🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 26 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ഒന്നിനേയും ഉപയോഗശൂന്യം എന്നു കരുതരുത്
————————————–

ഉദ്യാനപാലനത്തിൽ, അതീവ തൽപരനായിരുന്നു ഒരു രാജാവ്. ഒരു ഗുരുവിനു കീഴിൽ, അദ്ദേഹം പൂന്തോട്ട നിർമ്മാണം അഭ്യസിച്ച് , സ്വന്തമായി ഒരു പൂന്തോട്ടം ഉണ്ടാക്കി. ഒരു ദിവസം ഗുരു പൂന്തോട്ടം കാണാനെത്തുമെന്ന്, അറിയിപ്പു ലഭിച്ചു. രാജാവ് ഉദ്യാനമെല്ലാം വൃത്തിയാക്കി, അതിമനോഹരമാക്കി. വിലകൂടിയ വിവിധ തരം ചെടികളും പൂക്കളും അവിടെയുണ്ടായിരുന്നു.

ഉദ്യാനം നിരീക്ഷിച്ച ഗ്യരുവിൻ്റെ മുഖം പ്രസാ ദിക്കുന്നതിനു പകരം വാടുന്നതാണ് , രാജാവു കണ്ടത്. അപ്രതീക്ഷിതമായ പ്രതികരണത്തിൽ സ്തബ്ധനായ രാജാവിനോടു ഗുരു ചോദിച്ചു: “ആ മഞ്ഞ ഇലകളെല്ലാം എവിടെ?” രാജാവു പറഞ്ഞു:
“മഞ്ഞ ഇലകളെല്ലാം കൊഴിഞ്ഞു വീണവയല്ലെ? വേലക്കാർ അവയെല്ലാം വാരിക്കളഞ്ഞു!”. ഗുരു പറഞ്ഞു: “വിടർന്നു നിൽക്കുന്ന പച്ച ഇലകളും പൂക്കളും മാത്രമല്ല, കൊഴിഞ്ഞു വീണ ഇലകളും കൂടി ചേരുന്നതാന്, ഉദ്യാനം!”

പച്ചപ്പു മാത്രം തേടുന്നതാണ് ജീവിതം കൃത്രിമമാകുന്നതിൻ്റെ കാരണം. മരുഭൂമിയേ പ്പോലും മാറ്റിനിർത്താനാകയില്ല. മഞ്ഞും മഴയും വന്നു പോകണം. കൊടുമുടിയും താഴ്വാരവും ഒരു പോലെ പ്രധാനമാണ്. ഇഷ്ടപ്പെടുന്നതിലേക്കു മാത്രം ദൃഷ്ടി പായിച്ച്, അങ്ങോട്ടുള്ള വഴിയിലൂടെ മാത്രം യാത്ര ചെയ്യുമ്പോൾ, ഒരു കാര്യം മറക്കരുത് :
കാറ്റു മാറി വീശും; കാലാവസ്ഥയിൽ വ്യതിയാനങ്ങൾ വരാം?”

കൊഴിഞ്ഞു വീഴുന്നവയെല്ലാം, ഒരിക്കൽ പൂത്തുലഞ്ഞവയാണ്. അവയ്ക്കെല്ലാം ഒട്ടേറെ കഥകൾ പറയാനുണ്ടാകും: വളർന്നതിൻ്റെയും തളർന്നതിൻ്റെയും; സ്വീകരണത്തിൻ്റെയും നിരാകരണത്തിൻ്റെയും. വൃത്തിയാക്കുന്നതിനിടയിൽ, ഉപയോഗമില്ലെന്നു കരുതുന്നവയെല്ലാം, എടുത്തെറിയപ്പെടും. തളിർത്തു തണലായി നിന്നവ, പിന്നിടു കൊഴിഞ്ഞു വീഴുക എന്നതു കാലചക്രത്തിൻ്റെ ഭാഗമാണ്. ഉപയോഗ ക്ഷമത, സ്ഥാനം കൊണ്ടും, പ്രയോജനം കൊണ്ടും മാത്രം തീരുമാനിക്കപ്പെടരുത്. വെറും സാന്നിദ്ധ്യത്തിനു പോലും, ഏറെ മൂല്യം ഉണ്ടാകാം; ഏറെ ഉണർവ്വും ഊർജ്ജവും പ്രദാനം ചെയ്യുവാൻ കഴിഞ്ഞെന്നും വരാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര