🌹 “ഇന്നത്തെ ചിന്താവിഷയം” 🌹 – 2025 | ജനുവരി 01 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

എവിടെയാണു ദൈവത്തെ കുടിയിരുത്തുക?
—————————————————————————-

ഒരു സന്യാസി ധ്യാനം കഴിഞ്ഞ്, മലമുകളിൽ നിന്ന് ഇറങ്ങി വരികയായിരുന്നു. താഴ്വാരത്ത് എത്തിയപ്പോൾ, അവിടെ മാനസ്സിക നില തകരാറിലായ ഒരാൾ നിൽക്കുന്നു. സന്യാസിയെ കണ്ട അയാൾ, പറഞ്ഞു: “നിങ്ങളറിഞ്ഞോ, ദൈവം മരിച്ചു പോയി. ഇനി നിങ്ങൾ ആരോടാണു പ്രാർത്ഥിക്കുക?” സന്യാസി അയാളോടു ചോദിച്ചു: “എങ്ങനെയാണു ദൈവം മരിച്ചതു്ത് ?” ”കൊന്നതാണ് ”, അയാൾ പറഞ്ഞു. “ആരാണു കൊന്നത് “, സന്യാസി അന്വേഷിച്ചു. “നിങ്ങൾ മനുഷ്യർ തന്നെ”, അയാൾ പ്രതിവചിച്ചു.

നമ്മുടെ അബോധ മനസ്സിലെ ചിന്തകളിലൂടെയും, അർധബോധ മനസ്സിലെ പ്രവൃത്തികളിലൂടെയും, ദൈവം കൊല ചെയ്യപ്പെട്ടുകൊണ്ടിരിക്കുകയാണ്. ദൈവം മരിച്ചു എന്നതിനർത്ഥം, നമ്മുടെ മനസ്സിൽ ദൈവം മരിച്ചു എന്നാണ്.

ദൈവീകം എന്ന പേരിൽ, ദൈവത്തിനു നിരക്കാത്ത പ്രവൃത്തികൾ നാം ചെയ്യുമ്പോൾ, നാം ദൈവത്തെ കൊല്ലുകയാണ്. കരുണാമയനും ആദ്രവാനുമായ ഈശ്വരൻ്റെ പേരിൽ, ആർഭാടവും അടിപിടിയും നാം അരങ്ങേറുമ്പോൾ, ഈശ്വരൻ മരിക്കുകയാണ്. മനുഷ്യരുടെ ശരികളിലേക്കും തെറ്റുകളിലേക്കും ദൈവത്തെ വലിച്ചിഴയ്ക്കുമ്പോൾ, ദൈവം കൊല ചെയ്യപ്പെടുകയാണ്.

ആവശ്യം നിറവേറ്റിക്കിട്ടാനുള്ള ഒരു അക്ഷയപാത്രം മാത്രമാക്കി നാം ദൈവത്തെ തീർക്കുമ്പോൾ, ദൈവം ഇല്ലാതാകുകയാണ്. അനുഗ്രഹങ്ങളെ രണ്ടു കയ്യും നീട്ടി വാങ്ങിച്ച് , വേദനകളെ നിഷേധിച്ച്, മനുഷ്യർ ദൈവത്തിനെതിരെ തിരിയുമ്പോൾ, അവർ ദൈവത്തെ ഇല്ലായ്മ ചെയ്യുകയാണ്.

തനിക്കു വസിക്കുവാൻ അനുയോജ്യമായ ഹൃദയങ്ങൾ തേടി അലയുകയാണ്, ഈശ്വരൻ. ഈശ്വരൻ ആരാധനാലങ്ങളിൽ അല്ല വസിക്കുന്നത്. മറിച്ച്, മനുഷ്യ മനസ്സുകളാകുന്ന ശ്രീകോവിലുകളിൽ വസിക്കാനാണ് അവിടുന്നിഷ്ടപ്പെടുക. അവിടെ ദൈവത്തെ കുടിയിരുത്താൻ നമുക്കാകട്ടെ..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര