🌹 “ഇന്നത്തെ ചിന്താവിഷയം” 🌹 – 2024 | മെയ് 13 | തിങ്കൾ

മനസ്സിന്റെ തൃപ്തിയാണ്,യഥാർത്ഥ തൃപ്തി
——————————————————

ഒരിക്കലൊരു മാലാഖയ്ക്കു മനുഷരെ നേരിട്ടു പരിചയപ്പെടണമെന്നു തോന്നി. മാലാഖ ഭൂമിയിലെത്തിയപ്പോൾ കണ്ട ആദ്യമനുഷ്യനു തന്റെ ദിവ്യശക്തിയുപയോഗിച്ച്, ഒരു കല്ല് സ്വർണ്ണമാക്കി നൽകി. “ഒരു കല്ലു കൂടി സ്വർണ്ണമാക്കിത്തരുമോ” അയാൾ ചോദിച്ചു മാലാഖയൊന്നും മിണ്ടാതെ മുമ്പോട്ടു നീങ്ങി. മറ്റൊരു മനുഷ്യനെ കണ്ട മാലാഖ അയാൾക്കും ഒരു കല്ലു സ്വർണ്ണമാക്കി നൽകി. “എനിക്ക് ആ പാറക്കെട്ടു സ്വർണ്ണമാക്കി നൽകാമോ”അയാൾ ചോദിച്ചു. അവിടെ നിന്നും സ്ഥലം വിട്ട മാലാഖ, പിന്നിടു മറ്റൊരു മനുഷ്യനെ കണ്ട്, അയാൾക്കുമൊരു കല്ലു സ്വർണ്ണമാക്കി നൽകി. അയാളൊന്നും മിണ്ടിയില്ല. അയാൾ അത്യാഗ്രഹിയല്ലെന്നു കണ്ട്, ഒരു സ്വർണക്കല്ലു കൂടി മാലാഖ അയാൾക്കു നൽകി. അപ്പോളയാൾ ചോദിച്ചു “കല്ലു സ്വർണമാക്കുന്നയി വിദ്യ, എന്നേക്കൂടി പഠിപ്പിക്കാമോ”

സംതൃപ്തമല്ലാത്ത മനസ്സ് സമ്പാദ്യങ്ങൾ തേടി അലഞ്ഞു കൊണ്ടിരിക്കും. പുറത്തു നിന്നു ലഭിക്കുന്ന നേട്ടങ്ങളിലാണ്,ജീവിതത്തിന്റെ ഉള്ളടക്കമെന്നു തെറ്റിദ്ധരിക്കുന്നവർ ഒരിക്കലും സംതൃപതി നേടുകയില്ല.

മനസ്സു എന്തിലെങ്കിലും തൃപ്തമാകണം. എവിടെയെങ്കിലും സ്വസ്ഥമാകണം. ഒരാൾക്ക് ഒന്നിലും ഒരാനന്ദവും കണ്ടെത്താൻ ആകുന്നില്ലെങ്കിൽ ജീവിതത്തിലൊരിക്കലും അയാൾക്കു തൃപതി കണ്ടെത്താനാകില്ല. ആഗ്രഹങ്ങളുടെ അടിമകളായവർ അനഭിലഷണീയ വഴികളിലൂടെയായിരിക്കും സഞ്ചരിക്കുക.

സൗജന്യമായി വല്ലതും ലഭിക്കുന്നതിനേക്കാൾ നല്ലതു സ്വയം അദ്ധ്വാനിച്ചു നേടിയെടുക്കാൻ പഠിക്കുന്നതാണ്. ഉപജീവനത്തിനു വേണ്ടി അദ്ധ്വാനിക്കുന്നവരും, നാടു മുഴുവൻ സ്വന്തമാക്കാൻ വേണ്ടി ഇറങ്ങിത്തിരിക്കുന്നവരും തമ്മിൽ മനോഭാവത്തിലും ഉദ്ദേശ്യത്തിലേറെ വ്യത്യാസമുണ്ട്. വരം ലഭിച്ചവർക്കു പങ്കുവയ്ക്കാനുള്ള വകതിരിവു കൂടി ഉണ്ടാകുമ്പോഴാണ് വരം കൊണ്ടു വല്ല പ്രയോജനവുമുണ്ടാകുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