വാക്കിനാൽ തുടങ്ങു മീ –
യുദ്ധങ്ങൾ പലതും-
വാൾമുന തുമ്പിനാൽ-
അവസാനം കാണുമ്പോൾ..
വാടിതളരുമീ ജീവിത-
പുഷ്പങ്ങൾ തൻ-
നടുവിലൊരു നെടുവീർപ്പായ് –
നിന്നീടുകയാണിന്നെൻ മാനസം…
കാതടപ്പിക്കുന്നൊരാ –
നിലവിളി ശബ്ദങ്ങൾ…
കരളുടയ്ക്കുന്നിതാ –
കാണുന്ന കാഴ്ചകൾ…
അനാഥത്വത്തിൻ പടുകുഴിയിലോ…
വലിച്ചെറിയപ്പെട്ടൊരാ-
കുരുന്നു ബാല്യങ്ങളും….
ചിന്തകൾ കൊണ്ട് നീ –
ചീന്തിയ രക്തത്തിൽ –
ചിന്നി ചിതറിയതോ…
പല ജീവിത സ്വപ്നങ്ങൾ…
ഹൃദയം നിലയ്ക്കുമീ-
നിലവിളി ശബ്ദങ്ങൾ…
വീണ്ടുമൊരു പ്രളയമായ് –
വിഴുങ്ങാതിരിക്കട്ടെ –
യെന്റെ യീ ഭൂമിയെ….!
സീതുമഹേഷ്. എ✍
