👬👫കുട്ടീസ് കോർണർ 👬👫 (നാല്പത്തിയെട്ടാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക്(A)കടം കഥകൾ (B)പൊതു അറിവ്
(C)പദ്യം (D)സ്റ്റാമ്പിന്റെ കഥ കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടല്ലൊ … ല്ലേ…?😍

എന്ന് സ്വന്തം
ശങ്കരിയാന്റി.

👫A) കടംകഥകൾ (11)

1)ആയിരം വള്ളി, അരുമ വള്ളി, ആറ്റിലിട്ടാല്‍ ഒറ്റവള്ളി-

തലമുടി.

2)ആറ്റു കന്യക കുങ്കുമത്തളികാഭരണമണിഞ്ഞു-

താമരപ്പൂവ്.

3)ആല്‍ത്തറയിലെ വെള്ളം വറ്റിയപ്പോള്‍ പൂവാലന്‍ കിളി ചത്തു-

നിലവിളക്കിലെ എണ്ണ വറ്റി തിരി കെടുന്നത്.

4)ആരും കാണാതെ വരും ആരും കാണാതെ പോകും-

കാറ്റ്.

5)ആരും കേറാ മരത്തില്‍ തുഞ്ചത്തെത്തും ഇത്തിരി കുഞ്ഞന്‍-

പുളിയുറുമ്പ്.

6)ആശാരി മൂശാരി തൊടാത്ത തടി, വെള്ളത്തിലിട്ടാല്‍ ചീയാത്ത തടി-

ചീങ്കണ്ണി.

7)ആളൊരു പിരിയന്‍ നിലവിളി അപാരം–

ശംഖ്.

8)ആളെക്കണ്ടാല്‍ ഒച്ചവയ്ക്കും, കൈ കാണിച്ചാല്‍ നില്‍ക്കും-

ബസ്സ്.

9)ആനയ്ക്ക് വഴിക്കാണിക്കാന്‍ വെളിച്ചമുണ്ട്, ബീഡി കത്തിക്കാന്‍ തീയില്ല-

ടോര്‍ച്ച്.

10)ആയിരം ആശാരിമാര്‍ തച്ചുണ്ടാക്കിയ കൊട്ടാരം നിറയെ അറ-

തേനീച്ചക്കൂട്.

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

കായം – ശരീരം, ഒരു അങ്ങാടിമരുന്ന്, ഒരു മരത്തിന്റെ കറ

കാളി – ദുർഗ്ഗ, ഭയങ്കരി ഒരുതരം വാഴ

കുട – കുടയുക, മഴയത്തു ചൂടുന്നകുട, ആണിയുടെ പരന്ന ഭാഗം

കുടം – ഒരു പാത്രം, വാഴയുടെയും മറ്റും പൂങ്കുല, വൃക്ഷം

കുംഭം – മലയാളമാസം, ഒരു രാശി, ആനയുടെ തലയിൽ ഇരു ഭാഗത്തും കാണുന്ന മുഴ, കുടം

കുശം – വെള്ളം, വെളുത്തദർഭ, ഇരുവേലി

കുറി – കുറിക്കുക, നെറ്റിയിലെ കുറി, ചിട്ടി, നിശ്ചയം

കൂട്ടം – സമൂഹം, കൂമ്പാരം, വർഗ്ഗം

കേളി – പ്രസിദ്ധി, കേളികൊട്ട്, ക്രീഡ

കോടി – പുതിയ, ഉഗ്രമായ, നൂറുലക്ഷം വരുന്ന സംഖ്യ, മൂല.

📗📗

👫C) പണ്ടേ പ്രചാരത്തിലുള്ള പദ്യങ്ങൾ(17)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ പപ്പടത്തെ ക്കുറിച്ചൊരു കവിതയാണ്‌ കുട്ടീസ്. 😍

പപ്പടം

കുടുകുടെ ചിരിച്ചിട്ട് കുളത്തിൽച്ചാടി
കിടുകിടെ വിറച്ചിട്ട് പുറത്ത് ചാടി
കിരുകിരെ കരഞ്ഞിട്ട് ഇലയിൽ ചാടി
പൊടുപൊടെ പൊടിഞ്ഞിട്ട് വായിൽച്ചാടി
കറുമുറെ തിന്നിട്ട് വയറ്റിൽ ചാടി
ചടപടം പപ്പടം തവിടുപൊടി

👫D) സ്റ്റാമ്പിന്റെ കഥ (26)

വേലകളി

1991-ൽ ഇന്ത്യയിലെ നാടൻ നൃത്തകലകളെക്കുറിച്ച് ഭാരതീയ തപാൽ വകുപ്പ് ഒരുകൂട്ടം സ്റ്റാമ്പുകൾ പുറത്തിറക്കിയവയിൽ 6.50 പൈസ മുഖവിലയുള്ള സ്റ്റാമ്പിൽ വേലകളി കല കാരൻമാരെ ചിത്രീകരിച്ച് പുറത്തിറക്കി.

പ്രാചീനകേരളത്തിന്റെ വീരപുളകമുണർത്തുന്ന പൗരുഷത്തിന്റെ കലയാണ് വേലകളി. അമ്പലപ്പുഴവേല എന്ന കീര്‍ത്തികേട്ട വേലകളി പഴയ ചെമ്പകശ്ശേരി നാട്ടുരാജ്യത്തിന്റെ ആസ്ഥാനമായിരുന്ന അമ്പലപ്പുഴയിലാണ് ആരംഭം കുറിച്ചതെന്നു കരുതപ്പെടുന്നു. ചെമ്പകശ്ശേരിയിലെ യോദ്ധാക്കളുടെ യുദ്ധമുറകളുടെ പ്രകടനമായി അവതരിപ്പിക്കപ്പെട്ട ഒരു ആയോധനകലയെന്നതിലുപരി പടയണി, തുള്ളൽ, കഥകളി തുടങ്ങിയ ഒട്ടേറെ കേരളീയകലാരൂപങ്ങളുടെ പ്രാദുർഭാവത്തിൽ നിർണ്ണായകമായ സ്വാധീനം ചെലുത്തിയാടുന്ന ഒരു ക്ഷേത്രകലകൂടിയാണിത്.
താളവും മേളവും ഒത്തിണങ്ങിയ വേലകളി ക്ഷേത്രസങ്കേതങ്ങളില്‍ അരങ്ങേറുന്നതിനാല്‍ ഒരു അനുഷ്ഠാനകലയെന്നു വിളിക്കാമെങ്കിലും ഒരു കായിക കലാപ്രകടനം എന്നു പറയുന്നതാവും കൂടുതല്‍ ശരി. പ്രാചീന കേരളത്തിന്റെ വീരസ്മരണയുണര്‍ത്തുന്ന ഈ കല നല്ല മെയ് വഴക്കവും ആയോധനകലയില്‍ പ്രാവീണ്യം സിദ്ധിച്ചവരുമായ കലാകാരന്മാരാണ് അവതരിപ്പിക്കാറുള്ളത്.

മദ്ധ്യതിരുവിതാംകൂടിന്റെ സ്വന്തം എന്നു വേണമെങ്കില്‍ അവകാശപ്പെടാവുന്ന ഈ കലാരൂപം നിലവില്‍ വന്നത് ആലപ്പുഴ ജില്ലയിലെ അമ്പലപ്പുഴയിലാണെന്ന് വിശ്വസിക്കപ്പെടുന്നു. പടയണി, തെയ്യം എന്നീ അനുഷ്ടാന കലകള്‍ പൊലെ – കഥകളി, ഓട്ടന്‍‌തുള്ളല്‍ എന്നീ പാരമ്പര്യ കലകള്‍ പോലെ ഒരു കാലത്ത് പ്രതാപത്തിന്റെ കൊടുമുടിയില്‍ വിരാചിച്ചിരുന്നു ഈ കലാരൂപം

