🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 19 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ജീവിതത്തിൽ വ്യത്യസ്തത കാത്തു സൂക്ഷിക്കാൻ ഇടയാകട്ടെ
—————————————————————————————-

എങ്ങനെ മരിച്ചു എന്നതിനേക്കാൾ, എങ്ങനെ ജീവിച്ചു എന്നതാണു പ്രധാനം. ‘മരണശേഷവും ജീവിക്കുന്നവർ’, മരിച്ചതിലെ വ്യത്യസ്തത കൊണ്ടല്ല, ജീവിച്ചതിലെ വ്യത്യസ്തത കൊണ്ടാണ്, ആ സ്ഥാനത്തിന് അർഹരായത്. ജീവിച്ചിരിക്കുമ്പോൾ കർമ്മം കൊണ്ടു വ്യത്യസ്തരാകുന്നവർക്കു മാത്രമേ, മരണശേഷവും പ്രചോദനമായിരിക്കാൻ ആകൂ.

ജന്മം കൊണ്ട് എല്ലാവർക്കും വിഭിന്നരാകാൻ കഴിഞ്ഞെന്നു വരില്ല. പക്ഷെ, ജീവിതം കൊണ്ടതിനു സാധിക്കും. ജനനത്തിനും മരണത്തിനും ആരും ഉത്തരവാദികളല്ല.
ആകസ്മീകമായും, അനുവാദം ചോദിക്കാതെയും നടക്കുന്ന സംഭവങ്ങളാണവ. പക്ഷെ, ജീവിതത്തിന്നുത്തരവാദികൾ, അതു ജീവിച്ചു തീർക്കുന്നവർ മാത്രമാണ്.

ലക്ഷ്യമില്ലാത്ത പ്രവൃത്തികളാണ്, പ്രയോജനരഹിതമായ പ്രവർത്തനങ്ങൾക്കും,
ഫലപ്രാപ്തിയില്ലാത്ത കർമ്മങ്ങൾക്കും വഴിതെളിക്കുന്നത്. ശ്രദ്ധിക്കപ്പെടാൻ വേണ്ടിയും, പുതുമയ്ക്കു വേണ്ടിയും മാത്രം നടത്തുന്ന പ്രകടനങ്ങൾ ഫല രഹിതമായിരിക്കും. ആലോചിച്ചുണ്ടാക്കുന്ന വ്യത്യസ്ഥതയ്ക്ക് , ആഴമോ, ആയുസ്സോ ഉണ്ടാകുകയില്ല! അസാധാരണമായ ലക്ഷ്യങ്ങളും, വ്യതിരിക്തമായ പ്രവർത്തന ശൈലിയും ഉണ്ടെങ്കിൽ, വ്യത്യസ്തത താനെ രൂപപ്പെട്ടുകൊള്ളും.

അടവുകളും തന്ത്രങ്ങളുമല്ല, അപൂർവ്വവും, അനുകരണാർഹവും ആയ പ്രവർത്തനങ്ങളാണ്, വ്യതസ്തത രൂപപ്പെടുത്തുന്നത്. അവനവനിലുള്ള വിശ്വാസത്തിൻ്റെയും, സ്വന്തം സ്വപ്നങ്ങളോടുള്ള അഭിനിവേശത്തിൻ്റെയും വെളിപ്പെടുത്തലായിരിക്കും അത്.

മറ്റുള്ളവർ നടന്ന വഴികളിലൂടെ മാത്രം നടക്കുകയും, അവർ കണ്ട കാഴ്ചകൾ മാത്രം കാണുകയും ചെയ്യുന്നവർ, കേവലം സാധാരക്കാരായി മാത്രം അവസാനിക്കും. പേരെടുക്കാൻ വേണ്ടി ചെയ്യുന്ന പ്രവൃത്തികളെക്കാൾ, ഉദ്ദേശ്യശുദ്ധിയോടെ ചെയ്യുന്ന പ്രവൃത്തികളാകും, ഒരാൾക്കു പേരും പെരുമയും സമ്മാനിക്കുന്നത്.
സർവ്വശക്തൻ സഹായിക്കട്ടെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര