധാനം നിര്‍വഹിക്കുന്നത്. കൊട്ടുകാളിയുടെ നിര്‍മാണം നടന്‍ ശിവകാര്‍ത്തികേയനാണ്. ചിത്രത്തിന്റെ ഛായാഗ്രാഹണം ബി ശക്തിവേലുമാണ് നിര്‍വഹിച്ചത്. ഓഗസ്റ്റ് 23ന് കൊട്ടുകാളി പ്രദര്‍ശനത്തിന് എത്തുമെന്നാണ് റിപ്പോര്‍ട്ട്.

തയ്യാറാക്കിയത്:
കപിൽ ശങ്കർ