🌹 “ഇന്നത്തെ ചിന്താവിഷയം” 🌹 – 2024 | നവംബർ 04 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

മറ്റുള്ളവരിലെ നന്മകൾ കാണാം
——————————————————

ക്ലാസിലെത്തിയ അദ്ധ്യാപകൻ, മുന്നറിയിപ്പില്ലാതെ പരീക്ഷ നടത്തി. ചോദ്യക്കടലാസ് കണ്ട് കുട്ടികളെല്ലാം അത്ഭുതപ്പെട്ടു! ഒരു ചോദ്യം പോലും അതിലില്ല. വെളുത്ത കടലാസിൽ ഒരു കുത്തു മാത്രം. എന്തു ചെയ്യണമെന്നറിയതിരുന്ന കുട്ടികളോടദ്ദേഹം പറഞ്ഞു: “നിങ്ങൾ ആ പേപ്പറിൽ എത്തു കാണുന്നുവോ, അതിനേക്കുറിച്ചെഴുതുക !”

എല്ലാവരും കടലാസിന്റെ നടുവിലുള്ള കത്തിനേക്കുറിച്ചും, അതിന്റെ വലുപ്പം , ഓരോ മൂലയിൽ നിന്നുമുള്ള അകലം എന്നിവയെക്കുറിച്ചുമെല്ലാം വിശദമായി എഴുതി. ഉത്തരക്കടലാസ് ശേഖരിച്ച അദ്ധ്യാപകൻ ചോദിച്ചു: “എന്തുകൊണ്ടാണ് എല്ലാവരും ആ ചെറിയ കുത്തിനേക്കുറിച്ചു മാത്രം എഴുതിയതു്? വെളുത്ത പ്രതലത്തെ എന്തുകൊണ്ടവർ തീർത്തും അവഗണിച്ചു?”

സമ്പൂർണ്ണതയുടെയും സംശുദ്ധിയുടെയും വെള്ള വസ്ത്രത്തിലും, എവിടെയെങ്കിലും തെറ്റിന്റെയും കുറ്റത്തിന്റെയും ഒരു കുത്തു കണ്ടെത്താനാണ് നമുക്ക് പൊതുവേ താൽപര്യം. നമുക്കു വേണ്ടത്: ആയിരം ശരികളല്ല, ഒരു തെറ്റാണ്! ശരികളുടെ ലോകം സൃഷ്ടിക്കാൻ ശ്രമിക്കുന്നവരിലും, ഒരൊറ്റ തെറ്റിനു വേണ്ടിയാകും നമ്മുടെ കാത്തിരിപ്പ് . എന്തുകൊണ്ടാണ് പിഴവുകൾ മാത്രം നമ്മുടെ കണ്ണിൽ പെടുന്നത് ? അന്യരുടെ പോരായ്മകളെ, അവരുടെ തിരിച്ചറിയൽ രേവകളാക്കി ഉയർത്തിപ്പിടുച്ചു നടക്കുന്നവരുടെ ഇടയിൽ, വിശുദ്ധർക്കു പോലും പിടിച്ചു നിൽക്കാനാകണമെന്നില്ല.

മറ്റുള്ളവരിലെ നന്മ കാണുന്നതു ശീലമാക്കുക. സംഭവിച്ചു പോയ തെറ്റുകളുടെ തുടർ പ്രക്ഷേപണങ്ങൾക്കോ, വ്യാഖ്യാനങ്ങൾക്കോ, ആരെയും സൽസ്വഭാവികളാക്കാൻ കഴിയില്ല. എന്നാൽ, ഒരാൾ ചെയ്തു തീർത്ത സൽക്കർമ്മങ്ങളുടെ പ്രസിദ്ധി, നന്മയുടെ തുടർചലനങ്ങൾ അയാളിൽ സൃഷ്ടിക്കുവാൻ പര്യാപ്തമായിരിക്കും.

ഓരോ ദിവസവും, നാമോരോരുത്തരും, അപരരെക്കുറിച്ച് നല്ലതു മാത്രമേ ചിന്തിക്കുകയും, സംസാരിക്കുകയും ചെയ്യൂ എന്നു തീരുമാനിച്ചാൽ, ആ ദിവസം നമ്മുടെ സമൂഹത്തിൽ സൃഷ്ടിക്കപ്പെടുന്ന ഊർജ്ജവും ( positive energy), ഉന്മേഷവും എത്രമാത്രമായിരിക്കും? കണ്ണിനു കാഴ്ച ശക്തി മാത്രമേയുള്ളു. കാണുന്നതിനെ വേണ്ടതും വേണ്ടാത്തതുമായി തരം തിരിക്കാനുള്ള കഴിവില്ല. അതു മനസ്സിനു മാത്രമുള്ള സിദ്ധിയാണ്. നാം വളർന്നു വന്ന സാഹചര്യങ്ങളും, പഠിച്ച പാഠങ്ങളും നൽകുന്ന തിരിച്ചറിവാണ്, ആ സിദ്ധി പ്രദാനം ചെയ്യുന്നത്. ആ തിരിച്ചറിവും ആ സിദ്ധിയുമായിരിക്കട്ടെ നമ്മുടെ ജീവിത ലക്ഷ്യം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര