🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 25 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

ഉള്ളിൽ എരിയട്ടെ കാട്ടുതീ
———————————————-–

ഇറ്റലിയിലെ ട്രാക്ടർ നിർമ്മാതാവായിരുന്നു ഫെറൂച്ചിയോ ലംബോർഗിനി. അദ്ദേഹത്തിനുണ്ടായിരുന്ന ഒരു ഫെരാരി കാറിൻ്റെ ക്ലച്ച് സ്ഥിരം പ്രശ്നമുണ്ടാക്കിയിരുന്നു. ഒരു മെക്കാനിക് എന്ന നിലയിൽ, അദ്ദേഹമതു സ്വയം നന്നാക്കാൻ ശ്രമിച്ചെങ്കിലും സാധിച്ചില്ല. അംഗീകൃത സർവ്വീസ് സെൻ്ററിലേൽപിച്ചുവെങ്കിലും, അവരും അതു നന്നാക്കുന്നതിൽ പരാജയപ്പെട്ടു. അവസാനം, കാർ കമ്പനി ഉടമയായ എൻസോ ഫെരാരിയെ കാണാൻ തന്നെ, ഫെറൂച്ചിയോ ലംബോർഗിനി നിശ്ചയിച്ചു. അദ്ദേഹത്തിൻ്റെ മുമ്പിൽ കാറിൻ്റെ പ്രശ്നം അവതരിപ്പിച്ചപ്പോൾ, ഫെരാരിയുടെ മറുപടി ഇപ്രകാരമായിരുന്നു: “ട്രാക്ടറുണ്ടാക്കുന്നവൻ, ആ പണി മാത്രം നോക്കിയാൽ മതി. കാറിൻ്റെ കാര്യം ഞാൻ നോക്കിക്കൊള്ളാം.” വൃണിതനായ ഫെറൂച്ചിയോ ലംബോർഗിനി അന്നു തന്നെ ഒരു പുതിയ കാർ നിർമ്മിക്കാൻ തീരുമാനിച്ചു. അങ്ങനെയാണ് പ്രസിദ്ധമായ, ‘ലംബോർഗിനി’ കാർ രൂപപ്പെട്ടത്.

തിരസ്ക്കരണങ്ങൾ പലപ്പോഴും പുതിയ തീരുമാനങ്ങളിലേക്കുള്ള ചുവടുവയ്പുകൾക്കു കാരണമാകാം. സ്വന്തം അഭിപ്രായങ്ങളും, നിർദ്ദേശങ്ങളും മറ്റുള്ളവർ അംഗീകരിക്കുന്നതിനു വേണ്ടി കാത്തിരുന്നാൽ, ചിലപ്പോൾ കാര്യം നടക്കാതെ വന്നേക്കാം. ചരിത്രത്തിൽ കാൽപാടുകൾ പതിപ്പിച്ചവരെല്ലാം, സ്വന്തം കാലിൽ നിന്നവരും, തനതു വഴിയെ നടന്നവരുമാണ്. അപരൻ്റ അംഗീകാരം ആനന്ദം നൽകുമെന്നതിനു സംശയമില്ല. പക്ഷെങ്കിൽ, മറ്റൊരാളിൻ്റെ സാക്ഷ്യപ്പെടുത്തലിൽ, സ്വന്തം കഴിവിനെ തളച്ചിട്ടാൽ അത് ആത്മവിശ്വാസം പോലും നഷ്ടപ്പെടുത്തി എന്നു വരാം.

നിഷേധ വാക്കുകളിൽ നിരാശപ്പെടരുത്. വീര്യമുള്ള മനസ്സിനു മുന്നിൽ, എല്ലാ അവഗണനയും നിഷ്ഫലമാകും. ജീവിതത്തിൽ ഏൽക്കേണ്ടി വരുന്ന ഒരു തിരിച്ചടിയും, ശിഷ്ടകാലത്തെ നിഷ്ക്രിയതയ്ക്കുള്ള ലൈസൻസാകരുത്. മറിച്ച് , അവയെല്ലാം അവമതികൾക്ക് അപ്പുറത്തേക്കു പറന്നുയരുന്നതിനുള്ള ഉത്തേജകമാകണം.
ഉളളിലെ അഗ്നി, വെറും ഒരു തിരിനാളം മാത്രമാണെങ്കിൽ, കറ്റടിക്കുമ്പോൾ അതണഞ്ഞു പോയി എന്നു വരാം. എന്നാൽ, അതൊരു കാട്ടുതീയാണെങ്കിൽ, കാറ്റടിക്കുന്തോറും, അതാളിക്കത്തുകയേ ഉള്ളൂ.