🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 24 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ഒപ്പം നടക്കുന്നവൻ
——————————–

ഒരു തികഞ്ഞ ഈശ്വരവിശ്വാസിയായിരുന്നു, അയാൾ. ഒരു രാത്രിയിൽ, അയാൾ ഒരു സ്വപ്നം കണ്ടു. താൻ ഈശ്വരനുമായി ഒരു കരാർ ഉണ്ടാക്കിയെന്നും, അതിനാൽ ഈശ്വരൻ സദാ സമയം തൻ്റെ കൂടെയുണ്ടെന്നും! വളരെ ആത്മവിശ്വാസത്തോടെയായിരുന്നു പിന്നീടയാളുടെ നടത്തം. അയാൾ നടക്കുമ്പോൾ നാലു കാല്പാദങ്ങൾ നിലത്തു പതിഞ്ഞിരുന്നു; രണ്ടെണ്ണം അയാളുടേതും, രണ്ടെണ്ണം ഈശ്വരൻറേതും.

പെട്ടെന്നാണ് അടിക്കടി ദുരന്തങ്ങൾ അയാളെത്തേടിയെത്തിയത്. ആ സമയമെല്ലാം രണ്ടു കാലടികൾ മാത്രമേ നിലത്തു പതിഞ്ഞതായി അയാൾ കണ്ടുള്ളു.
അയാൾ ഉള്ളിലുറപ്പിച്ചു: “ഈശ്വരൻ കരാർ ലംഘിച്ചിരിക്കുന്നു!” പരിഭവത്തോടെയും നിരാശയോടെയും ഇരുന്ന അയാൾക്കു മുമ്പിൽ ഈശ്വരൻ പ്രത്യക്ഷപ്പെട്ടു പറഞ്ഞു:
“നീ കണ്ട രണ്ടു കാൽപ്പാദങ്ങൾ നിൻ്റേതല്ല, എൻ്റേതാണ്. നീ തളരാതിരിക്കാൻ ഞാൻ നിന്നെ തോളിലേറ്റി നടക്കുകയായിരുന്നു.

ഈശ്വരൻ സഹയാത്രികനായി നമ്മോടൊപ്പമുണ്ടെന്ന ബോധം, നമുക്കു തരുന്ന ആത്മവിശ്വാസം ചെറുതല്ല. അതിനൊപ്പം വരില്ലെങ്കിലും, യഥാർത്ഥ സൗഹൃദവും, സഹവർത്തിത്വവും പ്രദാനം ചെയ്യുന്ന മനുഷ്യർ നമ്മിൽ ജനിപ്പിക്കുന്ന
ആത്മധൈര്യവും, ഏറെ വിലമതിക്കപ്പെടണം. ആശ്രിതരെ സൃഷ്ടിക്കുകയല്ല, സൗഹൃദത്തിൻ്റെയും, സഹവർത്തിത്വത്തിൻ്റെയും ലക്ഷ്യം. സ്വാശ്രയത്വം നൽകുന്നവരെയും, ആപത്തുകളിൽ അത്താണിയായിരിക്കുന്നവരേയുമാണ് സുഹൃദ് വലയത്തിൽ ഉൾപ്പെടുത്തേണ്ടത്.

അങ്ങനെയുള്ളവരുടെ ബന്ധങ്ങളും, വർത്തനാശൈലികളും, ചോദ്യം ചെയ്യപ്പെടാനാവത്തതായിരിക്കും. പ്രതീക്ഷകൾക്കപ്പുറമായിരിക്കും, അവരുടെ പ്രതികരണ രീതികൾ. അപ്രതീക്ഷിതമായ ഇടപെടലുകളാൽ അവർ നമ്മെ അത്ഭുതപ്പെടുത്തും. നാം നിരാശയിലാകുമ്പോഴും, നിസ്സഹായരാകുമ്പോഴും, ഒപ്പം നിൽക്കാൻ കഴിവുള്ള, അത്തരം അത്യപൂർവ്വ സഹജീവികളാണ് നമ്മുടെ നിലനില്പ് ഉറപ്പു വരുന്നത്.

ആശങ്കകളും സന്ദേഹങ്ങളുമില്ലാതെ, ആശ്രയിക്കാൻ ഒരാളുണ്ടാകണം: അതു മനുഷ്യരായാലും, ദൈവമായാലും. എന്നാൽ,
“മനുഷ്യരിൽ ആശ്രയിക്കുന്നതിനേക്കാൾ, ദൈവത്തിൽ ആശ്രയിക്കുന്നതാണുത്തമം” എന്നാണ് ദൈവം തന്നെ നമുക്കു നൽകിയിരിക്കുന്ന ശുഭവചനങ്ങൾ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര