🌹 “ഇന്നത്തെ ചിന്താവിഷയം” 🌹 – 2025 | ജനുവരി 11 | ശനി ✍ പ്രൊഫസ്സർ എ.വി. ഇട്ടി മാവേലിക്കര

വെളിച്ചത്തിലേക്കായിരിക്കണം യാത്ര
——————————————————

ഒരു പൊട്ടക്കിണറ്റിൽ കുറെ തവളകൾ പാർത്തിരുന്നു. മുകളിലെ വെളിച്ചം അവർ കാണാറുണ്ടായിരുന്നു. അതിൽ കൗതുകം തോന്നിയ രണ്ടു തവളകൾ, കൂടെയുള്ളവ
രോടു ചോദിച്ചു: “ഞങ്ങൾ പുറത്തു കടന്നോട്ടെ?” എല്ലാവരും അതിനെ എതിർത്തു. അവർ പറഞ്ഞു: “ഇതു വരെ ഇവിടം വിട്ട് ആരും പുറത്തു പോയിട്ടില്ല. അതു നമ്മുടെ വർഗ്ഗത്തിനു ചീത്തപ്പേരുണ്ടാക്കും. മുകളിൽ ചെന്നാൽ, സൂര്യപ്രകാശമേറ്റു ചത്തുപോകും!”

എന്നാൽ, അതൊന്നും കാര്യമാക്കാതെ, അവർ മുകളിലേക്കു കയറാൻ തുടങ്ങി. പാതിവഴി എത്തിയപ്പോഴേക്കും അവർ തളർന്നു നിരാശരായിരുന്നു. തിരിച്ചു പോകാൻ തീരുമാനിച്ചു തിരിഞ്ഞു നോക്കിയപ്പോഴാണ് അവർക്കു മനസ്സിലായത്: അവർ താമസിച്ചിരുന്ന സ്ഥലം ഇരുട്ടിലാണെന്ന്‌. അവർ മുകളിലേക്കു തന്നെ യാത്ര തുടർന്നു. അവസാനം, മുകളിൽ എത്തുകയും ചെയ്തു.

തങ്ങൾ സഞ്ചരിച്ച വഴികളിലൂടെ മാത്രമേ പിൻഗാമികളും നടക്കാവൂ എന്നു ശാഠ്യം പിടിക്കുന്നവർ, തലമുറകളുടെ സാദ്ധ്യതയും ക്രീയാത്മകതയും നശിപ്പിക്കുകയാണ്. തങ്ങളെ ബന്ധിച്ചിരിക്കുന്ന ചങ്ങലകൾ ഭേദിക്കാൻ ശേഷിയില്ലാത്തതു കൊണ്ടാണ്, അഗ്രഹമുണ്ടായിട്ടും, പലരും ഒന്നുമാകാതെ പോകുന്നത്. ഒരാളുടെയും സ്വപ്ന സഞ്ചാരത്തിൻ്റെ ഭാഗമായില്ലെങ്കിലും, ആരുടെയും ആഗ്രഹങ്ങളെയും അഭിലാഷങ്ങളെയും തല്ലിക്കെടുത്താൻ നാം ഒരുമ്പടരുത്.

പാതി വഴിയിലാണ് പ്രലോഭനവും പ്രചോദനവും കണ്ടുമുട്ടുന്നത് ; തിരിച്ചു പോകാനുള്ള പ്രലോഭനവും, മുമ്പോട്ടു പോകാനുള്ള പ്രചോദനവും. തനതു വഴികൾ
രൂപപ്പെടുത്താൻ ഇറങ്ങിപ്പുറപ്പെട്ടാൽപ്പിന്നെ, മറ്റാരുടെയും താരാട്ടു പാട്ടിനായി, കാത്തു നിൽക്കരുത്. തൻ്റേടത്തോടെ, തടസ്സങ്ങൾ കണ്ടു തലകുനിക്കാതെ, തനിച്ചുള്ള ചുവടുവയ്പുകളുമായി, മുമ്പോട്ടു പോകുകയാണു വേണ്ടത്. അപ്പോൾ മാത്രമേ വെളിച്ചത്തിലേക്കു ചെന്നുചേരാനാകൂ.

പ്രലോഭനങ്ങൾ വരുന്നിടത്തേക്കു തിരിഞ്ഞു നോക്കിയാൽ മനസ്സിലാകും, അവിടം മുഴുവൻ അന്ധകാരാവൃതമാണെന്ന്‌. വെളിച്ചത്തിലേക്കുള്ള യാത്ര ആരംഭിച്ച ശേഷം, വീണ്ടും അന്ധകാരത്തിലേക്കു തിരിച്ചുപോകേണ്ടിവരുന്നതിനേക്കാൾ ഭേദം,
യാത്ര അരംഭിക്കാതിരിക്കുന്നതാണ്. നമ്മുടെ യാത്രകൾ എല്ലായ്പ്പോഴും, വെളിച്ചത്തിലേക്കായിരിക്കണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര