🌹 “ഇന്നത്തെ ചിന്താവിഷയം” 🌹 – 2024 | നവംബർ 09 | ശനി ✍ പ്രൊഫസ്സർ എ.വി. ഇട്ടി മാവേലിക്കര

സ്വന്തം ഒന്നുമില്ലായ്മ തിരിച്ചറിയാം
—————————————————

തൻ്റെ പൂവൻ കോഴി കൂകുന്നതു കൊണ്ടാണ് സൂര്യനുദിക്കുന്നതു്ത് എന്നായിരുന്നു ഒരു വയോധികയുടെ ചിന്ത. ഒരിക്കൽ അയൽക്കാരുമായി വഴക്കിട്ട അവർ, തൻ്റെ കോഴിയുമായി ദൂരെയൊരു ഗ്രാമത്തിലേക്കു പോയി. സന്ധ്യയ്ക്കവിടെ എത്തിയ അവർക്ക് പ്രഭാതം വിടർന്നപ്പോൾ സന്തോഷമായി. തൻ്റെ കോഴി കൂകിയതുകൊണ്ട് അവിടെയും സൂര്യൻ ഉദിച്ചിരിക്കുന്നു! തൻ്റെ പഴയ ഗ്രാമം ഇരുട്ടിലായിരിക്കുമെന്നവർ ചിന്തിച്ചു. തന്നെ വിളിച്ചു കൊണ്ടുപോകാൻ തൻ്റെ പഴയ ഗ്രാമവാസികൾ എത്തിച്ചേരും എന്നവർ കരുതി. ദിവസങ്ങൾ കാത്തിരുന്നിട്ടും അവരെ കാണാഞ്ഞതിനാൽ, അവരുടെ ഗർവിനെയും, ബുദ്ധിശൂന്യതയേയും, വയോധിക ഉള്ളിൽ പരിഹസിച്ചു.

അഹങ്കാരം പോലെ തന്നെ ആപത്താണ് അബദ്ധ ധാരണകളും. താൻ മൂലമല്ല ഒന്നും ഉണ്ടായത് എന്ന തിരിച്ചറിവിനു പകരം, താനാണ് സൃഷ്ടി, സ്ഥിതി, സംഹാരം എന്ന ഭാവത്തോടെ ജീവിക്കുന്നവർ വിഡ്ഡികളാണ്. സ്വന്തം അനിവാര്യതയെ മാത്രം ധ്യാന വിഷയമാക്കുന്നവർക്ക്, സ്വന്തമെന്നു പറയാൻ ആരുമുണ്ടാകില്ല. പ്രഭാതത്തിൽ കോഴി കൂകുന്നതാണ് സൗന്ദര്യം. മദ്ധ്യാഹ്നത്തിലോ, സായാഹ്നത്തിലോ ശബ്ദങ്ങൾക്ക് പുലർകാലത്തിൻ്റെ ഉണർവോ, ഈർജ്ജമോ പകരാനാകില്ല. ഓരോ ഘട്ടത്തിലും, അവരവരുടെ വളർച്ചക്കനുസരിച്ചുള്ള അറിവും ആത്മബോധവും നേടുന്നതിലൂടെയാണ് ഓരോരുത്തരും പക്വതയിലേക്കു പ്രയാണം ചെയ്യുന്നത്. അല്ലാത്തവർ, അജ്ഞതയുടെയും, അവിവേകത്തിൻ്റെയും ആൾരൂപങ്ങളായിരിക്കും.

നാം വളരുന്ന ഇടങ്ങളും, പരിസരങ്ങളും, ജ്ഞാനസമ്പാദത്തിനോ, മനോഭാവരൂപീകരണത്തിനോ, ഒരു രീതിയിലും കാരണമാകുന്നില്ലെങ്കിൽ, അതിനർത്ഥം, എല്ലാം നിഷേധിച്ചുള്ള വളർച്ചയിരുന്നു അതെന്നാണ്. അകലങ്ങളിലുള്ള അറിവും ആനന്ദവുമാണ് എല്ലാവർക്കുമിഷ്ടം. തെറ്റില്ല. പക്ഷെ, അടുത്തുള്ളവയെ അവഗണിച്ചിട്ടാകരുത് എന്നു മാത്രം. അവരവരുടെ അങ്കണത്തിൽ
നിന്നു പഠിക്കാത്തവർ, അന്യദേശത്തുനിന്ന് എന്തു പഠിക്കാനാണ് ? യഥാർത്ഥ പഠനം നമ്മെക്കൊണ്ടെത്തിക്കുക, ‘സ്വന്തം ഒന്നുമില്ലായ്മയേക്കുറിച്ചുള്ള അറിവിൽ’ ആയിരിക്കും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര