🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് | 01 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

വിരുന്നിലും വിളമ്പിലും സൗഹൃദം വിരിയട്ടെ
—————————————————————–

കുറുക്കൻ കൊക്കിനെ വിരുന്നിനു ക്ഷണിച്ചു. നല്ല സൂപ്പുണ്ടാക്കി, പരന്ന പാത്രത്തിൽ വിളമ്പി. കുറുക്കൻ വളരെപ്പെട്ടെന്നു കുടിച്ചു തീർത്തുവെങ്കിലും, കൊക്കിന് ഒരു തുള്ളി പോലും കുടിക്കാനായില്ല. കൊക്ക് പകരം വീട്ടാൻ തീരുമാനിച്ചു. ഒരു ദിവസമതു കുറുക്കനെ അത്താഴത്തിനു ക്ഷണിച്ചു. നല്ല സൂപ്പുണ്ടാക്കി, വായ് വട്ടം കുറഞ്ഞ പാത്രത്തിൽ വിളമ്പി. കൊക്ക് പെട്ടെന്നു സൂപ്പു കുടിച്ചു തീർത്തു. പക്ഷെ, കുറുക്കനതു മണത്തു നോക്കാനേ കഴിഞ്ഞുള്ളു.

കർമ്മങ്ങളുടെ നന്മ, അവ ചെയ്യുന്നവരുടെ മനസ്സിൻ്റെ നന്മയാണ്. പരിഹാസത്തിനും പ്രതികാരത്തിനും വേണ്ടി, സത്കർമ്മങ്ങളെ ഉപയോഗിക്കുമ്പോൾ നഷ്ടമാകുന്നത് അവ ചെയ്യുന്നവരുടെ മനസ്സിൻ്റെ നന്മയാണു്. അനുചിതമായി വിളമ്പുന്ന ഭക്ഷണത്തേക്കാൾ അപമാനം മറ്റൊന്നിനുമില്ല. യാചകനു നൽകുന്ന ഭക്ഷണപ്പാത്രത്തിൻ്റെ ദൈന്യം കണ്ടിട്ടും, അയാൾ അതു നിഷേധിക്കാത്തത് നിവൃത്തികേടുകൊണ്ടു മാത്രമാണ് . വിശക്കുന്നവൻ്റെ മുമ്പിലെ മനുഷ്യത്വവും, വിളിച്ചു വരുത്തിയവൻ്റെ മുന്നിലെ വിനയവുമാണ് വിളമ്പുന്ന ഭക്ഷണത്തെ വിശിഷ്ഠമാക്കുന്നത്.

കടമ നിറവേറ്റാൻ വേണ്ടി മാത്രം ചെയ്യുന്ന കർമ്മങ്ങൾ അർത്ഥരഹിതമാണ്‌. ആചാരത്തിനും ഔപചാരികതയ്ക്കും വേണ്ടി മാത്രം നടത്തുന്ന ചടങ്ങുകളും അവയിലെ പങ്കാളിത്തവും കപടനാടകങ്ങളും.

സമ്പ്രദായങ്ങൾ പുലർത്താൻ വേണ്ടിയും കാര്യസാദ്ധ്യത്തിനായും തുsരുന്ന ചെയ്തികൾ നിർത്തലാക്കിയാൽത്തന്നെ, സമൂഹം കുറച്ചു കൂടി സത്യസന്ധമാകും. ഓരോ കാര്യത്തിൻ്റെയും യഥാർത്ഥ ഉദ്ദേശ്യമെന്തോ, അതിനു വേണ്ടി മാത്രമാകട്ടെ അവ നിർവഹിക്കപ്പെടുന്നത്. മരുന്നു രോഗം മാറ്റുന്നതിനും, വിരുന്ന് ആഹ്ലാദത്തിനും വേണ്ടിയുമാണ്. അവിടെ പകപോക്കലിൻ്റെയോ, പ്രതികാരത്തിൻ്റെയോ നാമ്പുകൾ മുളയ്ക്കാതിരിക്കുന്നതാണ് ഉചിതം

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര