🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 31 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

മാറ്റം ആവശ്യപ്പെടുന്ന സംയമനം നേടിയെടുക്കാം
—————————————————————————

ഒരു കൊലപാതകി, ശുരുവിനെ കാണാനെത്തി. പെട്ടെന്നുണ്ടായ ദേഷ്യത്താൽ ചെയ്തു പോയതാണെന്ന് അയാൾ ഗുരുവിനോടു പറഞ്ഞു. ആത്മനിയന്ത്രണത്തിന് എല്ലാ ലൗകിക സുഖങ്ങളും ഉപേക്ഷിക്കണമെന്ന ഗുരുവിൻ്റെ ഉപദേശം കേട്ട് , അയാൾ അദ്ദേഹത്തോടൊപ്പം കൂടി. കുറച്ചു നാളുകൾക്കു ശേഷം, അയാൾ ഒരു സന്യാസിയായി.

ഒരിക്കൽ, പഴയൊരു അയൽക്കാരൻ, സന്യാസിയെ കാണാനെത്തി. ഒന്നു പരീക്ഷിക്കാനുറച്ച്, അയൽക്കാരൻ സന്യാസിയോടു ചോദിച്ചു: “നിങ്ങളുടെ പേരെന്താണ് ?” പ്രകോപിതനായി, സ്വയ നിയന്ത്രണം വിട്ട സന്യാസി പറഞ്ഞു: “ലോകം മുഴുവൻ അറിയുന്ന എൻ്റെ പേര് , അയൽവാസിയായിരുന്ന തനിക്കറിയില്ലെ? ഒരു കൊലപാതകം പോലും ചെയ്തയാളാണു ഞാൻ, മറക്കേണ്ട’.

അടിച്ചമർത്തുന്നതൊന്നും, ശാശ്വതമായി നീക്കം ചെയ്യപ്പെടുന്നില്ല. താൽക്കാലികമായി, അമർച്ച ചെയ്യപ്പെടുക മാത്രമാണുണ്ടാകുക. നിയന്ത്രണങ്ങൾ സാദ്ധ്യമാകാതെ വരുമ്പോൾ, അവ തനിയെ പുറത്തു ചാടും. സുകൃതങ്ങളും, സൽക്കർമ്മങ്ങളും അടിച്ചേൽപിക്കുന്നതിൽ അർത്ഥമില്ല. അകത്തുള്ളതെല്ലാം ഒരിക്കൽ എങ്ങനെയെങ്കിലും, പുറത്തു ചാടും.

പരപ്രേരണയല്ല, ഉൾപ്രേരണയും, ഉൾവിളിയുമാണു പ്രധാനം. എന്തെങ്കിലും നേടിയെടുക്കാനോ, ആരെങ്കിലും ആയിത്തീരാനോ വേണ്ടി, അപ്രാപ്യവും,
ഇണങ്ങിച്ചേരാത്തതുമായ വേഷങ്ങൾ അണിയുന്നവർക്ക്, സ്വന്തം പിഴവുകളിൽക്കൂടിത്തന്നെ, വലിയ വില കൊടുക്കേണ്ടി വരും? കുടിലതകളുടെ കുലപതികൾ, പേരുദോഷം മാറ്റാനായി, ഒറ്റ രാത്രി കൊണ്ടു വേഷപ്രച്ഛന്നരായാലും,
അരികിലുള്ളവർ അതു കണ്ടുപിടിക്കും. ആളുകൾ ആദരിക്കുകയും മാനിക്കുകയും ചെയ്യുന്നത് ഉടയാടകളെയല്ല, അവയുടെ ഉടമകളെയാണ്.

മാറ്റം സാദ്ധ്യമാണ്; ആർക്കും, ഏതു നിമിഷവും. പക്ഷെ അതിനുള്ള വില കൊടുക്കണം എന്നു മാത്രം. ഓരോ മാറ്റത്തിനും, അനുബന്ധമായ ചിന്തകളും, ചിട്ടകളും കൂടി രൂപപ്പെടുത്തേണ്ടി വരും. അതിന്, സംയമനവും പരിശീലനവും ഏറെ ആവശ്യമാണ്. രാജാവായാലും, യാചകനായാലും, ആദ്യം ശീലിക്കേണ്ടതു
സംയമനമാണ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര