📱വാർത്തകൾ ഒറ്റനോട്ടത്തിൽ📱 – 2024 | നവംബർ 19 | ചൊവ്വ ✍ കപിൽ ശങ്കർ

🔹യുഡിഎഫും എല്‍ഡിഎഫും പ്രഖ്യാപിച്ച ഹര്‍ത്താലില്‍ വയനാട് നിശ്ചലം. 12 മണിക്കൂര്‍ ഹര്‍ത്താലിന്റെ ഭാഗമായി പ്രതിഷേധക്കാര്‍ പലയിടത്തും വാഹനങ്ങള്‍ തടഞ്ഞു. ഹര്‍ത്താല്‍ ആണെന്ന് അറിയാതെ എത്തിയ നിരവധി യാത്രക്കാരാണ് അതിര്‍ത്തികളില്‍ കുടുങ്ങിയത്. രാവിലെ 6 മണി മുതല്‍ വൈകീട്ട് 6 മണി വരെയാണ് ഹര്‍ത്താല്‍. ചൂരല്‍മല മുണ്ടക്കൈ ഉരുള്‍പൊട്ടല്‍ ദുരന്തത്തിനോടനുബന്ധിച്ചുള്ള കേന്ദ്ര സംസ്ഥാന സര്‍ക്കാരുകളുടെ വീഴ്ചകള്‍ക്കെതിരെയാണ് യുഡിഎഫ് ഹര്‍ത്താല്‍ പ്രഖ്യാപിച്ചിരിക്കുന്നത്. എന്നാല്‍ അതിതീവ്ര ദുരന്തമായി പ്രഖ്യാപിക്കുന്നില്ലെന്നത് ഉള്‍പ്പെടെ ഉന്നയിച്ച് കേന്ദ്രത്തിനെതിരെയാണ് എല്‍ഡിഎഫ് ഹര്‍ത്താല്‍.

🔹ഐ.എസ്.ആര്‍.ഒ യുടെ അത്യാധുനിക വാര്‍ത്താ വിനിമയ ഉപഗ്രഹമായ ജിസാറ്റ് 20 വിജയകരമായി വിക്ഷേപിച്ചു. അമേരിക്കന്‍ ശതകോടീശ്വരനായ ഇലോണ്‍ മസ്‌കിന്റെ ഉടമസ്ഥതയിലുള്ള സ്വകാര്യ ബഹിരാകാശ കമ്പനിയായ സ്പേസ് എക്‌സിന്റെ ഫാല്‍ക്കണ്‍ 9 റോക്കറ്റ് ഉപയോഗിച്ചാണ് ജിസാറ്റ് 20 വിക്ഷേപിച്ചത്. ഫ്‌ളോറിഡയിലെ കേപ് കനാവറലിലുള്ള സ്‌പേസ് കോംപ്ലക്‌സ് 40 ല്‍ നിന്ന് ഇന്ന് പുലര്‍ച്ചെ 12.01നായിരുന്നു വിക്ഷേപണം. ഉള്‍നാടുകളിലും ഒറ്റപ്പെട്ട പ്രദേശങ്ങളിലും അതിവേഗ ഇന്റര്‍നെറ്റ് എത്തിക്കുന്നതിനും യാത്രാവിമാനങ്ങളില്‍ ഇന്റര്‍നെറ്റും നല്‍കുന്നതിനും ജിസാറ്റ്-20 ഉപഗ്രഹം സഹായിക്കും. ആന്‍ഡമാന്‍ നിക്കോബാര്‍, ലക്ഷദ്വീപ്, എന്നിവിടങ്ങളിലും അതിവേഗ കണക്ടിവിറ്റി എത്തും.

🔹മുനമ്പം ഒരു നോവിന്‍ തീരമാകാതെ പരിഹരിക്കാന്‍ എല്ലാവരുടെയും ഉപേക്ഷയില്ലാത്ത പിന്തുണയുണ്ടാകുമെന്നത് തീര്‍ച്ചയാണെന്നും അതിന് മുന്നിട്ടിറങ്ങുകയെന്ന ബാധ്യത ഇനിയും വൈകാതെ സര്‍ക്കാര്‍ ഏറ്റെടുക്കണമെന്നും സാദിഖലി ശിഹാബ് തങ്ങള്‍. മുനമ്പം വിഷയത്തില്‍ ലത്തീന്‍ മെത്രാന്‍ സമിതിയുമായി നടത്തിയ ചര്‍ച്ചയ്ക്ക് ശേഷം പ്രതികരിക്കുകയായിരുന്നു പാണക്കാട് സാദിഖലി ശിഹാബ് തങ്ങള്‍. സര്‍ക്കാര്‍ ഇടപെട്ട് സമ്പൂര്‍ണ പരിഹാരമുണ്ടാകണമെന്ന യോജിച്ച തീരുമാനമാണ് ചര്‍ച്ചയിലുണ്ടായതെന്നും മതമൈത്രി സംരക്ഷിക്കപ്പെടണമെന്ന അഭിലാഷം യോഗത്തിലുടനീളം എല്ലാവരും ഒറ്റക്കെട്ടായി പ്രകടിപ്പിച്ചുവെന്നും പ്രശ്‌നം രമ്യമായി പരിഹരിക്കാന്‍ സാധിക്കുമെന്ന ശുഭാപ്തി വിശ്വാസത്തോടെയാണ് ചര്‍ച്ച കഴിഞ്ഞു പുറത്തിറങ്ങിയതെന്നും അദ്ദേഹം പറഞ്ഞു.

🔹പാലക്കാട് ഉപതെരഞ്ഞെടുപ്പിന്റെ പരസ്യപ്രചാരണം അവസാനിച്ചു. ഇന്ന് നിശബ്ദ പ്രചാരണം. നാളെ പാലക്കാടന്‍ ജനത തങ്ങളുടെ വിധിയെഴുതും. ഇന്നലെ വൈകിട്ട് നാലോടെ ബിജെപിയുടെയും യുഡിഎഫിന്റെയും എല്‍ഡിഎഫിന്റെയും റോഡ് ഷോ ആരംഭിച്ചു. സരിന് വേണ്ടി മന്ത്രി എംബി രാജേഷും ജില്ലാ സെക്രട്ടറിയും രാഹുല്‍ മാങ്കൂട്ടത്തിലിന് വേണ്ടി നടന്‍ രമേശ് പിഷാരടി, മുനവ്വറലി തങ്ങള്‍, സന്ദീപ് വാര്യര്‍, ഷാഫി പറമ്പിലുള്‍പ്പെടെയുള്ളവരും സി കൃഷ്ണകുമാറിന് വേണ്ടി കെ സുരേന്ദ്രന്‍, ശോഭാ സുരേന്ദ്രനുമുള്‍പ്പെടെയുള്ള നേതാക്കളും കൊട്ടിക്കലാശത്തിന് നേതൃത്വം നല്‍കി.

🔹പരസ്യ പ്രചാരണത്തിന്റെ സമയപരിധി അവസാനിച്ചതോടെ എല്ലാവരും മാതൃകാപെരുമാറ്റച്ചട്ടം കര്‍ശനമായി പാലിക്കണമെന്ന് ജില്ലാ തെരഞ്ഞെടുപ്പ് ഉദ്യോഗസ്ഥയായ പാലക്കാട് ജില്ലാ കളക്ടര്‍ ഡോ. എസ് ചിത്ര. നിശബ്ദ പ്രചാരണം മാത്രം അനുവദനീയമായ സമയപരിധിയില്‍ നിയമവിരുദ്ധമായി ആളുകള്‍ കൂട്ടം ചേരുകയോ പൊതുയോഗങ്ങള്‍ സംഘടിപ്പിക്കുകയോ ചെയ്യാന്‍ പാടില്ലെന്നും ഉച്ചഭാഷിണികള്‍ ഉപയോഗിക്കാനോ ജാഥകളും പ്രകടനങ്ങളും സംഘടിപ്പിക്കാനോ പാടില്ലെന്നും കളക്ടര്‍ വ്യക്തമാക്കി.

🔹പാലക്കാട് നിയമസഭ മണ്ഡലത്തിലേക്കുള്ള ഉപതിരഞ്ഞെടുപ്പിനോട് അനുബന്ധിച്ച് സ്വകാര്യമേഖലയിലെ ജീവനക്കാര്‍ക്കും തൊഴിലാളികള്‍ക്കും നവംബര്‍ 20ന് വേതനത്തോടു കൂടിയ അവധി പ്രഖ്യാപിച്ചിട്ടുള്ള സാഹചര്യത്തില്‍ എല്ലാ തൊഴിലുടമകളും തൊഴിലാളികള്‍ക്ക് വേതനത്തോടുകൂടിയ അവധി ഉറപ്പാക്കണമെന്ന് ലേബര്‍ കമ്മിഷണര്‍ സഫ്നാ നസറുദ്ദീന്‍ അറിയിച്ചു .സ്വന്തം ജില്ലക്ക് പുറത്ത് ജോലിയില്‍ ഏര്‍പ്പെട്ടിരിക്കുന്ന വോട്ടര്‍മാര്‍ക്ക് അവരവരുടെ പോളിംഗ് സ്റ്റേഷനില്‍ വോട്ട് രേഖപ്പെടുത്തുന്നതിന് വേതനത്തോടു കൂടിയ മതിയായ അവധി തൊഴിലുടമ ഉറപ്പാക്കണമെന്നും കമ്മിഷണര്‍ അറിയിച്ചു.

🔹പത്തനംതിട്ടയിലെ നഴ്‌സിംഗ് വിദ്യാര്‍ത്ഥിനി അമ്മുവിന്റെ മരണത്തില്‍ അന്വേഷണം നടത്താന്‍ ആരോഗ്യ വകുപ്പ് മന്ത്രി വീണാ ജോര്‍ജ് ആരോഗ്യ സര്‍വകലാശാലയ്ക്ക് നിര്‍ദേശം നല്‍കി. അമ്മു വീണു മരിച്ച ഹോസ്റ്റലിലെ സിസിടിവി ദൃശ്യങ്ങള്‍ പോലീസ് ഇതിനോടകം ശേഖരിച്ചിരുന്നു. ക്ലാസില്‍ നിന്ന് വന്നയുടന്‍ കെട്ടിടത്തിന്റെ മുകളില്‍ കയറി താഴേക്ക് ചാടിയെന്നാണ് ഹോസ്റ്റല്‍ വാര്‍ഡനടക്കം മൊഴി നല്‍കിയത്.ഇക്കഴിഞ്ഞ വെള്ളിയാഴ്ചയാണ് ചുട്ടിപ്പാറ കോളേജിലെ അവസാന വര്‍ഷ നഴ്സിംഗ് വിദ്യാര്‍ത്ഥിനി അമ്മു സജീവ് താഴെവെട്ടിപ്രത്തെ ഹോസ്റ്റല്‍ കെട്ടിടത്തിന്റെ മുകളില്‍ നിന്ന് വീണ് മരിക്കുന്നത്.

🔹ശബരിമലയില്‍ വെര്‍ച്വല്‍ ക്യൂവില്‍ ബുക്ക് ചെയ്യാതെ ദര്‍ശനത്തിനെത്തുന്ന അയ്യപ്പ ഭക്തര്‍ക്ക് തത്സമയ ഓണ്‍ലൈന്‍ ബുക്കിങ് സൗകര്യം ഒരുക്കിയതായി ദേവസ്വം ബോര്‍ഡ് അറിയിച്ചു. പമ്പയില്‍ മണപ്പുറം, എരുമേലി, വണ്ടിപ്പെരിയാര്‍ സത്രം എന്നിവിടങ്ങളിലാണ് തത്സമയ ഓണ്‍ലൈന്‍ ബുക്കിങ് സൗകര്യമുള്ളത്. ആധാര്‍ കാര്‍ഡുമായി ഈ കേന്ദ്രങ്ങളിലെത്തിയാല്‍ ഫോട്ടോ ഉള്‍പ്പടെ എടുത്ത് വെര്‍ച്ച്വല്‍ ക്യൂവിന്റെ അതേ നടപടിക്രമങ്ങളിലൂടെ ബുക്കിങ് നടത്തി ഭക്തരെ കയറ്റിവിടുകയാണ് ചെയ്യുക.

🔹കെഎസ്ആര്‍ടിസി ജീവനക്കാരുടെ ശമ്പള വിതരണവുമായി ബന്ധപ്പെട്ട് ടിഡിഎഫ് ഇന്നലെ നടത്തിയ സമരത്തെ തള്ളി ഗതാഗത മന്ത്രി കെബി ഗണേഷ് കുമാര്‍. ഇന്നലെ മുതല്‍ ശമ്പളം കൊടുക്കുമെന്ന് ടിഡിഎഫിന് അറിയാമായിരുന്നിട്ടം സമരം നടത്തിയെന്നും ഇത് തെറ്റായിപ്പോയെന്നും കെബി ഗണേഷ് കുമാര്‍ പറഞ്ഞു.

🔹തൊഴിലിടങ്ങളില്‍ സ്ത്രീ സൗഹൃദ അന്തരീക്ഷം അനിവാര്യമാണെന്ന് വനിതാ കമ്മീഷന്‍ അധ്യക്ഷ പി സതീദേവി. തൊഴില്‍ ഉടമകളും ബന്ധപ്പെട്ട അധികാരികളും, സര്‍ക്കാര്‍ സംവിധാനങ്ങളുമടക്കം തൊഴിലിടങ്ങള്‍ സ്ത്രീ സൗഹൃദമാണോ എന്ന പരിശോധന നടത്തേണ്ടതുണ്ട് എന്നാണ് കമ്മീഷന്‍ മുമ്പാകെ വരുന്ന പരാതികളുടെ ആധിക്യം ബോധ്യപ്പെടുത്തുന്നതെന്നും ചെയര്‍പേഴ്സണ്‍ വ്യക്തമാക്കി.

🔹ഇടുക്കിയില്‍ ചന്ദന കടത്തു സംഘത്തിലെ പ്രധാനികള്‍ പിടിയില്‍. നെടുംകണ്ടം സന്യാസിയോടയില്‍ ചന്ദന മരം ചെറു കഷ്ണങ്ങള്‍ ആക്കി വില്‍ക്കാന്‍ ശ്രമിച്ച സംഭവത്തിലെ തുടര്‍ അന്വേഷണത്തിലാണ് അഞ്ച് പേര്‍ പിടിയിലായത്. സംഭവത്തില്‍ 55 കിലോയോളം ചന്ദന കാതലും കണ്ടെത്തി. സന്യാസിയോടയിലെ ചന്ദന കേസില്‍ കുമളി ഫോറസ്റ്റ് റേഞ്ച് പ്രത്യേക അന്വേഷണ സംഘം തുടരന്വേഷണം നടത്തുന്നതിനിടെയാണ് ഒളിവില്‍ കഴിഞ്ഞിരുന്ന അഞ്ച് പ്രതികളും അറസ്റ്റിലായത്.

🔹ഇന്ത്യയിലെ ആദ്യത്തെ ഗ്ലോബല്‍ ക്യാപ്പബിലിറ്റി സെന്റര്‍ കൊച്ചിയില്‍. അമേരിക്ക ആസ്ഥാനമായി ഓയില്‍ ആന്റ് ഗ്യാസ് മേഖലയില്‍ പ്രവര്‍ത്തിക്കുന്ന ഏറ്റവും വലിയ ടെക്നോളജി ദാതാക്കളായ നാഷണല്‍ ഓയില്‍ വെല്‍ കമ്പനി ഇന്ത്യയിലെ ആദ്യത്തെ ഗ്ലോബല്‍ ക്യാപ്പബിലിറ്റി സെന്റര്‍ കേരളത്തില്‍ ആരംഭിച്ചതായി മന്ത്രി പി രാജീവാണ് അറിയിച്ചത്.

🔹കുന്നംകുളം പാറേമ്പാടത്ത് അയ്യപ്പഭക്തർ സഞ്ചരിച്ച മിനി ബസ് മറിഞ്ഞ് അപകടം.അപകടത്തിൽ രണ്ട് അയ്യപ്പഭക്തർക്ക് നിസാര പരുക്കേറ്റു. ഇന്ന് പുലർച്ചെ അഞ്ചരയോടെയാണ് അപകടമുണ്ടായത്. കർണാടക സ്വദേശികൾ സഞ്ചരിച്ച മിനി ബസാണ് അപകടത്തിൽപ്പെട്ടത്. പെരുമ്പിലാവ് ഭാഗത്തുനിന്നും ഗുരുവായൂർ ഭാഗത്തേക്ക് പോയിരുന്ന ബസാണ് അപകടത്തിൽപ്പെട്ടത്.അപകട സമയത്ത് മിനി ബസിൽ ഇരുപതോളം അയ്യപ്പഭക്തർ ഉണ്ടായിരുന്നു.

🔹കേരളത്തിലെ രാത്രികാല യാത്രകൾ ആകർഷകമാണ്. മിന്നിതിളങ്ങുന്ന പാലങ്ങളും മറ്റുമായി അക്ഷരാർത്ഥത്തിൽ കളർഫുൾ ആകുകയാണ് നമ്മുടെ വഴികൾ. തിരുവനന്തപുരം നഗരത്തിലെ ഇഎംഎസ് പാർക്ക് പാലം ഇനി വർണ വിസ്മയം ചൊരിയും. ദീപാലംകൃതമാക്കിയ പാലം ബുധനാഴ്ച (നവംബർ 20) പൊതുമരാമത് വകുപ്പ് മന്ത്രി പി എ മുഹമ്മദ് റിയാസ് ഉദ്ഘാടനം ചെയ്യും.
മുമ്പ് തിരുവനന്തപുരം ബേക്കറി ജംഗ്ഷൻ പാലവും രാത്രിയിൽ തിളങ്ങാൻ ആരംഭിച്ചിരുന്നു. ഇത് കാണാനായി മാത്രം നിരവധിയാളുകളാണ് എത്തുന്നത്.

🔹മംഗളൂരുവിൽ യുവതികൾ സ്വിമ്മിങ് പൂളിൽ മുങ്ങിമരിച്ച സംഭവത്തിൽ റിസോർട്ട് ഉടമയെയും മാനേജരെയും പൊലീസ് അറസ്റ്റ് ചെയ്തു. മരിച്ച യുവതികളുടെ കുടുംബം നൽകിയ പരാതിയുടെ അടിസ്ഥാനത്തിലാണ് പൊലീസ് നടപടി.
റിസോർട്ട് ഉടമ മനോഹർ പുത്രൻ, മാനേജർ ഭാരത് എന്നിവരാണ് അറസ്റ്റിലായത്. സംഭവത്തെ തുടർന്ന് റിസോർട്ടിന്റെ ലൈസൻസ് ഉള്ളാൾ മുൻസിപ്പാലിറ്റി റദ്ദാക്കി. ഐപിസി 106 സെക്ഷൻ ചുമത്തി റിസോർട്ട് ഉടമയ്ക്കും മാനേജർക്കും എതിരെ പൊലീസ് എഫ്ഐആർ രജിസ്റ്റർ ചെയ്തിട്ടുണ്ട്.
കഴിഞ്ഞ ദിവസമാണ് വാസ്കോ ബീച്ചിനടുത്തുള്ള റിസോർട്ടിൽ യുവതികൾ മുങ്ങിമരിച്ചത്.മൈസൂരു കുറുബഹള്ളി സ്വദേശിനി എം.ഡി.നിഷിത (21), കെആർ മൊഹല്ല സ്വദേശിനി എസ്.പാർവതി (20), ദേവരാജ മൊഹല്ല സ്വദേശിനി എൻ കീർത്തന (21) എന്നിവരാണ് മരിച്ചത്.ശനിയാഴ്‌ച വൈകിട്ടാണ് മൂന്ന് പേരും ഉള്ളാൾ ഉച്ചിലയിലെ റിസോർട്ടിൽ എത്തിയത്.
ഒരു വശത്ത് കൂടുതൽ ആഴമുള്ള പൂളിൽ ആണ് മൂവരും ഇറങ്ങിയത്. 6 അടിയോളം ആഴമുള്ള ഭാഗത്ത് ഒരാൾ മുങ്ങി തുടങ്ങിയപ്പോൾ മറ്റ് രണ്ട് പേരും രക്ഷിക്കാൻ ശ്രമിക്കുന്നതിനിടെ മൂവരും വെള്ളത്തിലേക്ക് താഴുകയായിരുന്നു എന്ന് കണ്ടെത്തിയിരുന്നു. അപകടത്തിൻ്റെ ദൃശ്യങ്ങൾ റിസോർട്ട് സിസി ടിവിയിൽ പതിഞ്ഞു. വെള്ളത്തിൽ ഇറങ്ങുന്നതിന് മുൻപ് യുവതികൾ ഫോൺ ക്യാമറയിൽ വിഡിയോ റെക്കോർഡ് ഓൺ ചെയ്‌ത്‌ വച്ചതായും കണ്ടെത്തിയിരുന്നു.

🔹മണിപ്പുരില്‍ സംഘര്‍ഷം തുടരുന്നതിനിടെ കൂടുതല്‍ കേന്ദ്രസേനയെ സംസ്ഥാനത്തേക്ക് അയച്ച് കേന്ദ്ര ആഭ്യന്തരമന്ത്രാലയം . അര്‍ധസൈനിക വിഭാഗങ്ങളില്‍ നിന്നുള്ള 5000 പേരെയാണ് കേന്ദ്രം മണിപ്പുരിലേക്ക് അയച്ചത്. സി.ആര്‍.പി.എഫില്‍ നിന്ന് 35 യൂണിറ്റും ബി.എസ്.എഫില്‍ നിന്ന് 15 യൂണിറ്റുമാണ് മണിപ്പുരിലേക്കെത്തുന്നത്. പോസ്റ്റ്‌മോര്‍ട്ടം റിപ്പോര്‍ട്ട് ലഭിക്കാതെ കൊല്ലപ്പെട്ട 10 കുക്കി യുവാക്കളുടെ സംസ്‌കാരം നടത്താന്‍ അനുവദിക്കില്ലെന്നാണ് കുക്കി സംഘടനകളുടെ നിലപാട്.

🔹മണിപ്പൂര്‍ പൊലീസില്‍ നിന്ന് 3 പ്രധാന കേസുകള്‍ ഏറ്റെടുത്ത് എന്‍ഐഎ. ദുരിതാശ്വാസ ക്യാമ്പില്‍ നിന്ന് എട്ട് മാസം പ്രായമുള്ള കുഞ്ഞുള്‍പ്പെടെ മൂന്ന് കുട്ടികളെയും മൂന്ന് സ്ത്രീകളെയും തട്ടിക്കൊണ്ടുപോയി കൊലപ്പെടുത്തിയ കേസ്, സിആര്‍പിഎഫ് ക്യാമ്പിന് നേരെ നടന്ന ആക്രമണം, മുഖ്യമന്ത്രിയുടെയും മന്ത്രിമാരടക്കം ജനപ്രതിനിധികളുടെയും വസതികള്‍ക്ക് നേരെ നടന്ന അക്രമവുമാണ് എന്‍ഐഎയുടെ അന്വേഷണ പരിധിയിലുള്ളത്. അമിത് ഷായുടെ നിര്‍ദ്ദേശപ്രകാരമാണ് നടപടി.

🔹ചെന്നൈ ആസ്ഥാനമായി പ്രവര്‍ത്തിക്കുന്ന ലോട്ടറി വ്യവസായി സാന്റിയാഗോ മാര്‍ട്ടിന്റെ വീട്ടിലും ഓഫീസുകളിലും കഴിഞ്ഞ ദിവസം നടത്തിയ റെയ്ഡിലെ നിര്‍ണായക വിവരങ്ങള്‍ പുറത്ത് വിട്ട് എന്‍ഫോഴ്സ്മെന്റ് ഡയറക്ടറേറ്റ്. റെയ്ഡില്‍ കണക്കില്‍പെടാത്ത 12.41 കോടി രൂപ കണ്ടെടുത്തുവെന്ന് ഇഡി അറിയിച്ചു. ഡിജിറ്റല്‍ ഉപകരണങ്ങളും നിര്‍ണായക രേഖകളും റെയ്ഡില്‍ പിടിച്ചെടുത്തു.വന്‍ തുക സമ്മാനം നേടിയ ടിക്കറ്റുകള്‍ വാങ്ങി കള്ളപ്പണം വെളുപ്പിച്ചുവെന്നും ഇത് ഖജനാവിന് കനത്ത നഷ്ടമുണ്ടാക്കിയതായും ഇഡി കണ്ടെത്തി.

🔹ഹൈദരാബാദില്‍ ഭക്ഷ്യസുരക്ഷാ വിഭാഗം നടത്തിയ പരിശോധനയില്‍ 19,000 ലേറെ ലിറ്റര്‍ ഗുണനിലവാരമില്ലാത്ത കുപ്പിവെള്ളം പിടിച്ചെടുത്തു. ഭക്ഷ്യ സുരക്ഷാ വിഭാഗം നിര്‍ദേശിക്കുന്ന മാനദണ്ഡങ്ങള്‍ പാലിക്കാതിരുന്നതിനെ തുടര്‍ന്നാണ് ഹൈദരാബാദില്‍ നിന്ന് ഗുണനിലവാരമില്ലാത്ത കുപ്പിവെള്ളം പിടിച്ചെടുത്തത്.

🔹തമിഴ്നാട് തൂത്തുക്കുടിയില്‍ പാപ്പാനെ അടക്കം രണ്ട് പേരെ ക്ഷേത്രത്തിലെ ആന ചവിട്ടിക്കൊന്നു. തിരുച്ചെന്തൂര്‍ സുബ്രഹ്‌മണിയന്‍ സ്വാമി ക്ഷേത്രത്തിലാണ് ദാരുണ സംഭവം ഉണ്ടായത്. പാപ്പാന്‍ ഉദയനും സഹായിയും ബന്ധുവും ആയ ശിശുപാലനുമാണ് മരിച്ചത്.

🔹വന്ദേഭാരത് ട്രെയിനില്‍ വിളമ്പിയ സാമ്പാറില്‍ പ്രാണികളെ കണ്ടെന്ന് പരാതി. വീഡിയോ സോഷ്യല്‍ മീഡിയയില്‍ വൈറലായതിന് പിന്നാലെ റെയില്‍വെ ഭക്ഷണ വിതരണക്കാരന് പിഴ ചുമത്തി. 50,000 രൂപയാണ് പിഴ ചുമത്തിയത്. ഫുഡ് സാമ്പിള്‍ ശേഖരിച്ചിട്ടുണ്ടെന്നും റിപ്പോര്‍ട്ടിന്റെ അടിസ്ഥാനത്തില്‍ തുടര്‍ നടപടികളെടുക്കുമെന്നും റെയില്‍വെ വ്യക്തമാക്കി.

🔹2025-ലെ ഫിഫ ക്ലബ് ലോകകപ്പിനായി ലോക ഫുട്ബോൾ സംഘടന ഒരുക്കുന്നത് ഒരു പുതിയ ട്രോഫിയാണ്. പരമ്പരാഗത സ്പോർട്സ് പുരസ്‌കാരങ്ങളിൽ നിന്ന് തികച്ചും വേറിട്ട ഒരു രൂപത്തിലുള്ള ഈ ട്രോഫി നിർമ്മിച്ചത് വിഖ്യാത അമേരിക്കൻ ആഡംബരം സ്വർണ്ണാഭരണ നിർമ്മാതാക്കളായ ടിഫാനി & കോ ആണ്‌.
ഗോളകൃതിയിൽ മനോഹരവും കൈയിൽ ഒതുങ്ങുന്നതുമായ ഈ ട്രോഫിയിൽ 24 കാരറ്റ് സ്വർണ്ണം പൂശിയിരിക്കുകയാണ് കൂടാതെ ലേസർ കൊത്തുപണികളിലൂടെ ഫുട്‌ബോളിൻ്റെ നീണ്ട പാരമ്പര്യത്തെ പ്രതിഫലിപ്പിക്കുന്ന വാചകങ്ങളും ചിത്രങ്ങളും ട്രോഫിയുടെ ഇരുവശത്തായി അവതരിപ്പിച്ചിരിക്കുന്നു.
ഫുട്ബോളിൻ്റെ ഭൂമിശാസ്ത്രപരവും സാംസ്കാരികവുമായ വൈവിധ്യത്തെ പ്രതീകാത്മകമായി ഒരു ലോക ഭൂപടത്തിലൂടെയും, 211 ഫിഫ അംഗ അസോസിയേഷനുകളുടെയും ആറ് കോൺഫെഡറേഷനുകളുടെയും പേരുകളും ട്രോഫിയിൽ പ്രദർശിപ്പിച്ചിട്ടുണ്ട്.
13 ഭാഷകളിലും ബ്രെയിലിയിലും ലിഖിതങ്ങൾ ഉൾപ്പെടുത്തിയിട്ടുണ്ട്. “ഈ ട്രോഫി ഉയർത്തുന്നവൻ ചരിത്രത്തിന്റെ ഭാഗമാകും എന്നും ട്രോഫിയിൽ ആലേഖനം ചെയ്തിട്ടുണ്ട്. ടൂർണമെൻ്റിൻ്റെ അടുത്ത 24 പതിപ്പുകളിലെ വിജയികളുടെ ചിഹ്നങ്ങൾ ലേസർ ആലേഖനം ചെയ്യാൻ മതിയായ ഇടവും ട്രോഫിയിലുണ്ട്.
ലോകമെമ്പാടുമുള്ള ക്ലബ്ബുകളെ പ്രചോദിപ്പിക്കുകയും അതേസമയം മുൻകാല ഇതിഹാസങ്ങളെ ആദരിക്കുകയും ചെയ്യുകയാണ് പുതിയ ട്രോഫി.

🔹ഷറഫുദ്ദീനും ഐശ്വര്യ ലക്ഷ്മിയും മുഖ്യ വേഷത്തിലെത്തുന്ന ഫാന്റസി കോമഡി ചിത്രം ‘ഹലോ മമ്മി’യുടെ ആനിമേറ്റഡ് പ്രൊമോ സോങ്ങ് പുറത്തിറങ്ങി. ‘സരിഗമ’യുടെ യുട്യൂബ് ചാനലിലൂടെ ‘ഗെറ്റ് മമ്മിഫൈഡ്’ എന്ന പേരില്‍ എത്തിയ സോങ്ങ് നടനും സോഷ്യല്‍ മീഡിയ ഇന്‍ഫ്ലുവന്‍സറുമായ ആദ്രി ജോയും യുട്യൂബ് സോങ്ങ് ക്രിയേറ്ററായ അശ്വിന്‍ റാമും ചേര്‍ന്നാണ് ഒരുക്കിയത്. നവാഗതനായ വൈശാഖ് എലന്‍സ് സംവിധാനം ചെയ്യുന്ന ചിത്രം നവംബര്‍ 21 മുതല്‍ തിയറ്ററുകളിലെത്തും. സണ്ണി ഹിന്ദുജ , അജു വര്‍ഗീസ്, ജഗദീഷ്, ജോണി ആന്റണി, ജോമോന്‍ ജ്യോതിര്‍, ബിന്ദു പണിക്കര്‍, അദ്രി ജോ, ശ്രുതി സുരേഷ്, ഗംഗാ മീരാ തുടങ്ങിയവരാണ് മറ്റ് അഭിനേതാക്കള്‍.

തയ്യാറാക്കിയത്:
കപിൽ ശങ്കർ