വേലകളി ആരംഭിക്കുന്നത് പ്രത്യേകതരത്തിലുള്ള വാദ്യമേളങ്ങളോടു കൂടിയാണ്. വേലതകില്‍ കൊമ്പ്, കുറങ്കുഴല്‍, തപ്പ്, മദ്ദളം എന്നീ വാദ്യോപകരണങ്ങള്‍ മേളത്തിന് ഉപയോഗിക്കുന്നു .വേലതകില്‍ വാദ്യമേളത്തിന് ഉപയോഗിക്കുന്നതുകൊണ്ടായിരിക്കാം വേലകളി എന്ന പേര് വന്നതെന്ന് അനുമാനിക്കാം

വൈവിധ്യമായ ചുവടുകളും അടവുകളും കൊണ്ട് ഹൃദ്യമാണ് വേലകളി. ആയം ചാട്ടം, അരയിൽ നീക്കം തുടങ്ങിയ ചുവടുകളാണ് ഉപയോഗിക്കുന്നത്. കളിക്കാരുടെ നീക്കവും ആക്രമണ രീതിയും എതിർപക്ഷം അറിയാതിരിക്കാൻ വാദ്യമേളങ്ങളിലൂടെയാണ് നിർദ്ദേശങ്ങൾ കൊടുക്കുന്നത്. മുറിയടന്ത (ഒരു താളം) മുഴങ്ങിയാൽ വേഗത്തിലുള്ള ചലനവും അടന്തയായാൽ പതിഞ്ഞ മട്ടിലുള്ള ചുവടുകളുമായാണ് കളിക്കുന്നത്.കൗരവ പാണ്ഡവയുദ്ധത്തിന്റെ അനുസ്മരണമാണിതിനു പിന്നിലെന്നും അതല്ല ദേവാസുരയുദ്ധത്തിന്റെ സങ്കല്പത്തിലാണിത് അവതരിപ്പിക്കുന്നതെന്നും രണ്ടു തരത്തിലുള്ള വിശ്വാസങ്ങള്‍ നിലവിലുണ്ട്.

കേരളത്തിന്റെ തനതു കലയായ വേലകളിയില്‍ ഭടന്മാരുടെ വേഷം കെട്ടിയ കലാകാരന്മാര്‍ പരിചയും ചുരികക്കോലും കയ്യിലേന്തിയാണ് ഇതവതരിപ്പിക്കുന്നത്. കരയില്‍ നിന്നു കൊണ്ടുള്ള വേലകളി ‘കരവേല’ എന്നും കുളത്തില്‍ ഇറങ്ങി നിന്ന് കൊണ്ടുള്ള വേല ‘കുളത്തില്‍ വേല’ എന്നും അറിയപ്പെടുന്നു. ആനപ്പുറത്തു തിടമ്പെഴുന്നള്ളിച്ചു നില്‍ക്കുമ്പോള്‍ കളിക്കാര്‍ വരിവരിയായി നിന്ന് കളി അവതരിപ്പിക്കുമ്പോള്‍ അതു ‘തിരുമുമ്പില്‍വേല’എന്നു പറയാറുണ്ട്.ഒരു മണിക്കൂറോളം ഒരു കൊച്ചു യുദ്ധത്തിന്‍റെ പ്രതീതി ജനിപ്പിക്കുന്ന വിധം ചാട്ടവും നൃത്തവും മുന്നോട്ടും പിന്നോട്ടുമുള്ള നീക്കവുമെല്ലാം ചേര്‍ന് നയനാന്ദകരമായ ഒരു ദൃശ്യമാണ് അവതരിപ്പിക്കുന്നത്. കളിയുടെ അവസാനം പരാജിതരായിട്ട് കൂട്ടത്തോടെ ഓടിപ്പോവുകയാണ് വേലകളിയുടെ സമ്പ്രദായം.

📗📗

👫E) എളുപ്പത്തിൽ ഒരു ചിത്രം വരയ്ക്കാം (32)

👬👭👫👭👬👭👫👭👬👭

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖
👬👭👫👭👬👭👫👭👬