🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 14 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

അപവാദങ്ങളെ അതിജീവിക്കാൻ ആകട്ടെ
——————————————————————–

ഒരു ദമ്പതികൾ അവരുടെ മക്കളേയും കൂട്ടി വനാതിർത്തിയിലേക്കു വിനോദയാത്രയ്ക്കു പോയി. രാത്രിയായപ്പോൾ, ഇളയ കുഞ്ഞിനെ കാണാതായി. ബഹളം കേട്ടെത്തിയ ആളുകൾ അന്വേഷണം തുടങ്ങിയെങ്കിലും, തുമ്പൊന്നും കിട്ടാതായപ്പോൾ, കുഞ്ഞിനെ ചെന്നാ പിടിച്ചു കൊണ്ടു പോയി എന്ന നിഗമനത്തിൽ അവർ എത്തി. എന്നാൽ, ചിലർ, അത്രയും ഭാരമുള്ള കുഞ്ഞിനെ ചെന്നാ കൊണ്ടു പോകില്ല, അച്ഛനുമമ്മയും കൂടി കുഞ്ഞിനെ വകവരുത്തിയതാണെന്ന കിംവദന്തി പരത്തി. കോടതിയവരെ ജീവപര്യന്ത്യം ശിക്ഷിക്കു വിധിച്ചു. ഏറെ നാളുകൾക്കു ശേഷം വേട്ടയ്ക്കു പോയ ചിലർ, കുഞ്ഞിൻ്റെ ചോര പുരണ്ട ഉടുപ്പ് , വനത്തിനകത്തു കണ്ടെത്തി. കുഞ്ഞിനെ ചെന്നാ പിടിച്ചതാണെന്ന് അംഗീകരിച്ച കോടതി, അവരുടെ ശിക്ഷ ഇളവു ചെയ്യുകയും, മാപ്പു പറയുകയും ചെയ്തു. എങ്കിലും, ആ സംഭവത്തോടെ, ആ ദമ്പതികൾക്കു സംഭവിച്ച മാനഹാനിക്ക് പകരം ചെയ്യുവാൻ അവർക്കാകും കഴിഞ്ഞില്ല.

അടിസ്ഥാനമില്ലാത്ത ആരോപണങ്ങളുടെ ബലിയാടുകളായി, ആയുസ്സു മുഴുവൻ തള്ളി നീക്കേണ്ടി വരുന്നവർ അനേകരാണ്. ഏറ്റവും ക്രൂരമായ ഒരു വിനോദമാണ് ആൾക്കൂട്ട കുറ്റ വിചാരണ. തങ്ങൾ ഒരിക്കൽ പോലും കണ്ടിട്ടില്ലാത്ത കാര്യങ്ങളെക്കുറിച്ചു പോലും, ചിലർ ഏറെ ആധികാരികമായിത്തന്നെ സംസാരിച്ചു എന്നു വരെ വരും.

ദുഷ്പ്പേരു ചാർത്തി , ഒരാളെ അതിർത്തിക്കപ്പുറം നിറുത്താൻ വ്യഗ്രത കാട്ടുന്നവർ ഒന്ന് ഓർക്കണം: നഷ്ടപ്പെട്ടതെല്ലാം നൽകി, അവരെ തിരിച്ചു കൊണ്ട് വരുവാൻ അവർക്കൊരിക്കലും ആകുകയില്ലെന്ന കാര്യം. അങ്ങനെയുള്ളവർ നടക്കേണ്ടി വരുന്ന കനൽവഴികളിലൂടെ നടക്കുമ്പോൾ മാത്രമേ അതിനു കാരണക്കാരായവർ അറിയൂ, അവർ ചെയ്ത കൂരതയുടെ കാഠിന്യം.

എതിർ വാദങ്ങളുയർത്തി, ഒരു അപവാദത്തേയും, കീഴടക്കാനാകില്ല. അവിടെ നിശബ്ദരാകുകയാണ് ഏറ്റവും നല്ല പ്രതിരോധം. എന്നാൽ, കാലം അവരെ വിശുദ്ധരായി പ്രഖ്യാപിക്കും എന്നവർക്ക് ഉറച്ചു വിശ്വസിക്കാം. എല്ലാ ശബ്ദങ്ങളും എതിരാകുമ്പോൾ നിശബ്ദതയാകും, ഏറ്റവും നല്ല അതിജീവന ആയുധം. അങ്ങനെ മാത്രമേ അപവാദത്തെ അതിജീവിക്കാൻ ആകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര