🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 06 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

അപരൻ്റെ അന്തസ്സ് കാക്കാനാകട്ടെ
——————————————————-

ഒരു പ്രൈമറി ക്ലാസ്സ് മുറി. അജയ് സമർത്ഥനായ വിദ്യാർത്ഥിയായിരുന്നു. ഒരു ദിവസം അവനൊരബദ്ധം പറ്റി. അറിയാതെ അവൻ നിക്കറിൽ മൂത്രമൊഴിച്ചു. എഴുന്നേറ്റാൽ എല്ലാവരും കാണും, കളിയാക്കും. അവനാകെ വിഷമത്തിലായി. ഇതു മനസ്സിലാക്കി, അടുത്തിരുന്ന അവൻ്റെ കൂട്ടുകാരൻ അനു, അവൻ്റെ കയ്യിലുണ്ടായിരുന്ന വെള്ളത്തിൻ്റെ കുപ്പി തുറന്ന്, അജയയുടെ ദേഹത്തു കമഴ്ത്തി. ദേഹം മുഴുവൻ നനഞ്ഞ അവൻ, അവിടെ നിന്നും എഴുന്നേറ്റു. അനുവിന് ടീച്ചറിൻ്റെ ശകാരം കിട്ടിയെങ്കിലും, അജയയുടെ അഭിമാനം കാക്കാനായി.

ഒരാളുടെ അഭിമാനത്തേക്കാൾ, രക്ഷിക്കപ്പെടേണ്ടതായി മറ്റൊന്നുമില്ല. കാലങ്ങൾ കൊണ്ടു പണിതുയർത്തിയ സ്വാഭിമാനത്തിൻ്റെ ചില്ലുകൂടാരത്തിലാണ് ഓരോ ജീവിതവും അതിൻ്റെ സൗന്ദര്യവും സുരക്ഷിതത്വവും കാത്തു സൂക്ഷിക്കുന്നത്. അതു് തകരാൻ അനുവദിക്കരുത്. ഒരു നിമിഷം കൊണ്ടതു തകർക്കപ്പെട്ടാൽ, ഒരു ജന്മം കൊണ്ടു പോലും, അതു പുനർനിർമ്മിച്ചെടുക്കാനായെന്നു വരില്ല.

സമാന അനുഭവങ്ങൾ ഉണ്ടായവരിൽ നിന്നു മാത്രമേ, സഹാനുഭൂതിയും, സന്ദർഭോചിതമായ ഇടപെടലും ഉണ്ടാകൂ. അന്യൻ്റെ സങ്കടങ്ങളിൽ കണ്ണീരൊഴുക്കുന്നവരല്ല, അവരുടെ കണ്ണീരൊപ്പുന്നവരാണ് ക്രിയാത്മകമായി ഇടപെടുന്നത്.

ആത്മാഭിമാനവും, ആത്മവിശ്വാസവും നഷ്ടപ്പെട്ടവർക്കൊപ്പം നിൽക്കുന്നതാവും, ഒരാൾക്കു ചെയ്യാവുന്ന ഏറ്റവും വലിയ പുണ്യ പ്രവൃത്തി. അയൽക്കാരൻ്റെ അന്തസ്സു സംരക്ഷിക്കാൻ വേണ്ടി, സ്വന്തം തല അല്പമൊന്നു കുനിക്കാനാകുന്നതാകും, വിലമതിക്കാനാവാത്ത സൽപ്രവൃത്തി. സ്വന്തം അഭിമാനം സംരക്ഷിക്കുന്നവർ,
തൻകാര്യ പ്രസക്തർ; അപരൻ്റ യശസ്സ് ഉയത്തി നിർത്താൻ സഹായിക്കുന്നവർ, പൂണ്യാത്മാക്കൾ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര