🌹 “ഇന്നത്തെ ചിന്താവിഷയം” 🌹 – 2024 | നവംബർ 18 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

അകത്തു നിന്നും പൂട്ടിയ വാതിൽ
നമുക്കു തന്നെ തുറക്കാനാകട്ടെ
———————————————————————————————–

നാസി ഭീകരതയുടെ കാലത്ത് , ഒരദ്ധ്യാപകൻ തടവിലാക്കപ്പെട്ടു. ഭാര്യയും മകളും എവിടെയാണെന്നു പോലും അറിവില്ല. മരണം സുനിശ്ചിതം. സ്വന്തം ഇഷ്ടപ്രകാരം ജീവിക്കാനാകുന്നില്ലെങ്കിൽ, സ്വന്ത ഇഷ്ടപ്രകാരം മരിക്കുകയെങ്കിലും വേണമെന്നദ്ദേഹം തീരുമാനിച്ചു.

ബ്ലേഡുപയോഗിച്ച് കൈത്തണ്ടയിലെ ഞരമ്പു മുറിക്കാനണദ്ദേഹം തീരുമാനിച്ചത്. മുറിയിൽ ഒട്ടും വെളിച്ചമില്ല. ഏറെ കഷ്ടപ്പെട്ട് മുറിയുടെ മുകളിലുള്ള കിളിവാതിൽ അദ്ദേഹം തുറന്നു. അതിലൂടെ നോക്കുമ്പോൾ അദ്ദേഹം കണ്ടത്, ശൈത്യം മാറി, വസന്തം വന്നതിനാൽ, പൂക്കൾ നിറഞ്ഞു നിന്നിരുന്ന ഒരു മൈതാനമാണ്.
നയനാനന്ദകരമായ ആ കാഴ്ച കണ്ടു മതിമറന്ന അയാൾ, ജീവിതമവസാനിപ്പിക്കാനുള്ള തൻ്റെ തീരുമാനം മാറ്റി. കയ്യിലിരുന്ന ബ്ലേഡ്, അയാൾ ആ കിളിവാതിലിലൂടെ വലിച്ചെറുഞ്ഞി ട്ട്, തൻ്റെ ഡയറിയിൽ ഇപ്രകാരം കുറിച്ചു: “ഇന്നാണ് എൻ്റെ ഉയിർപ്പിൻ്റെ ദിനം!”

ഋതുഭേദങ്ങൾ പ്രകൃതിയുടെ അലംഘനീയ നിയമമാണു്ണ്. ഒന്നിനും സ്ഥായിയായ ഭാവമില്ല എന്ന് തെളിവു സഹിതം പ്രകൃതി നമ്മെ
പഠിപ്പിക്കുന്ന അനുഭവം! എല്ലാം മാറിയേ മതിയാകൂ: അതു സന്തോഷമായാലും, സന്താപമായാലും. ഒരു ദുരനുഭവവും എല്ലാക്കാലത്തേക്കുമുള്ളതല്ല. പുനരാഖ്യാനത്തിനു പോലും സാധ്യത താരാതെ അവയെല്ലാം വിട പറയും. മാത്രവുമല്ല, ജീവൻ്റെ പുതുനാമ്പുകൾ പൊട്ടിമുളച്ചിട്ടുമുണ്ടാകും.

ദുരന്തഫലമായി, ഉള്ളിൽ പുകയുന്ന ദുർ വികാരങ്ങളും, വിചാരങ്ങളും, നല്ല ചിന്തകളെ താഴ്ത്തിക്കെട്ടി, തകർത്തു കളയരുത്. ഒറ്റക്കിരുന്നു വ്യാഖ്യാനിച്ചു വഷളാക്കുന്നില്ലെങ്കിൽ, ഒരു സംഭവത്തിൻ്റെ പേരിലും ആരും ഒരിക്കലും, ജീവിതം അവസാനപ്പിക്കില്ല. വീഴാതിരിക്കുന്നതല്ല, വീണിടത്തു നിന്നെഴുന്നേൽക്കുന്നതാണു വിജയം. കൊഴിഞ്ഞു വീഴുന്ന ഇലകൾ, നാശത്തിൻ്റെ സൂചനകളല്ല; മടങ്ങിവരവിൻ്റെ മുന്നൊരുക്കങ്ങളാണ്. തൊട്ടാവാടിക്കു പോലും, പുനർജീവന ശേഷിയുണ്ട് . എത്ര തവണ തളർന്നാലും, അവ താമസിയാതെ, പൂർവ്വസ്ഥിതിയെ പ്രാപിക്കും.

കീഴടങ്ങാൻ തയ്യാറാകാത്തവൻ്റെ മുമ്പിൽ, ഏതെങ്കിലും കിളിവാതിൽ തുറക്കപ്പെടുക തന്നെ ചെയ്യും. അപ്രതീക്ഷിതമായി അപകടങ്ങൾ മാത്രമല്ല, അത്ഭുതങ്ങളും സംഭവിക്കാം. അതു കാണണമെങ്കിൽ, അകത്തുനിന്നു പൂട്ടിയ വാതിൽ നാം തന്നെ തുറക്കണം എന്നു മാത്രം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര