🌹 “ഇന്നത്തെ ചിന്താവിഷയം” 🌹 – 2024 | നവംബർ 30 | ഷാനി ✍ പ്രൊഫസ്സർ എ.വി. ഇട്ടി മാവേലിക്കര

അദൃശ്യരായി നിൽക്കാനാഗ്രഹിക്കുന്നവർ
ഏറെ ആദരണീയർ
………………………………………

കാടിനുള്ളിലെവിടെയോ രോഗശാന്തി നൽകുന്ന സന്യാസിയുണ്ടെന്ന വിവരം നാട്ടിലെങ്ങും പരന്നു. അർബുദ ബാധിതയായ ഒരു സ്ത്രീ, അദ്ദേഹത്തെ കാണാൻ തിരിച്ചു. ദിവസങ്ങളോളം നാട്ടിൽ അലഞ്ഞു കഴിഞ്ഞ് ഒരാൾ വിറകും ചുമന്നു വരുന്നത് അവർ കണ്ടു. അതാണു സന്യാസി എന്നു മനസ്സിലാക്കാതെ, അവർ ചോദിച്ചു:
“രോഗശാന്തി നൽകുന്ന ശുരു എവിടെയാണു താമസിക്കുന്നത് ?” അദ്ദേഹം പറഞ്ഞു: “എന്തിനാണ് അയാളെ അന്വേഷിക്കുന്നത് ? അയാളൊരു കപട സന്യാസിയാണ്. ഞാൻ നിങ്ങളെ സുഖപ്പെടുത്താം”.

അവരുടെ തലയിൽ കൈവെച്ചനുഗ്രഹിച്ച ശേഷം അദ്ദേഹം പറഞ്ഞു: ”ഇനി നിങ്ങൾക്കു പോകാം. നിങ്ങൾ സുഖം പ്രാപിച്ചിരിക്കുന്നു!”
അനേക വർഷങ്ങൾ സന്തോഷത്തോടെ ജീവിച്ച ശേഷമാണു് ആ സ്ത്രി മരിച്ചത്. മരിക്കുമ്പോഴും അവർക്കറിയില്ലായിരുന്നു, താൻ അന്വേഷിച്ച സന്യാസി തന്നെയാണു തന്നെ സുഖപ്പെടുത്തിയതെന്ന് !

അദൃശ്യരായി നിന്ന്, അത്ഭുതം ചെയ്യുന്നവരോട് ആർക്കും ആദരവു തോന്നും. സ്വയം ഒരത്ഭുതമാണെന്നു വരുത്തിത്തിർക്കുവാനുള്ള ആകർഷണ തന്ത്രങ്ങളുമായി നടക്കുന്നവർക്കിടയിൽ, ഇരുട്ടിൽ നിന്നുകൊണ്ട് വെളിച്ചം തെളിക്കുന്നവരാണ് യഥാർത്ഥ അത്ഭുതം! ആരു ചെയ്തു എന്നതിനേക്കാൾ, എന്തു ചെയ്തു എന്നതിലായിരിക്കും അവരുടെ ശ്രദ്ധ!

എല്ലാവരും വളരുന്നത്, ആരുടെയെങ്കിലുമൊക്കെ തണലിലും, സംരക്ഷണയിലുമായിരിക്കും. വളർത്തുന്നവർ കണക്കു സൂക്ഷിക്കാത്തതും, ചോദിക്കാത്തതും, അവരുടെ മഹത്വം. വളർത്തിയവരും പിന്തുണച്ചവരും, ഒന്നിൻ്റെയും അവകാശം പറയാതെ മാറി നിന്നേക്കാം. പക്ഷെ, വളർന്നവരും വലുതായവരും, വളർത്തിയവരെയും വലുതാക്കിയവരെയും തിരിച്ചറിയാതെ പോകരുത്. അദൃശ്യരായി നിൽക്കാനാഗ്രഹിക്കുന്നവരാണ് ഏറെ ആദരണീയർ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര