കൊച്ചി: സംസ്ഥാനത്തെ യാത്രാ ദുരിതത്തിന് പരിഹാരമായി മെമു ട്രെയിൻ അനുവദിക്കുമെന്ന വാക്ക് പാലിച്ച് ഇന്ത്യൻ റെയിൽവേ. കൊല്ലം എറണാകുളം റൂട്ടിൽ തിരക്ക് മൂലം ട്രെയിൻ യാത്രക്കാർ കുഴഞ്ഞുവീഴുന്ന സംഭവങ്ങൾ പതിവായപ്പോഴാണ് പാസഞ്ചർ ട്രെയിൻ ഉടൻ അനുവദിക്കുമെന്ന് റെയിൽവേ മന്ത്രി അശ്വിനി വൈഷ്ണവ് ഉറപ്പ് നൽകിയത്.
ഇന്നലെ കൊല്ലം – എറണാകുളം മെമു ട്രെയിൻ പ്രഖ്യാപിച്ച് ദക്ഷിണ റെയിൽവേ വിജ്ഞാപനം ഇറക്കുകയും ചെയ്തു. തിങ്കൾ മുതൽ വെള്ളി വരെ ആഴ്ചയിൽ അഞ്ച് ദിവസമാണ് മെമു സ്പെഷ്യൽ സർവീസ് നടത്തുക.
ഒക്ടോബർ ഏഴ് തിങ്കളാഴ്ച മുതൽ 2025 ജനുവരി 03 വെള്ളിയാഴ്ച വരെ 73 ട്രിപ്പുകളാണ് ഇരുദിശകളിലേക്കും മെമു സർവീസ് നടത്തുക. ഉത്സവകാല തിരക്ക് കൂടി കണക്കിലെടുത്താണ് സ്പെഷ്യൽ മെമു സർവീസെന്നാണ് ദക്ഷിണ റെയിൽവേ പറയുന്നത്.
കൊല്ലത്ത് നിന്ന് ദിവസവും രാവിലെ 6:15നാണ് മെമു സർവീസ് ആരംഭിക്കുക. 9:35ന് എറണാകുളത്ത് എത്തിച്ചേരുകയും ചെയ്യും. 9:50ന് എറണാകുളത്തു നിന്നും പുറപ്പെടുന്ന ട്രെയിൻ ഉച്ചയ്ക്ക് 1:30ന് കൊല്ലത്ത് എത്തിച്ചേരും. കോട്ടയം വഴിയാണ് ഇരുസർവീസുകളും ഓടുന്നത്.
കൊല്ലം എറണാകുളം – മെമുവിന് പുറമെ എറണാകുളം – ബെംഗളൂരു, താമ്പരം – കൊച്ചുവേളി റൂട്ടുകളിൽ വീക്കിലി എക്സ്പ്രസ് ട്രെയിനം വേണമെന്ന ആവശ്യം കൊടിക്കുന്നിൽ സുരേഷ് എംപി റെയിൽവേ മന്ത്രി അശ്വിനി വൈഷ്ണവിന് മുന്നിൽ വെച്ചിരുന്നു. ഈ രണ്ടു ട്രെയിനുകളുടെ കാര്യത്തിലും റെയിൽവേ മന്ത്രി അനുകൂല നിലപാടാണ് സ്വീകരിച്ചിച്ചത്.
മെമു സർവീല് പ്രഖ്യാപിച്ച സാഹചര്യത്തിൽ ഈ ട്രെയിനുകളും കേരളത്തിന് ലഭിക്കുമെന്ന പ്രതീക്ഷയിലാണ് യാത്രക്കാർ. രണ്ട് ട്രെയിനുകളും ഉടൻതന്നെ പ്രഖ്യാപിക്കാമെന്ന് മന്ത്രി പറഞ്ഞിരുന്നു.
