🌹 “ഇന്നത്തെ ചിന്താവിഷയം” 🌹 – 2024 | നവംബർ 11 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

നാവിനെ നന്മയ്ക്കായി ഉപയോഗിക്കാം
——————————————————–

കൂട്ടുകാരൻ്റെ പെട്ടന്നുണ്ടായ മരണവാർത്ത അവൻ്റെ വീട്ടിലറിയിക്കുവാൻ പോയതായിരുന്നു, ആ യുവാവ്. കൂട്ടുകാരൻ്റെ അച്ഛനും അമ്മയും ഉമ്മറപ്പടിയിൽ നിൽപ്പുണ്ടായിരുന്നു. മകൻ്റെ സുഹൃത്തിനെ കണ്ടപ്പോൾ, അവർക്ക് ഏറെ സന്തോഷമായി. വളരെ വേഗം, അവർ അവനു വേണ്ടി വിരുന്നൊരുക്കി. മകനു കൊടുക്കാനുള്ള മധുര പലഹാരങ്ങൾ പൊതിഞ്ഞുകെട്ടി, അവനെ ഏല്പിച്ചു. അവനാകെ ആശയക്കുഴപ്പത്തിലായി. മകൻ്റെ മരണ വാർത്ത അവരെ അറിയിക്കണമോ, വേണ്ടയോ? ഒടുവിൽ അവനതു പറഞ്ഞൊപ്പിച്ചു!

എല്ലാം, എപ്പോഴും അറിയാനും അറിയിക്കാനും ശ്രമിക്കരുത്. എല്ലാ വിവരങ്ങളും, എപ്പോഴും, പ്രചോദനാത്മകമായിരിക്കണമെന്നില്ല. മുൻകൂട്ടി ലഭിക്കുന്ന വാർത്തകൾ, മുൻകരുതലിനുപകരിക്കുമെങ്കിലും, അവ പലപ്പോഴും, മുൻവിധികളിലേക്കായിരിക്കും നയിക്കുക. പറയുന്നവർക്കും കേൾക്കുന്നവർക്കും ഉപകാരമില്ലാത്ത കാര്യങ്ങൾ, പറയാതിരിക്കുന്നതാണ് ഉത്തമം. അവ പലപ്പോഴും ഈർഷ്യയുടെയും, കലഹങ്ങളുടെയും, കാരണമായി ഭവിച്ചേക്കാം.

നാവിൻ്റെ വകതിരിവാണ് കാതിന് ഇമ്പം നൽകുക. എല്ലാം എല്ലാവരോടും വിളിച്ചു പറയുവാൻ പാടില്ല. ഓരോന്നും, അതറിയണ്ടവരിൽ മാത്രം ഒതുക്കി നിർത്താൻ കഴിയുന്നവരാണു വിവേകികൾ.

അത്യാഹിതത്തിൽ അകപ്പെട്ടവരുടെ മുമ്പിലിരുന്ന് സ്വന്തം സുഖാനുഭവങ്ങളുടെ കെട്ടഴിക്കരുത്. പറയുന്ന വാർത്തകളുടെ വിശ്വാസ്യത മാത്രമല്ല, കേൾക്കുന്നവരുടെ സ്വീകരണ ശേഷിയും കണക്കിലെടുക്കണം. ചില കാര്യങ്ങൾ അറിയുന്നതിനേക്കാൾ, അറിയാതിരിക്കുന്നതായിരിക്കും നല്ലത്.
നവിനെ നന്മയ്ക്കു വേണ്ടി മാത്രമായി ഉപയോഗിക്കാനാകട്ടെ..

സർവ്വജ്ഞൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര