🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 30 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

ചുറ്റുപാടറിഞ്ഞു വളരാം, വളർത്താം
———————————————————-

വയോധിക ദമ്പതികളുടെ ഏക ദു:ഖം, മക്കളില്ല എന്നതായിരുന്നു. ഒരു മഞ്ഞുകാലത്ത് അവർക്കൊരാഗ്രഹം ജനിച്ചു. മഞ്ഞു കൊണ്ടൊരു കുട്ടിയെ ഉണ്ടാക്കിയാലോ? രണ്ടു പേരും ചേർന്ന് വളരെ കഷ്ടപ്പെട്ട് ഒരു മഞ്ഞുകുമാരിയെ സൃഷ്ടിച്ചു. അവർ അവളെ കണ്ണിലെ കൃഷ്ണമണിയേപ്പോലെ സംരക്ഷിച്ചു. പക്ഷെ, മഞ്ഞുകാലം കഴിഞ്ഞപ്പോൾ പ്രശ്നമായി. ചൂടു തട്ടിയാൽ അവൾ ഉരുകിപ്പേകും. അതിനാൽ, അവർ അവളെ വീട്ടിനുള്ളിൽത്തന്നെ സൂക്ഷിച്ചു. ഒരു ദിവസം, അവർ അവളെ കാട്ടിൽ കൂട്ടുകാരോടൊപ്പം കളിക്കാൻ വിട്ടു. രാത്രിയിൽ കാട്ടിൽത്തന്നെ കഴിഞ്ഞ അവർ, തീ കൂട്ടി നൃത്തം ചവിട്ടാൻ തുടങ്ങി. ചൂടിൽ ഉരുകിയൊലിച്ച് മഞ്ഞു കുമാരി ഇല്ലാതായി.

കുഞ്ഞുങ്ങൾ വളർന്നു വരേണ്ടതും അവരെ വളർത്തേണ്ടതും, കാലാവസ്ഥക്കനുസരിച്ചും, കാലത്തിനനുസരിച്ചുമായിരിക്കണം. അടച്ചിട്ടു വളർത്തുന്ന കുട്ടികൾക്കു മോടിയുണ്ടാകും; ദൃഡത ഉണ്ടാകണമെന്നില്ല. ഏതു ചുറ്റുപാടുകളോടും സമരസപ്പെടുവാനോ, അവയെ പ്രതിരോധിക്കുവാനോ ഉള്ള കഴിവാണു ജീവിതത്തിൻ്റെ ധാർഡ്യവും ഗുണനിലവാരവും നിശ്ചയിക്കുന്നത്. മഞ്ഞും, മഴയും, വെയിലുമേറ്റു വളരുന്നവർക്കു മാത്രമേ, അതിജീവന ശേഷിയുണ്ടായിരിക്കുകയുള്ളൂ.

സംരക്ഷണവലയങ്ങൾ സമ്പർക്ക നിരോധിത മേഖലകളാകരുത്. പരിലാളനയും പരിരക്ഷയും ആരുടെയും പ്രതിരോധശേഷി തകർക്കുന്നതുമാകരുത്. കൃത്രിമശ്വാസോഛാസം കൊടുക്കുന്നതു പോലും ചുരുങ്ങിയ സമയത്തേക്കും, സ്വാഭാവികതയിലേക്കു തിരിച്ചു കൊണ്ടുവരുവാൻ വേണ്ടി മാത്രവു
മായിരിക്കണം. വെൻ്റിലേറ്റർ പോലും, ഒരു ജീവൻരക്ഷാ ഉപകരണം മാത്രമായിരിക്കണം; അതൊരു ജീവനോപാധിയാകരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര