👬👫കുട്ടീസ് കോർണർ 👬👫 (നാല്പത്തിമൂന്നാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക്(A)കുസൃതി ചോദ്യങ്ങൾ (B)പൊതു അറിവ്
(C)പദ്യം (D)സ്റ്റാമ്പിന്റെ കഥ കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കിയോ…?😍

എന്ന് സ്വന്തം
ശങ്കരിയാന്റി.

👫A) കുസൃതി ചോദ്യങ്ങളും ഉത്തരവും (17)

1) ഏറ്റവും തണുപ്പുള്ള ഇംഗ്ലീഷ് ALPHABET ഏതു ?

B (AC യുടെ നടുക്കാണല്ലോ)

2) ഒന്‍പതില്‍ നിന്ന് ഒന്നുപോയാല്‍ 10 ആകുന്നതെപ്പോള്‍ ?

റോമൻ അക്കം IX ൽ നിന്ന് I മാറ്റുമ്പോൾ

3) മൂളിപ്പാട്ടും പാടി വന്നു തേന്‍ കുടിച്ചു പോകുന്ന ഇംഗ്ലീഷ് ALPHABET ഏതു?

B (bee)

4)കാലില്ല,തലയില്ല.കൈകള്‍ രണ്ട് .എന്താണ്?

ഷർട്ട്‌

5) ഒരുകുട്ടയില്‍ 14 മാമ്പഴമുണ്ട്. 14 കുട്ടികള്‍ക്ക് അത് ഓരോന്നുവീതം കൊടുക്കുകയും അവസാനം കുട്ടയില്‍ ഒന്ന് ബാക്കിയാവുകയും വേണം .അതെങ്ങനെ ?

അവസാനത്തെ ആൾക്ക് കുട്ടയോടെ കൊടുക്കുക

6) നാല് കാലും രണ്ടു കൈയും ഉണ്ടെങ്കിൽ കൂടി നടക്കാനോ പറക്കാനോ പറ്റാത്ത ഒന്ന് ?

കസേര

7) പച്ച കാണുമ്പോള്‍ നില്‍ക്കുകയും ചുകപ്പ് കാണുമ്പോള്‍ തുടരുകയും ചെയ്യുന്നതെപ്പോള്‍?

ട്രാഫിക് സീബ്ര ലൈനിലൂടെ നടക്കുമ്പോൾ

8) ജീവനില്ല,പക്ഷെ വിരലുകള്‍ അഞ്ചുണ്ട്.എന്ത് ?

കയ്യുറ

9) MARRIAGE ന് മുൻപ് DIVORCE സംഭവിക്കുന്നതെവിടെ?

ഡിഷ്ണറി യിൽ

10) 100 കിലോ ഉന്നത്തിനോ 100 കിലോ ഇരുമ്പിനോ കൂടുതല്‍ ഭാരമുണ്ടാവുക?

രണ്ടിനും സമം

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ച കളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

1)ധർമ്മം – പുണ്യം , ദാനം, ആചാരം

2)ധാത്രി – അമ്മ, ഭൂമി, നെല്ലി

3)ധൂമം – പുക, ആവി, മേഘം, മൂടൽ

4)നവം – ഒൻപത്, പുതിയത്, ആധുനികം

5)പക്ഷം – ചിറക്, പാർശ്വം, പകുതി

6)പടം – ചിത്രം, വസ്ത്രം , തിരശ്ശീല

7)പത്രം – ഇല, ചിറക്, വർത്തമാനപ്പത്രം

8)പദം – കാൽച്ചുവട്, വാക്ക്, അടയാളം

9)പാണി – കെ, ഒരുതാളം, കാലം

10)പാദം – കാല്, നാലിലൊന്ന്, പദ്യത്തിന്റെ ഒരുവരി

📗📗

👫C) പണ്ടേ പ്രചാരത്തിലുള്ള പദ്യങ്ങൾ (12)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ ആന യെ ക്കുറിച്ചൊരു കവിതയാണ്‌ കുട്ടീസ്. 😍

ആന

കറുത്തവളാ ഞാൻ
തടിച്ചവളാ ഞാൻ
കാണാൻ സുന്ദരിയാണ്
ഗമയിൽ നടന്നു വരുന്നത് കണ്ടാൽ
ആരും നോക്കി പോകും
ഉത്സവമേളം കേട്ടു തുടങ്ങാൻ
എന്നുടെ നടനം വേണം.

📗📗

👫D) സ്റ്റാമ്പിന്റെ കഥ (21)

സ്വാതിതിരുനാൾ രാമവർമ്മ

1988-ൽസ്വാതി തിരുനാളിന്റെ 175-മത് ജന്മവാർഷികത്തോടനുബന്ധിച്ച് ഇന്ത്യൻ പോസ്റ്റൽ ഡിപ്പാർട്ട്മെന്റ് 60 പൈസ മുഖവിലയുള്ള സ്റ്റാമ്പ് പുറത്തിറക്കി.

പത്തൊമ്പതാം നൂറ്റാണ്ടിൽ (1829-1846) തിരുവിതാംകൂർ ഭരിച്ചിരുന്ന രാജാവായിരുന്നു സ്വാതി തിരുനാൾ രാമവർമ്മ. ഗർഭശ്രീമാൻ, സംഗീതസാമ്രാട്ട്, ബഹുഭാഷാപണ്ഡിതൻ, പ്രജാക്ഷേമതൽപ്പരൻ തുടങ്ങിയ അപരനാമത്തിൽ അറിയപ്പെടുന്നു

സ്വാതി തിരുനാൾ രാമവർമ്മ സ്വാതി (ചോതി) നക്ഷത്രത്തിൽ ജനിച്ചതു കൊണ്ട് സ്വാതി തിരുനാൾ എന്ന പേര് ലഭിച്ചു. ഈ പേരിലാണ്‌ കൂടുതലായും അറിയപ്പെടുന്നത്.തിരുവിതാംകൂറിനെ ആധുനികീകരിക്കുന്നതിൽ പ്രധാന പങ്കു വഹിച്ച സ്വാതി തിരുനാൾ ഇംഗ്ലീഷ് പള്ളിക്കൂടങ്ങളും പെൺ പള്ളിക്കൂടങ്ങളും സ്ഥാപിച്ചു. അടിമക്കച്ചവടം പോലുള്ള പ്രാകൃത ഏർപ്പാടുകളും പല അന്ധവിശ്വാസങ്ങളും നിർത്തലാക്കിയ അദ്ദേഹം തികഞ്ഞ നവീകരണവാദി ആയിരുന്നിരിക്കണം. പക്ഷേ കൊളോണിയൽ നവീകരണത്തിന്റെ ഭാഗമായി ഇംഗ്ലീഷ് ഭാഷ പ്രചരിപ്പിക്കുന്നതിനൊപ്പംതന്നെ പ്രാദേശിക ഭാഷകളിൽ സംഗീതരചനകൾ നടത്തി പ്രതിരോധിക്കുവാനും സ്വാതി തിരുനാൾ പരിശ്രമിച്ചു. അതിനാൽത്തന്നെ പല ഭാഷകളിൽ അദ്ദേഹം രചിച്ച കൃതികൾ വിപ്ലവാത്മകമെന്ന് കരുതുവാനാകും. പ്രാകൃതമായ ശിക്ഷാരീതികളടക്കമുള്ള അനാചാരങ്ങൾ നിർത്തലാക്കിയ പ്രഗല്ഭനായിരുന്ന അദ്ദേഹം. തിരുവനന്തപുരത്തെ ഏറ്റവും പഴക്കം ചെന്ന സ്ഥാപനങ്ങൾക്ക് പിന്നിൽ സ്വാതിയുടെ തിരുനാളിന്റെ നേതൃത്വവുമാണ് ഉണ്ടായിരുന്നത്. തിരുവിതാംകൂർ സൈന്യത്തിന് നായർ പട്ടാളമെന്ന പേരു നൽകിയതും, മൃഗശാലയ്ക്ക് തുടക്കമിട്ടതും അദ്ദേഹമായിരുന്നു. വാനനിരീക്ഷണ കേന്ദ്രം, തിരുവനനതപുരം യൂണിവെർസിറ്റി കോളേജ്, ആദ്യ സർക്കാർ അംഗീക്രിത അച്ചടിശാല, കോടതി, നീതിനിർവഹണസമ്പ്രദായത്തിന്റെ അടിസ്ഥാനമായ തിരുവിതാംകൂർ കോഡ് ഓഫ് റെഗുലെഷൻസ്, ആദ്യ കാനേഷുമാരി കണക്കെടുപ്പ് തുടങ്ങിയവ അദ്ദേഹത്തിന്റെ ഭരണപരിഷ്കാരങ്ങളാണ്.

കേരള സംഗീതത്തിന്റെ ചക്രവർത്തി എന്ന അറിയപ്പെടുന്ന അദ്ദേഹം കേരളീയരാഗങ്ങളിലും താളങ്ങളിലും രചനകൾ നടത്തിയിട്ടുണ്ട്. മൂന്നൂറോളം രചനകൾ നടത്തിയതിൽ അൻപതോളം പദങ്ങൾ വിശിഷ്ട നിർമ്മിതികളായി നിലനിൽക്കുന്നുണ്ട്. ഭക്തിയും തത്വജ്ഞാനവും കൃതികളിലെ പൊതുവായ വിഷയം ആയി വരുമ്പോൾത്തന്നെ പദങ്ങളിൽ പ്രണയവും വിരഹവും ശൃംഗാരാസ്പദമായ ഭാവങ്ങളും നിറഞ്ഞു നിൽക്കുന്നു. വിരഹവേദനയിൽ നീറുന്ന പ്രണയിനിയുടെ നിർദ്ദയനായ കാമുകനോട് ഉപമിക്കുന്നത് ശ്രീ പദ്മനാഭനെത്തന്നെയും. പരിഭവവും സംഗമസുഖവും വർണിക്കുന്ന പദങ്ങൾക്കൊപ്പംതന്നെ വിശിഷ്ടപദഘടനയുമായി നിരവധി കീർത്തനങ്ങൾ. സ്വരാക്ഷര പ്രയോഗങ്ങളും അലങ്കാരങ്ങളുമായി സമ്പന്നമായ കൃതി വൈവിധ്യങ്ങളും എടുത്തുപറയേണ്ടിയിരിക്കുന്നു. ഒരു രാജാവ് എന്നതിനെക്കാൾ കേരളീയസംഗീതത്തെ അതിർത്തികൾ കടത്തുകയും മറ്റു സംഗീതവഴികളെ കേരളത്തിലേക്കാനയിക്കുകയും ചെയ്ത ഗാനചക്രവർത്തിയായിരുന്നു അദ്ദേഹം.

📗📗

👫E) എളുപ്പത്തിൽ ഒരു ചിത്രം വരയ്ക്കാം (27)

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖
👬👭👫👭👬👭👫👭👬👭