👬👫കുട്ടീസ് കോർണർ 👬👫 (നാല്പത്തിയൊന്നാം വാരം)

ഹായ് കുട്ടീസ്!! ഇന്ന് നമുക്ക് (A)കുസൃതി ചോദ്യങ്ങൾ (B)പൊതു അറിവ്
(C)പദ്യം (D)മുല്ലാ തമാശ കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കു ന്നുണ്ടല്ലൊ…. ല്ലേ 😍

എന്ന് സ്വന്തം
ശങ്കരിയാന്റി.

👫A) കുസൃതി ചോദ്യങ്ങളും ഉത്തരവും (15)

കുസൃതി ചോദ്യങ്ങൾ (15)

1. മാങ്ങാ ഉണ്ടാവാത്ത മാവ് ?

ഉപ്പുമാവ്

2) ആൺകുട്ടികളും പെൺകുട്ടികളും ഒരുപോലെ ഉപയോഗിക്കുന്ന മാല ഏതാണ്?

അക്ഷരമാല

3) ഏതു മരമാണ് ദോശ ചുടാൻ ഉപയോഗിക്കുന്നത്?

മാവ്

4) ഏത് ഇംഗ്ലീഷ് അക്ഷരത്തിലാണ് കാക്ക ഇരിയ്ക്കുക?

H ൽ (എച്ചിൽ)

5) അടിയ്ക്കും തോറും നീളം കുറയുന്നത്?

ആണി

6) ഒരു കൊല്ലം ഉറപ്പായും ഉപയോഗിയ്ക്കുമെന്ന് ഗ്യാരണ്ടി ഉള്ള വസ്തു?

കലണ്ടർ

7) കഴിക്കാൻ കൊള്ളാം പക്ഷേ ഈ കറി ചോറിൽ കൂട്ടാൻ പറ്റില്ല?

ബേക്കറി

8) അടുക്കളയിൽ ഉണ്ട്‌ ഞങ്ങൾ രണ്ടുപേരും. എല്ലാർക്കും ഞങ്ങളെ വേണം. എന്നാൽ ഞങ്ങൾ വരുന്നത് ആർക്കും ഇഷ്ടം ഇല്ല?

ഗ്യാസും ഷുഗറും

9)അടുക്കളയിൽ കയറുമ്പോൾ എല്ലാരും ആദ്യം വയ്ക്കുന്നതെന്ത്?

കാൽ

10) ഇരുപത്തിയാറ് അക്ഷരങ്ങളും അടങ്ങുന്ന 8അക്ഷരമുള്ള ഇംഗ്ലീഷ് വാക്ക്?

ALPHABET

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ച കളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

1. കുറി – കുറിക്കുക, നെറ്റിയിലെ കുറി, ചിട്ടി, നിശ്ചയം

2) കൂട്ടം – സമൂഹം, കൂമ്പാരം, വർഗ്ഗം

3) കേളി – പ്രസിദ്ധി, കേളികൊട്ട്, ക്രീഡ

4) കോടി – പുതിയ, ഉഗ്രമായ, നൂറുലക്ഷം വരുന്ന സംഖ്യ, മൂല

5) കോമരം – വേഷം, അലങ്കാരം, നിറം, ബൊമ്മ

6) ക്രിയ – പ്രവൃത്തി, ആരംഭം, ശിക്ഷ, സാദ്ധം

7) ക്ഷണം – വിളിക്കൽ, വിരുന്ന്, മുഹൂർത്തം, നിമിഷം

8) ഗണം – കൂട്ടം, വർഗ്ഗം, സംഖ്യ

9) ഗോത്രം – വംശം, വനം, തൊഴുത്ത്

10) ഘടം – കുടം, അതിര്, തൂണിന്റെ ഒരു ഭാഗം

📗📗

👫C) പണ്ടേ പ്രചാരത്തിലുള്ള പദ്യങ്ങൾ(10)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ മഴ യെ കുറിച്ചൊരു കവിതയാണ്‌ കുട്ടീസ്. 😍

മഴ

ചറപറ ചടപട മേളം
ചോരാതെയിരുന്നൊരു കൂര
തവളക്കുഞ്ഞിനായി വിരിഞ്ഞൊരു
കുട
കാണാന്‍ എന്ത് ചന്തം
കൂണിന്‍കുട കണ്ടു
അയലത്തെ കുഞ്ഞി ചേച്ചിക്കും
ഉണ്ണിക്കുമാകെ സന്തോഷം
ചറ പറ പെയ്തു മഴ ….

📗📗

👫D) ഹോജ മുല്ല തമാശ (8)

കുട്ടീസ്… ഹോജ യുടെ ഒരു ചെറിയ തമാശ കഥ ഈ വാരവും വായിക്കാം

ആപത്തിന്‌ ഇന്നാരെന്നില്ല.

ഒരു സ്ത്രീ തന്റെ കൊച്ചുമകനെ മുല്ലായുടെ പാഠശാലയിൽ കൊണ്ടുചെന്നു.
‘ഞാൻ പറഞ്ഞിട്ട്‌ ഇവൻ കേൾക്കുന്നതേയില്ല,’ സ്ത്രീ പറഞ്ഞു. ‘മുല്ലാ ഇവനെയൊന്നു പേടിപ്പിക്കണേ.’
മുല്ലാ ഒരു പിശാചിന്റെ മട്ടെടുത്തുകൊണ്ട്‌ മുഖം വക്രിപ്പിക്കുകയും കണ്ണു തുറിപ്പിക്കുകയും ചെയ്തു. എന്നിട്ടു പെട്ടെന്ന് പുറത്തേക്കോടിപ്പോയി. വന്ന സ്ത്രീ പേടിച്ചു ബോധം കെട്ടു വീണു. ബോധം വീണപ്പോൾ മുല്ലാ പതുക്കെ അടുത്തുചെന്നു.
‘കുട്ടിയെ പേടിപ്പിക്കാനല്ലേ മുല്ലാ, ഞാൻ പറഞ്ഞത്‌? എന്നെ പേടിപ്പിക്കാനല്ലല്ലോ.’
‘അമ്മേ,’ മുല്ലാ പറഞ്ഞു, ‘എനിക്കുതന്നെ എന്നെ എന്തു പേടിയായിരുന്നുവെന്ന് നിങ്ങൾ കണ്ടതല്ലേ? ആപത്തു വരുമ്പോൾ അതിനു വേർതിരിവൊന്നുമില്ല.🤭🤣

📗📗

👫E) എളുപ്പത്തിൽ ഒരു ചിത്രം വരയ്ക്കാം (25)

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖
👬👭👫👭👬👭👫👭👬👭