ആന ചവിട്ടിക്കൊന്നൊരാൾരൂപമായ്
ആൾക്കൂട്ടത്തിൻ നടുവിൽ അയാൾ
കിടക്കവേ, വീണുകിട്ടിയൊരപ്പകഷ്ണം
ആഘോഷമാക്കി ചാനലുകൾ
പ്രാണന്റെ പകുതിയും മക്കളും
ഇടമുറിയാതെ
അലമുറയിടവേ
വെറുമൊരു മനുഷ്യനല്ലേ സാധാരണ
മനുഷ്യനല്ലേ എന്ന് വേണ്ടപ്പെട്ടവർക്ക്
പുച്ഛം
കഥയായ്, കവിതയായ്, പ്രസംഗമായ്
വിശപ്പറിയാത്ത മൃഗസ്നേഹികൾ
അരികൊമ്പനായ്
കണ്ണീർ വീഴ്ത്തവെ,
ഒട്ടിയ വയറും,
ഒഴിഞ്ഞ കലവും,
പുകയാത്ത അടുപ്പുമായ് ഒരമ്മയും
മക്കളും അച്ഛനെയോർത്ത്
വിതുമ്പുന്നത്
ഒരു മൃഗസ്നേഹിയും കണ്ടതുമില്ല
കേട്ടതുമില്ല.
കണ്ടതുമില്ല കേട്ടതുമില്ല (കവിത) ✍ സുജ പാറുകണ്ണിൽ
