🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 24 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

അകലെ നിന്നുള്ള
വിലയിരുത്തൽ ശരിയാകണം എന്നില്ല.
———————————————————-

ഒരാൾ കുറേ നേരമായി മലമുകളിൽ നിൽക്കുന്നതു മൂന്നു സുഹൃത്തുക്കൾ താഴെ നിന്നു ശ്രദ്ധിച്ചു. ഒന്നാമൻ പറഞ്ഞു: “അയാൾ എന്തോ അന്വേഷിക്കുകയാകും. അയാൾക്ക് എന്തെങ്കിലും നഷ്ടപ്പെട്ടിട്ടുണ്ടാകും?”
രണ്ടാമൻ അതിനെ എതിർത്തു. അയാൾ പറഞ്ഞു: “എന്തെങ്കിലും അന്വേഷിക്കുകയാണെങ്കിൽ, അയാൾ അങ്ങാട്ടുമിങ്ങോട്ടും നടക്കണമായിരുന്നു. അദ്ദേഹം അനങ്ങുന്നില്ലല്ലോ? ആരെയെങ്കിലും, കാത്തു നിൽക്കുകയാകും, അയാൾ?” മൂന്നാമൻ അതിനോടു വിയോജിച്ചു കൊണ്ടു പറഞ്ഞു:
“ഒരാളെ കാത്തു നിൽക്കുന്നയാൾ, നാലു വശത്തേക്കും നോക്കും. അയാളതു ചെയ്യുന്നില്ല. അയാൾ ധ്യാനിക്കുകയായിരിക്കും?”

തർക്കം തീർക്കുവാൻ അവർ മൂവരും കൂടി, മലമുകളിലെത്തി. അവർ, തങ്ങളുടെ വിശദീകരണങ്ങൾ അയാളുടെ മുമ്പിൽ നിരത്തി. എല്ലാം കേട്ട ശേഷം, അയാൾ പറഞ്ഞു: “ഞാൻ എന്തെങ്കിലും അന്വേഷിക്കുകയോ, ആരെയെങ്കിലും കാത്തിരിക്കുകയോ, ധ്യാനിക്കുകയോ ഒന്നുമല്ല. ഞാൻ വെറുതെ ഇവിടെ നിൽക്കുക മാത്രമാണു ചെയ്യുന്നത് !”

ചിലർ അങ്ങനെയാണ്. കാണുന്ന എന്തിനേക്കുറിച്ചും അഭിപ്രായം പറയും; കേൾക്കുന്ന എന്തിനോടും കൂട്ടിച്ചേർക്കും; എല്ലാക്കാര്യങ്ങളിലും ഇടപെടും. എല്ലാറ്റിനേയും അതിൻ്റെ സ്വാതന്ത്ര്യത്തിനും, സ്വാഭാവികതയ്ക്കും വിട്ടു കൊടുത്താൽത്തന്നെ, പല ചിന്താക്കുഴപ്പങ്ങളും, തർക്കങ്ങളും ഒഴിവാക്കാനാകും. പല കാഴ്ചകളും, പരിമിതമായ വിശദീകരണങ്ങളിലേക്കും, വ്യാഖ്യാനങ്ങളിലേക്കും മാത്രമായിരിക്കും നയിക്കുക.

ഒരാളെ സംശയത്തിൻ്റെ നിഴലിൽ നിർത്താനുള്ള എല്ലാ സാദ്ധ്യതകളോടും, ആർക്കൂട്ടത്തിനൊരു പ്രത്യേക ആഭിമുഖ്യമുണ്ട്. ഒന്നിനെ വിലയിരുത്തുന്നവരാരും, അടുത്തുചെന്നു മനസ്സിലാക്കിയവരാകണമെന്നില്ല. അവർക്കതിനു താൽപര്യമുണ്ടാകണമെന്നുമില്ല. അകലെ നിന്നു നടത്തുന്ന അഭിപ്രായ പ്രകടനങ്ങൾക്ക് ആരോടും ഉത്തരം പറയേണ്ടതില്ലല്ലോ? പറഞ്ഞു രസിക്കുന്നതിൽ മാത്രം, ജീവിതത്തിൻ്റെ ആനന്ദം കണ്ടെത്തുന്നവരോട് , കൃത്യമായ അകലം പാലിക്കുന്നതായാരിക്കും എപ്പോഴും ഉത്തമം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര